?Olsem Wanem Blong Givhan Long Ol Yangfala?
1 Tede, laef blong plante yangfala i strong tumas. Be nating, plante handred yia bifo, tabu speret blong God i lidim wan man blong raetem ol tok ya, se: “Hae God, ?bambae yang man i save mekem laef blong hem i klin olsem wanem? Hem i mas obei long ol tok blong yu.” (Sam 119:9) Yes, i klia nomo se ol advaes blong Jeova long Baebol oli givhan bigwan long fulap taosen yangfala tede.
2 Wan yangfala man i ridim wan Wekap! stret long haf ya “Ol Yangfala Oli Askem se . . . ” mo biaen hem i talem se: “Bifo, mi mi gat fasin blong mekem fren wetem ol gel from we mi ting se samting ya i stret nomo. Nating we mi mekem olsem, be mi neva gat plan blong mekem mared. Taem mi ridim magasin blong yufala Wekap!, mi mi jenisim tingting blong mi. Mi mi stop blong mekem olsem mo mi tekem disisin se sipos mi mekem olsem be mi naf blong mared nao.” Ol tok blong yangfala ya oli soemaot se hem i kasem save long ol nambawan advaes blong magasin ya. Ol yangfala oli gat jans blong gat wan buk we i fulap gud long ol advaes blong Baebol, hemia nyufala buk Questions Young People Ask—Answers That Work. ?Bambae yufala i save givhan olsem wanem long ol yangfala we i stap long ol ples blong preij blong yufala no long skul?
Yufala i Mas Intres Long Ol Yangfala
3 I tru se samtaem i no isi nating blong mekem wan yangfala i kasem save long ol tok blong Jeova. (Prov. 22:15) Be aposol Pol i talem se: “Long fes blong ol man Isrel, mi mi folem fasin blong mifala man Isrel, blong pulum ol man Isrel oli kam man blong Kraes.” (1 Kor. 9:20) Taswe, sipos yufala i gat plan blong givhan long ol yangfala blong faenem mo laekem ol samting long saed blong speret, yufala i mas save gud long olgeta mo long ol trabol we oli stap kasem. Yufala i mas tingting dip long ol samting we oli intres long hem mo long ol trabol we oli mitim long skul, long haos blong olgeta, no long ples we hem i wok long hem. Taem yufala i givim wetnes long ol yangfala, yufala i mas yusum sam gudfala fastok. Yufala i mas skelem gud ol samting we yufala i talem mo yufala i mas jusum gud ol kwestin we yufala i askem. Sipos yufala i mekem olsem, yufala i stap soemaot se yufala i kasem save long olgeta. Lis blong nyufala buk “Questions Young People Ask” i gat plante poen we yufala i save tokbaot wetem ol yangfala. Sipos yufala i ridim gud ol defren japta ya, bambae yufala i save wanem tingting blong fulap yangfala tede.
Ol Tok We Yufala i Save Talem
4 Taem yufala i prij long evri haos wan wan, plis, raetemdaon nem blong ol famle we oli gat pikinini. Yufala i save talemaot long ol man wanwan se wok blong yufala i blong givhan long ol man blong oli fiksimap olgeta trabol we oli kasem evri dei. Maet long sam haos bambae yufala i save toktok long ol pikinini nomo. Yufala i save soemaot long olgeta sam gudfala advaes we nyufala buk i givim. Yufala i no mas foget se wok blong yufala i blong givhan long olgeta blong oli luksave trutok we i stap long Sam 119:9.
5 Taem yufala i toktok long wan yangfala, yufala i mas fren gud wetem hem, mo soemaot se yufala i gat respek long hem. Maet fastaem yufala i save talem halo long hem mo biaen yufala i save talem ol tok ya, se: “Tede, mi mi pas long evri haos wanwan blong givhan long ol yangfala olsem yu blong winim ol trabol we oli gat long wol ya. ?Yu yu mekem finis sam samting we yu no laekem nating?” No maet yu save askem se: “?Yu yu mekem finis sam samting from we ol narawan oli mekem olsem? ?Yu yu save olsem wanem blong no folem ol fasin blong ol narawan?” Taem we yufala i askem ol kwestin ya, biaen yufala i mas lesin gud long ansa we bambae hem i givim, ale yufala i save openem buk long japta 9 mo yufala i save talem se: “Traem ridim ol tok we i stap long pej 77 blong nyufala buk ya. [Ridim haf we i stret long ol tok blong yu]. ?Yu ting se sipos ol yangfala oli stadi long Baebol, samting ya i save givhan long olgeta blong winim trabol ya? [Livim yangfala i ansa]. Traem tingbaot ol tok we Baebol i talem long Sam 119:9. [Ridim vas ya]. Buk ya i soemaot olsem wanem Baebol i givhan long ol yangfala we oli gat hadtaem mo olsem wanem oli winim ol trabol we i stap long lis blong faswan pej. [Pusum buk long han blong hem]. Mi mi glad blong livim buk ya long yu, praes blong hem i 200 VT nomo.”
6 Jeova “i no wantem we ol man oli lus.” (2 Pita 3:9) Hem i tinghae long ol yangfala tu, be plante long olgeta bambae oli no save pastru long Amageden. Taswe, yumi mas traehad oltaem blong givim wan gudfala wetnes long olgeta blong mekem se fulap long olgeta oli sef. Olsem nao, yumi presem Jeova wan taem moa.