Bildimap Bilif Long Man We i Wokem Ol Man
1 Bighaf blong ol man oli gat wan tingting blong olgeta olsem wanem laef i stat. Sore blong talem, plante oli lusum bilif long Man we i Wokem olgeta samting. Laef Foreva buk i save bildimap fasin blong trastem ol tijing blong Baebol. ?Olsem wanem yumi save halpem ol man we hat blong olgeta i stret we oli bin soemaot se oli rere blong lesin? Yumi mekem visit bakegen. Taem yumi gobak, oltaem i gud blong gat wan stret samting long tingting blong yumi blong talem, we bambae i bildimap bilif long Jeova olsem Man we i Wokem yumi.
2 Sipos man ya i bin soem se hem i bilif long Baebol, maet fastok olsem i gud blong statem storeyan blong yu:
◼ “Aesea 45:18 i talem wan tok we i gat paoa long saed blong stat blong wol; mi wantem save wanem tingting blong yu long samting ya. [Ridim mo wet long ansa.] Jeova i talem se hem nao i Man we i Wokem heven mo wol. ?Olsem wanem long laef long wol ya? Aesea 42:5 i leftemap Hem from samting ya tu. [Ridim.] ?Yu yu harem se yu save trastem Baebol?” Lukluk long japta 7 blong Laef Foreva buk, mo soemaot sam moa risen blong bilif long Jeova olsem Man we i Wokem olgeta samting.
3 Yu save statem storeyan blong yu wetem wan samting olsem se:
◼ “Long las visit blong mi, mi stanemap kwestin ya se, ?Wanem fyuja blong ol man mo wol ya? Makem olsem wanem buk we mi bin livim wetem yu i ansa long kwestin ya.” Openem i go long pej 156-158 blong Laef Foreva buk mo leftemap tingting blong hem blong ridim ol smol tok we oli stap antap no aninit long ol pija. Sipos hem i soem moa intres, maet yu save askem se: “?Wanem ol bigfala jenis we yu ting se bambae oli kamaot long wol ya?” Sipos i stret, yu save tokbaot poen ya long taem ya no long nekis visit blong yu, taem yu gohed long ol narafala paragraf long sem japta ya blong Laef Foreva buk.
4 Sipos man blong haos i soem se hem i intres long skul, yu save askem se:
◼ “?Yu yu bin makem samting we plante man tede oli leftemap, hemia samting we i no olsem wan prapa man we oli kolem Mama blong ol samting raonabaot long yumi? [Wet long ansa.] Baebol i no livim yumi long tudak long saed blong trufala Man we i Wokem olgeta samting.” Ridim Revelesen 4:11. Afta we yu ridim vas ya, man blong haos i save talem tingting blong hem. Nao yu save pulum tingting i go long wan no tu stret poen long japta 1 blong Laef Foreva buk mo maet yu soemaot stampa tingting blong Man we i Wokem olgeta samting, blong mekem ful wol i kam wan paradaes aninit long Kingdom blong Kraes.
5 Wan narafala rod blong statem visit blong yu bakegen i blong talem se:
◼ “Ol man oli harem nogud long ol trabol soa mo sore we oli kamaot from nogud mo rabis fasin. Jeova, Man we i Wokem wol ya, i bin promes se ol samting ya bambae oli finis. [Openem i go long pej 161 mo ridim Revelesen 7: 9, 16.] Olgeta we oli luksave hem olsem Man we i Wokem olgeta, nao oli mekem wok blong hem, oli save tingbaot blong kasem plante gudfala blesing from.” Sipos i stret long taem ya, gohed blong storeyan long Revelesen 21:3, 4 long pej 162.
6 Ol pablisa we oli gat ekspiryens, oli save se i moa gud blong putum wan stret taem blong mekem ol visit bakegen. Taem yumi mekem stret plan blong mekem wok ya, bambae i halpem yumi blong gobak kwiktaem long ol man we oli intres. Tingbaot wanem taem nao i moagud long yu mo long ol man we oli stap laef long teritori blong yu. Taem yu joen oltaem long wok ya, bambae yu faenem se yu kasem glad from yu stap folem oda ya blong ‘mekem disaepol.’—Mat. 28:19, 20.