Sam Tingting Long Saed Blong Hot Taem
1 Long hot taem blong yia ya, long ol manis blong spel, plante long yumi bambae oli no stap long kongregesen blong olgeta blong sam taem. Sipos yumi no stap long kongregesen blong yumi long en blong manis, yumi mas mekem sua se yumi sanem ripot blong prij blong yumi i go long sekretari. Yumi mas kwik blong mekem samting ya blong mekem se sekretari i save kaontem ripot blong yumi wetem hemia blong kongregesen long en blong manis mo hem i save mekemrere mo sanem i go long Sosaeti bifo namba sikis dei blong nyufala manis.
2 Yumi mas rere tu blong holem ol jans blong talemaot gud nyus, eksampel taem yumi mekem wan trip, taem yumi visitim ol famle no taem yumi stap storeyan wetem sam man. ?Yumi gat sem tingting olsem Jisas long saed blong ol taem we yumi save tekem jans blong prij? Jisas i no fraet blong holem jans blong prij. (Jon 4:5-30) Aposol Pol tu, i ‘yusum evri jans mo hem i kasem ol gudfala frut from.’ (Efes. 5:16; Wok 17:17; 28:30, 31; Kol. 4:5). Yumi mas mekem ol stret plan blong joen long wok ya. Yumi mas reregud long sam gudfala poen blong tokbaot, mo yumi mas gat wan magasin no traket wetem yumi blong wekemap intres blong man.
3 Sipos yumi traehad blong mekem ol poen antap oli wok, bambae yumi sua blong yusum taem blong yumi long waes fasin long hot taem mo givim ol “fas kakae blong garen blong yumi” i go long Jeova.—Prov. 3:9.