Halpem Ol Yangfala Blong Oli No Kasem Trabol
1 Jeova i wantem we yumi harem gud long laef blong yumi. Taswe hem i letem yumi fri blong mekem ol samting we hat blong yumi i laekem. From we hem i letem yumi fri olsem, Jeova i wantem we bambae yumi wanwan i talemaot laef blong yumi long fes blong hem.
2 Be yumi sinman nomo, mo yumi no stret gud olgeta. ?Taem yumi stap jusum wanem samting yumi wantem mekem, yumi mas folem wanem rod blong no kasem trabol? (Ekles. 11:10) ?Olsem wanem? ?Ol yangfala we i no gat ekspiryens, oli save laef we oli no kasem trabol? Yes, oli save. Jeova i save finis we yumi evriwan i nidim sam loa blong lidim yumi. Taswe, hem i givim sam advaes blong halpem ol yangfala mo ol bigman tu. Long rod ya, olgeta oli save winim ol trabol we i stap kamaot long ol Lasdei ya we yumi stap laef long olgeta.—Sam 19:7; 119:9; 2 Tim 3:1.
Wok Blong Papa Mo Mama
3 Taem ol yangfala oli kasem trabol, oli nidim wan gudfala papa mo wan gudfala mama blong halpem olgeta. Ale, tufala i save ‘leftemap han we i slak, mo mekem ni we oli stap seksek, oli kam strong bakegen. Nao sipos leg i nogud, olsem we ni i tanem, be bambae hem i save kamgud bakegen.’ (Hib. 12:12, 13) Ol papa mama oli mas givhan oltaem long ol pikinini blong olgeta, blong oli stretem tingting blong olgeta. Ale, sipos oli mekem, oli save folem rod ya we i blong go kasem laef blong olwe. Blong kasem mak ya, papa mo mama i mas gat tingting we i longfala, oli mas save gud ol tingting blong ol pikinini, mo oli mas prea long Jeova from.
4 Papa mo mama i no save blokem olgeta trabol, mo olgeta samting we i traem pulum ol pikinini. ?Be olsem wanem oli save mekem tingting blong ol pikinini i kam strong moa? Oli mas “stretem olgeta, oli mas tijim olgeta, olsem we Masta blong yumi i stap stretem yumi, i stap tijim yumi.” (Efes. 6:4) Blong mekem olsem, oli mas mekem wan stadi blong famle blong olgeta, oli mas tijim olgeta long ol gudfala tingting mo ol gudfala fasin, oli mas mekem sam samting tugeta, oli mas stretem olgeta taem i gat nid blong mekem, mo oli mas soemaot wan gudfala rod long olgeta.
5 Long Distrik Asembli, yumi kasem buk ya Questions Young People Ask—Answers That Work. Hem i save halpem gud ol yangfala. Hem i save halpem ol papa mama blong toktok wetem ol pikinini long ol gudfala rul blong Baebol. Sipos ol loa blong God oli kam insaed long tingting mo hat blong ol pikinini, oli save givhan long hem blong agensem ol samting we i traem pulum hem. Sipos famle i joen blong tokbaot nyufala buk ya, bambae ol trabol oli no kasem ol yangfala.
6 Taem buk ya Young People Ask i kamaot long Distrik Asembli, brata we i mekem tok ya i tok stret long ol yangfala we i stap long fored. Hem i soemaot olsem wanem buk ya i save halpem olgeta. Hem i pulum tingting blong ol papa mama blong oli yusum hem blong mekem stadi wetem famle blong olgeta. Long en blong evri japta, i gat sam “poen blong toktok.” Sosaete i no putum ol kwestin ya blong askem sam kwestin long olgeta haf wanwan, no gat. Ol kwestin ya oli laenap wetem ol stampa tok we i stap insaed long wan japta. Ating sam papa i wantem askem ol kwestin ya taem oli ridim finis olgeta haf blong wan japta. Sam narafala oli wantem askem wan kwestin taem oli ridim finis wan stampa tok mo ol haf we i stap biaen long hem.
Halpem Ol Yangfala Long Ples Blong Yufala
7 Plante taem, yumi faenem sam yangfala long wok blong prij. Sipos oli ridim buk ya Young People Ask, olgeta tu oli save faenem ansa long sam kwestin we oli askem. Taswe, long manis Febuwari bambae yumi givimaot buk ya. Ating yu mekem sam fas tok oli rere finis blong givimaot hem. No yu save talem se:
8 “Plante man oli ting se taem oli yang, oli harem gud moa, i winim taem oli stap kam olfala. Be long taem blong yumi, yumi luksave plante yangfala we oli harem nogud tumas long laef blong olgeta. ?Ating yu tu yu luksave samting ya, a? [Letem man i ansa] Ol man oli no tinghae long ol rul blong God olsem bifo. From samting ya, plante bisnes long wol oli paspas. Ol yangfala oli kasem plante trabol, mo oli harem nogud from. ?Wanem tingting blong yu long kwestin ya? ?Weples oli save faenem ansa long ol kwestin blong olgeta, blong folem stret rod? [Letem man i ansa] Plis, yu save luk olsem wanem Baebol i leftemap tingting blong yumi long Sam 119:9. [Ridim] Baebol i talem se papa mo mama i mas tijim gud ol pikinini long ol stret rod. Mo long Proveb 1:8, hem i talem se: [Ridim]. Taswe mifala i soemaot buk ya, Young People Ask. Hem i givim sam nambawan advaes we oli stanap long Baebol. Mo tu, hem i storebaot plante trabol we sam yangfala oli kasem. Ol store ya oli save givhan long ol yangfala blong luksave olsem wanem oli save winim ol trabol. Mo sipos oli folem ol advaes blong buk ya, bambae oli harem gud long fyuja blong olgeta. [Soemaot ol nem blong sam japta, blong pulum tingting blong ol man.] Buk ya i rili nambawan, mo hem i gat sam gudfala pija long hem. Mifala i givim hem blong 200 VT nomo, mo sipos yu tekem hem, bambae yu laekem hem.”
9 Baebol i soemaot we ol yangfala oli mas yusum paoa blong olgeta blong traem kasem sam gudfala mak we oli stret long lukluk blong God. Nyufala buk ya i save lidim plante man oli go long Baebol blong traem kasem ol advaes blong hem. Yes, buk ya i nambawan blong halpem ol yangfala blong oli harem gud naoia, mo long fyuja blong olgeta.