Traehad Blong Kasem Wan Man We i Save Lesingud
1 Long wok blong yumi blong prij long olgeta haos wanwan, yumi save mitim plante man we oli no stap tingbaot ol samting long saed blong speret. Maet oli stap tingbaot ol memba blong famle blong olgeta, ol hadtaem long saed blong ekonomi, no ol problem blong olgeta wanwan. Blong statem wan toktok, oltaem hem i gud blong tokbaot wan samting we ol man we oli stap kolosap long yu oli intres long hem. Yusum kwestin blong mekem intres blong hem i gru moa, from we samting ya i save pulum man blong haos blong joen long storeyan ya. Yusumgud ol kwestin blong faenemaot wanem i stap long tingting blong ol man we i no save mekem ol man oli harem nogud.
2 Maet yu save kasem wan man we i lesingud from yu yusum wan samting olsem hemia:
◼ “Gud moning. Nem blong mi_____. Mi stap laef kolosap long haos blong yu nomo. Plante man we mi toktok wetem olgeta long moning ya oli stap tingbaot [tokbaot wan samting we i jes hapen long man we i stap kolosap long yu no jusum wan samting we i jes kamaot nomo long nyus]. ?Yu ting se i stampa tingting blong God we wol i kam olsem ya? Letem hem i ansa. Yu save soemaot traket ya Laef Long Pis Blong Nyufala Wol. Tekem smoltaem nomo blong tokbaot pija long pej 1 mo tok we i stap long paragraf 1-3 sipos i gat taem yet. Yu save soem Laef Foreva buk. Yu save pulum hem i go long Ol Sam 37:9, 10 we i stap long pej 157 mo ridim long buk. Yusum ol pija we i stap long pej 156-7, eksplenem ol stret fasin we bambae i stap long fulwol taem ol rabis fasin oli no moa stap.
3 !Rere oltaem blong givimaot Wajtaoa mo Wekap! Ol man blong wol tede oli fraet from stret fasin i stap godaon. Taem yu ridim Wekap! blong Ogis 8 (Eng. mo Fr.), jusum sam poen we yu ting se ol man blong teritori blong yu oli save intres long olgeta. No tokbaot tumas we laef blong tede i nogud, tokbaot haf ya long man blong haos, “The Perfect Moral Guide,” (Ol Stret Rul Blong Lidim Yumi) mo gat strong tingting blong tokbaot ol blesing we yu kasem from ol advaes long Tok blong God. Afta long manis ya taem yu stap soemaot Wekap! blong Ogis 22, soemaot haf ya “When All Races Live Together in Peace” (Taem Ol Defren Kaen Man Oli Stap Wanples Long Pis). Soemaot ol advaes long Baebol olsem wanem ol man blong ol defren laen mo kala oli save joengud long pis. Yumi save seremaot ol nyufala mo ol olfala Wajtaoa mo Wekap! enitaem, i no long ol dei blong seraotem magasin nomo.
4 Tingbaot we yumi wantem wekemap intres long mesej blong Kingdom. Blong kasem wan man we i lesingud, fastaem yumi mas pulum intres blong man blong haos mo mekem we intres ya i save gru moa long tingting blong hem. Samting ya i save mekem ol man we oli olsem sipsip oli wantem tumas blong “harem wanem we trufala God Jeova i talem” long saed blong stampa tingting blong hem fastaem long ol man.—Ol Sam 85:8.