Sam Gudfala Man Blong Wok We i Yusum Gud Tok Blong God
1 Pol i talem se ol Kristin minista oli “stap joen wetem God blong mekem wok blong hem.” (1 Korin 3:9) Yumi mas traehad blong kam ‘man we i no gat sem long ol wok blong yumi, we yumi man we i stap tijim ol man long trutok blong God, long stret fasin nomo.’—2 Tim 2:15.
2 Sosaete i wantem halpem yumi blong gat gudhan long wok blong prij. Taswe hem i putum sam nambawan tok insaed long Baebol blong yumi, New World Translation of the Holy Scriptures. ?Yu yu save gud olgeta? ?Yu yu stap yusum olgeta taem yu yu stap long wok blong prij, no taem yu mekem wan Baebol stadi?
Wan Tul We Yumi Save Yusum Long Plante Fasin
3 Long yia 1950, ol man blong Jeova oli glad blong kasem ol haf blong Baebol we oli raetem long Grik, (Nyutesteman) mo long 1960, olgeta haf blong Baebol oli kamaot finis. Biaen, Sosaete i wokem wan nyufala Baebol wetem ol refrens. Sam fasin blong nyufala Baebol ya, (Ol tok we oli stap long en blong hem, mo ol refrens) oli givhan long yumi long wok blong prij, taem yumi mekem ol miting oli rere, mo taem yumi stap stadi wanwan. Buk ya i olsem wan nambawan tul we i save halpem yumi blong gat gudhan taem yumi stap yusum Baebol. Sipos yumi yusum gud olgeta fasin blong Baebol ya, yumi gat olgeta samting we yumi nidim blong kam wan tru Kristin. Mo yumi save halpem ol man blong olgeta tu oli kam tru Kristin we i gat gudfala fasin.—Mat. 7:24;1 Tim 4:16; Hib. 5:14.
4 Taem yu yu stap prij, yu save faenem wan man we i Katolik, nao hem i talem long yu se long Matyu 16:18, Jisas i stanemap jyos blong hem long Pita we i ston blong faondesen blong jyos ya. Ale, yu yu save faenem vas ya long New World Translation. Biaen long tok ya “bigfala ston” i gat wan smol mak. Mak ya i givim 5 vas blong Baebol. Olgeta vas ya oli soemaot we Jisas nomo i ston ya blong faondesen blong Kristin kongregesen, be ston ya i no Pita.
5 Wan haf i gat nem olsem: “Sam Stampa Tok Blong Prij.” Haf ya tu i save halpem yumi long wok blong prij. Taem yufala i stap prij long wan ples we ol pablisa oli pas plante taem long hem, ating yufala i wantem yusum wan stampa tok blong prij we i defren long hemia we Kingdom Wok i givim. Aninit long ol tok “Ol Lasdei,” “Kingdom,” no “Wol,” yufala i save faenem sam vas we yufala i save yusum long wok blong prij, mo blong mekem sam visit.
Sam Pej We Yumi Save Yusum Blong Tingtingbak
6 Samtaem yumi stap toktok wetem wan man, be yumi no moa faenem wan vas blong Baebol. Ale, yumi save yusum haf ya we i gat nem olsem: “Indeks Blong Ol Tok Blong Baebol We Oli Impoten Moa.” Indeks ya we i stap long en blong Baebol, i save halpem yufala. ?Yufala i stap yusum hem?
7 Ol tok we i stap long ol faswan pej blong Baebol ya, i stat long pej 5 blong hem, oli soemaot we olgeta we i mekem New World Translation oli gat bigfala save long wok blong transletem Baebol. Long ol laswan pej blong hem, wan “Appendix” i talem from wanem i stret nomo blong yusum prapa nem blong God long Baebol. Mo tu hem i yusum ol vas blong Baebol blong talem mining blong sam wod we plante man i no kasem gud, olsem “sol,” “Gehena,” “Hades mo Sheol.” Long ol pej 1,546 mo 1,547, (1538 mo 1539) wan narafala haf blong Baebol ya i gat nem olsem: “Lis blong ol buk blong Baebol.” Hem i talem hu i raetem ol buk blong Baebol, wetaem mo weples oli mekem, mo hem long wanem yia ol samting we oli storebaot oli kamaot.
8 Tru, Jeova i givim long yumi olgeta samting we yumi nidim “blong bambae ol man blong hem oli save kam waes long olgeta samting, bambae oli gat evri samting blong mekem ol gudfala wok we i stap.” (2 Tim. 2:17) Sipos yumi yusum gud New World Translation wetem ol narafala buk mo magasin blong yumi, bambae yumi rili save halpem ol man long wok blong prij. (Luk 6:47, 48) Sipos yumi gat gudhan blong mekem wok blong God mo yumi yusum gud Baebol, bambae Masta blong yumi i save talem long yumi se: “Ei, wan gudfala wok ya.”—Mat. 25:21.