Mekem Tiokratik Skul i Givhan Fulwan Long Yu
1 Tiokratik skul i wan tul blong trenem yumi blong “tijimgud” ol man, blong yumi save eksplenem ol trutok blong Baebol long ol narafala long wan fasin we i karem frut. (2 Tim. 4:2) Yumi stap kasem plante impoten save long ol poen long Baebol evri wik. ?Olsem wanem yumi save mekem sua se yumi stap kasem fulwan ol stret advaes we yumi nidim we skul ya i stap givim?
2 Lesingud long fastok blong brata we i lukaot long skul taem hem i talemaot ol bigfala poen we yu save lanem long miting ya. Tingbaot ol kwestin we hem i askem mo olsem wanem yu save yusum ansa blong olgeta long minista wok blong yu.
3 Faswan tok i no wan tok blong talem bakegen nomo ol poen we oli stap long buk. Tok ya i blong tokbaot olsem wanem ol poen ya oli save wok gud mo olsem wanem oli save givhan long yu wan. Sipos yu mekemrere fastaem, bambae samting ya i givhan long yu blong lesingud moa long ol bigfala poen mo yu save joen blong givim sam ansa long ol kwestin we oli kam biaen.
4 Ridim oltaem Baebol riding blong wik i save givhan long yu blong mekem fasin tangkyu blong yu long Tok blong God i kam dip moa. Sipos yu mekem sam moa risej long Baebol riding, samting ya i save givim sam nyufala poen we oli pulum intres blong yu, mo we oli mekem save blong yu long trutok i kam moa klia. Long saed blong ol poen blong Baebol riding long Tiokratik Skul, haf ya i no blong talem bakegen nomo ol store blong Baebol. Afta wan smol tok blong talemaot mining blong fulwan riding ya, brata we i mekem haf ya bambae i soemaot ol bigfala poen long ol japta we yumi mas ridim long wik ya mo soem olsem wanem oli laenap long laef mo wosip blong yumi. Yu mas lesingud blong bambae yu lanem olsem wanem blong mekem ol tok blong Baebol oli wok moa long laef blong yu.—Sam 119:105.
5 Sipos yu mas mekem wan tok olsem wan studen, makemgud poen we yu stap wok long hem. Ridim bakegen ol advaes we School Guidebook i givim we i laenap long poen ya, mo traem blong mekem oli wok. Taem yu jusum ol save we bambae yu yusum long tok blong yu, traem soemaotgud ol poen we evriwan oli save yusum long wok blong prij.—sg pej 96-99.
6 Sipos yu wan sista we yu mas mekem tok No. 3 no tok No. 4, traem blong mekem long wan rod we i sem mak long samting we i rili hapen long laef. Maet man blong haos i agri no i no save agri fulwan long evri samting we yu talem; traem blong soem olsem wanem yu save givhan long hem blong tingtinggud long ol rul blong Baebol long bisnes ya. (sg pej 153-158) Samting ya bambae i givhan long ol man we oli stap lesin, blong luk olsem wanem blong mekem taem wan samting olsem i hapen long wok blong prij. Mekem rere tok blong yu longtaem bifo we yu givim, mo mekem plan blong lanem sam taem bifo wetem wan we bambae i mekem man blong haos. I no mas gat nid blong lanem bakegen taem miting i stat finis.
7 I gud sipos ol studen we oli givim tok oli sidaon long ol jea kolosap long platfom. Samting ya bambae i sevem taem mo i mekem se brata we i lukaot long skul i save givim advaes long fasin we i go stret long studen nomo. Evriwan oli save haremgud long klia advaes we hem i givim wetem kaen fasin, we i stanap long School Guidebook. Maet bambae hem i no folem oda blong ol poen we oli stap long Pepa blong Givim Advaes; bambae hem i jusum wan poen we yu nidim naoia blong yu save gohedgud.
8 Hemia ol gudfala risen blong yumi blong reregud from mo blong stap long Tiokratik Skul evri wik. Ol advaes we yumi stap kasem bambae oli halpem yumi blong kam waes mo gat gudhan long minista wok blong yumi.—Prov. 1:5.