Gohed Blong Prij Long Ol Haos Wanwan We Yu No Kam Slak
1 Ol man Isrel bifo, oli stap mekem sakrifaes evri dei. (Eks. 29:38-42) Faea blong olta i stap laet oltaem nomo; smok we i stap go antap i olsem wan ‘gudfala smel’ we i mekem Jeova i glad. (Eks. 29:18) Tede, Baebol i talem long yumi blong ‘givim wan sakrifaes blong presem God, hemia, frut blong maot blong yumi we i stap talemaot nem blong hem long pablik.’ (Hib. 13:15) Yumi no givim sakrifaes we Loa i talem, be yumi mekem wosip long Jeova taem yumi gohed blong presem hem we yumi no kam slak.—Aes. 43:21; Wok 5:42.
2 Jisas Kraes, Wetnes we i bigfala moa long ol narafala we oli laef bifo long wol ya, i tijim yumi olsem wanem blong mekem klin wosip from fasin blong presem Jeova olsem sakrifaes. Hem i tijim ol disaepol blong hem se mesej we oli stap talemaot i impoten tumas. Hem i save se nambawan rod blong talemaot gud nyus long ol man, i blong toktok stret long olgeta wanwan long ol haos blong olgeta. (Mat. 10: 7, 12) Taswe, yumi luk se ol aposol oli folem advaes ya we God i givim long Jisas blong prij long ol haos wanwan.—Wok 20:20.
3 I sem mak tede. From we ol trufala Kristin oli ol disaepol blong Jisas, oli talemaot gud nyus long ol haos wanwan folem eksampel blong hem. Nating se samfala oli tok nogud long yumi mo oli ronem yumi from wok ya, plante milyan man oli kasem save long trutok finis mo plante handred taosen nyufala disaepol oli stap joenem bigfala kampani evri yia, samting ya i pruvum se hemia nao rod we Jeova i yusum blong mekem wil blong hem i kamtru. Hemia from wanem yumi mas holemstrong long minista wok blong yumi.
4 Gudfala Frut From Wok Blong Prij Long Ol Haos Wanwan: “God i stap mekem i sem mak nomo long olgeta man . . . Sipos wan man i ona long God, mo i mekem ol samting we i stret long fes blong hem, bambae God i glad long hem.” (Wok 10:34, 35) Fasin blong go stret long ol wanwan haos long teritori blong yumi i soemaot klia se yumi stap mekem i sem mak nomo long olgeta man, givim jans long evriwan blong harem mesej blong Kingdom oltaem. Biaen olgeta we oli lesin oli kasem help stret olsem wanwan long olgeta i nidim.
5 Kolosap olgeta pablisa, ol yangfala, ol olfala, mo tu olgeta we oli nyuwan, oli save joen long wok blong prij long ol haos wanwan. Long rod ya wanwan i save ‘talemaot tok ya we God i stap sevem yumi from.’ (Rom 10:10) Fasin blong joen wetem ol narafala long wok blong prij long ol haos wanwan i mekem yumi joengud long lav mo yuniti. Long semtaem, yumi gat jans blong soem fasin stanap strong blong yumi taem ol man oli no kea long mesej blong yumi no oli tok nogud long yumi. Fasin ya blong soemaot bilif long ol man i mekem se ‘yumi stap stanap long fes blong olgeta man long wol,’ mo samting ya i givhan long ol man we hat blong olgeta i stret blong luksave se yumi folem wan plan blong tijim ol man long Baebol mo se olgeta tu oli save kasem gudfala samting from. (1 Kor. 4:9) Evri samting i soemaot klia se Jeova i stap blesem wok blong prij long ol haos wanwan mo se hem i stap yusum wok ya blong hivimap bigfala kampani long “haos” blong klin wosip blong hem.—Aes. 2:2-4.
6 Naoia bitim olgeta taem bifo, ol man oli nidim blong harem mesej blong Kingdom. Yumi mas gohed blong prij long ol haos wanwan we yumi no kam slak, gogo kasem Jeova i talem se i naf. (Aes. 6:11) Sipos yumi mekem olsem, bambae yumi kasem glad ya we i kamaot taem yumi joen long impoten wok ya we i stap givhan long ol man long taem ya blong en, hemia wok blong prij long ol haos wanwan.—1 Kor. 15: 58.