?Yu Yu Stap Sakem Plante Sid?
1 I gat wan tok we plante man oli stap talem se: “Moa yu traehad, moa yu kasem frut from.” Samting ya i tru moa long wosip blong yumi. Moa yumi spenem taem mo paoa blong rere long ol miting, talemaot gud nyus blong Kingdom, mo soem lav long ol brata blong yumi, moa bambae yumi gru long saed blong speret. Samting we i defren olgeta long hemia i tru tu. Sipos yumi no wantem traehad no hat blong yumi i hafhaf long wanem yumi stap mekem, ?yu ting se bambae yumi save kasem gudfala frut from?
2 Aposol Pol i talem klia rul ya long 2 Korin 9:6: “Man we i planem smol nomo long garen blong hem, hem bambae i kasem smol kakae nomo. Be man we i planem plante, hem bambae i kasem plante kakae.” ?Yu yu stap sakem plante sid?
3 Baebol Stadi Blong Yumi Wanwan: Blong kam olsem ol minista we oli karem plante frut, fastaem yumi mas sakem plante sid long saed blong stadi blong yumi wanwan. Yumi mas gat wan fasin blong wantem tumas kakae long saed blong speret. (Sam 119:97, 105; Mat. 5:3) Wetem ol wari blong laef we oli gat paoa long yumi evri dei, i nidim strong tingting blong traehad blong wokem wan trufala fasin we yumi luksave nid blong yumi long saed blong speret. Blong mekem samting ya, plante long yumi i nidim fasin blong ‘pemaot taem.’ (Efes. 5:16) Samfala oli mekem plan blong girap eli long sam stret dei blong mekem stadi blong olgeta wanwan. Sam narafala oli makemaot wan stret taem long sam naet blong mekem samting ya. ?Long wanem rod nao yumi save kasem plante frut from? Bilif blong yumi bambae i kam strong moa, hop i klia moa, mo yumi glad moa long tingting blong yumi mo yumi stap tingting moa long gudfala saed blong ol samting.—Rom 10:17; 15:4; 1 Pita 1:13.
4 Ol Miting Blong Kongregesen: Long Ol Sam 122:1, Deved i talem se: “Taem ol man oli talem long mi se ‘Yumi go long haos blong Hae God,’ mi mi glad tumas.” ?Yu yu harem olsem tu? Sakem plante sid i minim go oltaem long ol faef miting blong yumi evri wik. Mekemap maen blong yu blong no letem nogud weta i blokem yu. Oltaem, moa yumi winim ol traem, moa yumi kasem ol blesing.
5 Kam eli mo stap smoltaem afta long miting blong storeyan wetem ol brata blong yu, blong leftemap tingting blong olgeta. Mekem fasin fren blong yu i kam bigwan moa blong yu save fren wetem plante defren man. Reregud long Wajtaoa stadi mo ol narafala miting blong bambae yu save sakem plante sid taem yu joen blong givim ansa, olsem we yu gat jans blong mekem. Taem yu “givim wora fri long narafala” long ol miting, bambae yu “kasem bakegen wora we i fri.”—Prov. 11:25.
6 Wok Blong Prij: Maet rul ya blong sakem moa sid i tru moa long wok blong prij, bitim ol narafala ples. Moa yumi spenem taem long hem, moa bambae yumi gat jans blong kasem plante gudfala ekspiryens long hem, ol visit we oli gohed gud, mo ol Baebol stadi we oli gohed gud tu.
7 Sakem moa sid long wok blong prij i nidim fasin traehad blong gat gudhan long hem, antap long fasin blong spenem plante taem long wok ya. Wan nambawan tul blong halpem yumi blong gat gudhan long minista wok blong yumi, hem i Reasoning buk. Pej 9-15 i gat lis blong bitim 40 fastok we oli kavremap 18 poen we oli save givhan long yumi blong wekemap intres blong man long ol haos. Sipos yu faenem wan man we i intres, yu mas sua blong raetemdaon nem blong hem blong bambae yu save gobak mo karem frut blong sid we yu sakem. Maet bambae fasin traehad blong yu i lidim yu blong statem wan nyufala Baebol stadi, mo yu save tijim wan narafala olsem wanem blong sakem plante sid.
8 Sipos yumi sakem plante sid, bambae yumi save tingbaot blong kasem moa blesing long Jeova.—Mal. 3:10.