Halpem Ol Narafala Blong Ona Long Man We i Wokem Yumi
1 ?Yu yu harem sem mak olsem man blong raetem Ol Sam taem hem i talem se: “Hae God, . . . yu yu stampa blong laef blong olgeta samting”? (Sam 36: 5, 9) ?Olsem wanem yumi save givhan long ol narafala blong laekem mo givim ona long Jeova olsem Man we i Wokem yumi? Yumi save seremaot buk ya Yu Save Laef Foreva Long Paradaes Long Wol long Jun. Buk ya i rili nambawan from we hem i givim strong pruf se God i stap. Mo tu, hem i mekem se ol man oli save trastem Baebol se i Tok blong God. Yes i tru tumas, yumi wantem evriwan blong save olsem wanem ol samting we God i wokem mo Baebol oli givim ona long Jeova God.
2 Hemia wan isi rod blong storeyan.
Afta we yu talem halo long man blong haos, soem pija long pej 69, mo askem se:
◼ “?Olsem wanem laef i stat long wol ya? Samfala oli talem se i wan akseden nomo. Baebol i talem se God nao i wokem. ?Wanem tingting blong yu? [Wet long ansa.] Japta ya i givim ansa we i laenapgud wetem Baebol mo sam stret poen long saed blong sayens. Antap moa, buk ya i givim hop blong wan fyuja we i gud moa; mi glad sipos yu karem wan buk olsem blong 350 VT, blong bambae yu save luk bakegen ol pruf mo mekem disisen yu wan.”
3 Afta we yu talem nem blong yu, yu save talem se:
◼ “Long wol ya we save long saed blong sayens i kam antap, ?yu ting se i stret blong man i bilif se God i wokem olgeta samting, no yu ting se yumi stap long ples ya from laki nomo? [Wet long ansa.] Makem wanem Baebol i talem long bisnes ya. [Ridim Hibrus 3:4.] ?Yu yu agri se olgeta haos i gat wan man i wokem? Ale, ?wol ya i save kamaot hem wan nomo?” Soem pija we i stap long pej 34-35 long Laef Foreva buk, mo pulum tingting long poen we i stap long paragraf 4 long pej 35. Glad blong askem man blong karem buk long stret praes blong hem, mo talem long hem se nekis taem yu kambak bambae yu tokbaot kwestin ya, ?Wanem fyuja blong man mo wol ya?
4 No afta we yu talem halo long man blong haos, yu save talem se:
◼ “?Yu ting se Baebol i rili kamaot long God? [Wet long ansa.] ?Olsem wanem oli bin raetem Baebol? [Openem i go long pej 47 blong Laef Foreva buk.] Makem wanem Baebol i talem long 2 Timote 3:16. [Ridim.] Nao, ?olsem wanem Baebol i save kamaot long God taem ol man oli bin raetem? Pulum tingting i go long smol stampa tok aninit long pija long pej 49. Talem long man blong haos se hem i save kasem gudfala samting sipos hem i ridim buk ya mo kasem ansa blong kwestin ya.
5 Wan narafala fastok hem i blong soem nomo Laef Foreva buk mo talem se:
◼ “Tede mifala i stap askem long ol man raonabaot long mifala se, ?Yumi save laef Foreva long Paradaes long wol? ?Wanem tingting blong yu? [Wet long ansa.] Nating se ol sayentis oli kasem save longtaem finis se bodi blong man i gat paoa blong mekem hem wan i kam nyuwan bakegen, yumi mas akseptem se yumi evriwan yumi stap ded. Makem wanem buk ya i talem long bisnes ya. [Soemaot ol poen long paragraf 4 long pej 7.] Yumi wanwan i mas jekem ol pruf blong luksave sipos ol man oli save gat wan fyuja we i gud moa.” Nao askem man blong karem buk long stret praes blong hem, mo stanemap wan kwestin we bambae yu save ansa long hem long nekis visit blong yu.
6 ?Yu yu wantem tumas blong givhan long ol narafala blong kasem save long ol nambawan trutok long saed blong Man we i Wokem yumi mo lav blong hem from stampa tingting we hem i gat long ol man? Laef Foreva buk i save halpem yu blong mekem samting ya. I givim ona long Bigfala Man we i Wokem yumi, Hae Masta Jeova, taem buk ya i talemaot ol wok blong hem, mo i mekem ol man oli save long nambawan stampa tingting blong hem blong mekem nem blong hem i tabu mo blong blesem ol man tru long Kingdom blong Kraes.