Mekem Ol Baebol Studen Oli Rere Long Minista Wok
1 Bigfala mak we yumi wantem kasem long saed blong ol Baebol stadi i blong mekem ol nyufala disaepol, ol man blong wok we bambae oli joen wetem yumi blong tijim ol narafala man. (Mat. 28:19, 20) Taswe plan blong wan stadi i no blong givim save nomo; hem i mas putum bilif long hat blong ol studen blong yumi mo mekem olgeta oli rere blong serem hop blong olgeta wetem ol narafala man. (2 Kor. 4:13) ?Long wanem rod we oli wokgud yumi save givhan long olgeta blong kam naf blong tijim ol narafala man?—2 Tim. 2:2.
2 Putum Minista Wok Olsem Wan Mak: Taem yu jes stat blong stadi wetem olgeta, mekem i klia se trufala wosip i joen wetem fasin blong ‘talemaot tok ya long maot blong yumi blong God i sevem yumi.’ (Rom 10:10) Nem ya blong yumi, ol Wetnes blong Jeova, i minim se yumi mas toktok long ol narafala man. Halpem olgeta blong luksave se taem oli kasem tijing i no blong olgeta nomo blong kasem sef. Taem olgeta oli kam tija, olgeta we oli lesin long olgeta oli gat jans blong kasem sef tu.—1 Tim. 4:16.
3 Tingtingbak Long Wanem Hem i Lanem: Askem kwestin long wanem hem i bin lanem i wan gudfala rod blong tijim hem. Ol kwestin ya oli givhan long studen blong gru long saed blong speret taem ol nyufala trutok oli stap kasemgud maen mo hat blong hem. Semfala samting i stap hapen long yumi taem yumi ansa long ol kwestin blong tingtingbak we oli stap long stadi blong Wajtaoa. Mekemrere ol isi, klia kwestin, blong studen blong yu i save ansa long prapa tok blong hem.
4 Yu save mekem tingtingbak ya olsem we yu stap long wok blong prij. Askem wan kwestin no soemaot wan samting we i stap kamaot oltaem long wok blong talemaot gud nyus long ol narafala man. Yu yu mekem man blong haos, mo letem studen blong yu i soemaot wanem hem i save talem. Talem gudfala tok long hem long ol poen we hem i mekem i gud, mo givim sam advaes we i save givhan long hem blong kamgud moa nekis taem. Trening olsem bambae i tijim hem olsem wanem blong yusum wanem hem i bin lanem mo bambae i givhan long hem blong kamgud moa long fasin blong yusumgud Baebol.
5 Reasoning Buk: Mekem sua se studen blong yu i gat wan Reasoning buk, mo trenem hem blong yusum. Soem olsem wanem buk ya i givim sam poen blong statem storeyan, ansa long ol kwestin blong Baebol, no ansa long ol tok blong blokem tok blong yumi. Yusum buk ya long stadi blong soemaot ol rod blong toktok long ol narafala long wan fasin we i pulum olgeta blong oli luksave wanem yu stap talem. Buk ya i save givhan long hem blong no fraet blong toktok, mo blong mekem tingting we i pusum hem blong talemaot mesej blong Kingdom i kam strong moa.
6 Soemaot Olsem Wanem Ol Miting Oli Impoten: Plan blong ol miting blong kongregesen, antap moa Miting blong Kingdom Wok mo Tiokratik Skul, i blong mekem yumi rere long wok blong prij. Olgeta we oli gat ekspiryens mo gat gudhan oli tokbaot mo mekem sam pleplei blong soemaot ol stampa samting blong gat gudhan blong prij. Makemgud we ol miting oli impoten, mo mekem olgeta samting we yu save mekem blong givhan long hem blong kam long ol miting ya. Fasin blong go oltaem long ol miting i save givim paoa we studen blong yu i nidim blong pusum hem blong kam wan trufala disaepol blong Jisas.
7 Eksampel blong yu i impoten tu. Fasin blong yu blong wantem go prij mo blong joen oltaem long wok blong prij i soem dip fasin tangkyu we yu yu gat long trutok. Fasin olsem bambae i leftemap tingting blong studen blong yu blong mekem moa blong soemaot bilif blong hem. (Luk 6:40) Olgeta samting ya oli save halpem wan nyufala disaepol blong tingbaot minista wok olsem wan bigfala blesing mo blong gat fasin tangkyu we hem i save joen long hem.—1 Tim. 1:12.