Planem Plante Kakae Mo Kasem Bigfala Blesing From
1 Yumi evriwan i stap wet se ol nambawan promes blong Tok blong God oli kamtru. Naoia tu, Jeova i stap givim plante blesing we oli mekem yumi harem gud tumas. Be, blong rili kasem blesing, plante taem yumi mas traehad. Olsem aposol Pol i talem: “Man we i planem plante [kakae long garen], hem bambae i kasem plante.” (2 Kor. 9:6) I gud blong tingbaot tu rod we tok ya blong Pol i stret long tufala.
2 Minista Wok Blong Yumi Wanwan: Sipos yumi serem gud nius wetem ol man evri taem we yumi gat janis blong givim witnes, yumi save kasem plante blesing. (Prov. 3:27, 28) I gud tumas we plante oli stap planem moa kakae long garen. Blong mekem olsem, oli stap prij moa, maet oli kam haftaem paenia no fultaem paenia. Yumi evriwan i save planem plante kakae long garen taem yumi gobak long ol man we oli intres mo taem yumi tekem evri janis blong askem long ol man sipos oli wantem stadi Baebol. (Rom 12:11) Sipos yumi traehad long ol wok ya, yumi save gat gudfala taem long wok blong prij mo glad blong yumi bambae i kam bigwan moa.
3 Sapotem Wok Blong Kingdom: Taem Pol i talem se yumi mas ‘planem plante kakae long garen,’ hem i stap tokbaot fasin blong givim samting long narafala man. (2 Kor. 9:6, 7 11, 13) Tede, i gat plante samting we yumi save mekem mo givim blong sapotem wok blong Kingdom. Yumi save givhan blong wokem ol Haos Kingdom mo Haos Asembli. Yumi save soemaot se yumi glad blong joen long wok blong klinim mo fiksimap ol samting long ol stamba ples ya blong mekem trufala wosip. Mo tu, yumi save givim smol mane blong halpem kongregesen blong yumi blong pem ol samting, mo blong halpem wok blong prij mo mekem disaepol we i stap gohed long ful wol. !Taem yumi evriwan i givhan smol, yumi glad tumas blong luk we Jeova i stap blesem bigwan wok ya we hem i stanemap!—Mal. 3:10; Luk 6:38.
4 Tok blong God i talem long yumi blong ‘mekem ol gudfala fasin, mo ol gudfala wok, mo kam rij long fasin ya. Yumi mas gat gladhat blong givhan long ol man, mo blong seraot ol samting blong yumi long ol narafala man.’ Taem yumi folem advaes ya, yumi kasem plante bigfala blesing long laef blong yumi naoia. Mo tu, ‘i olsem we yumi stap putumgud plante gudgudfala samting blong yumi, we i olsem fandesen blong laef blong yumi, we i save stap strong oltaem. Nao bambae yumi save kasem laef ya we i prapa wan.’—1 Tim. 6:18, 19.