Ol Yangfala—Lukaotgud Long Ol Rod Blong Yufala
1 Papa blong yumi, Jeova, hem i intres long fasin ya we ol yangfala oli stap gohed long saed long speret. Taem oli lesingud long ol gudfala loa blong hem, ol yangfala oli mekem hat blong hem i glad mo oli haremgud from. (Prov. 27:11; Mat. 11:28-30) Oli letem Jeova i soem gudfala rod long olgeta blong wokbaot long hem.—Prov. 16:9.
2 Jisas Kraes i soem eksampel long yang taem blong hem olsem wan man we winim gladhat blong God mo ol man. (Luk 2:52) Ol yangfala tede oli mas strong blong mekem sem mak tu. Yumi luksave gudfala rod we wan yangfala i stap folem taem yumi luk se hem i stap gohed long saed blong speret. Taem Jisas i gat 12 yia, ol man oli savegud hem from fasin blong hem blong wantem tokbaot Jeova long ol narafala. (Luk 2:46, 47) Ol yangfala tede oli soem semkaen tingting olsem, taem oli eksplenem bilif blong olgeta long ol narafala.—w90 7/1 pp. 29-30; w87 12/1 p. 21 (Engglis no Franis).
3 ?Ol yangfala yufala i save mekem wanem naoia blong “ona long Jeova wetem ol sas samting blong yufala?” (Prov. 3:9) ?Yu ting se i gud blong leftemap moa taem we yu stap yusum blong talemaot mo tijim gud nyus, maet olsem haftaem paenia no? Bambae yu sapraes long bigfala glad mo ol narafala blesing we oli kamaot taem yu leftemap moa taem blong yu long minista wok. Samting ya bambae i givim janis long yu blong save prij wetem ol plante defren pablisa. Yu save stat naoia blong askem wan no tu pablisa we oli gat ekspiryens blong wok wetem yu long wiken ya.
4 Ol papa mama oli save leftemap bigwan tingting mo halpem ol pikinini blong olgeta sipos oli mekem sam pleplei wetem olgeta antap long taem we oli joen wetem olgeta long wok blong prij. Ol narafala long kongregesen we oli big man long speret oli save mekem plan blong askem ol yangfala blong joen long olgeta long wok blong prij long ol haos wanwan, long ol visit mo Baebol stadi. Fasin blong joen oltaem wetem olgeta pablisa we oli strong long speret bambae i bildimap ol yangfala ya mo halpem olgeta blong “go stret long ol tok we oli blong mekem olgeta oli kam bigman.”—Hib. 6:1.
5 Evri kristin oli gat nid blong mekem fasin blong tij blong olgeta i kamgud moa. Ol yangfala tu. ?Ol yangfala, yufala i stap reregud long ol tok we oli stap givim long yufala blong mekem long tiokratik skul? ?Yufala i gat wan gudfala program blong rid mo stadi wanwan mo tingting dip tu? ?Olsem wanem, yu rere blong mekem ol samting we yu stap lanem oli wok long laef blong yu? ?Yu stap reregud long ol miting blong mekem se yu kasem savegud mo rere blong givim ansa? ?Yu stap raetemdaon ol gudfala poen we yu harem long ol miting mo yu traem blong yusum ol tingting we oli stap long Kingdom Wok Blong Yumi?
6 No lego janis we yu gat blong joen blong klinim Haos Kingdom mo halpem ol olfala brata sista mo olgeta we bodi blong olgeta i slak long sam smolsmol wok no long sam narafala rod. Yu no fogetem blong putum sam presen mane oltaem blong halpem blong pem ol samting blong Haos Kingdom mo long wok blong Sosaeti long olgeta ples long wol.
7 Sipos yumi ‘obei long ol tok blong Jeova mo letem hem i soem rod long yumi, bambae hem i lidim yumi blong kasem glad mo gat janis blong mekem moa long wok blong hem.’—Ol Sam 119:9.