Fasin Tangkyu From Ol Samting We Yumi Gat
1 “God i laekem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” (Rom 5:8) !Yumi evriwan i mas gat bigfala fasin tangkyu long Jeova God mo long Pikinini blong Hem, from nambawan sakrifaes we tufala i mekem blong givhan long yumi! From blad blong Jisas we i ron, yumi gat jans blong kasem laef blong olwe. I no gat wan man we i save givim samting ya long yumi.
2 ?Olsem wanem yumi save soem se yumi gat fasin tangkyu? I gat plante man we oli wantem tumas blong kasem trufala save. Save ya i stap long Tabu Tok blong God nomo. Wil blong Jeova se ol man ya oli kasem save long trutok. (1 Tim. 2:4) Yumi soem fasin tangkyu blong yumi long trutok taem yumi stap ‘talemaot gud nyus blong Kingdom blong God.’ (Luk 4:43) Taem yumi joen long wok ya wetem ful hat blong yumi, yumi soem se yumi glad we Jisas i ded blong yumi. Mo tu, yumi soem se yumi wantem biaenem hem, taem yumi folemgud oda we hem i givim blong mekem ol narafala oli kam disaepol.—Mat. 28:19, 20.
3 ?Wanem ol rod blong prij we oli open long yumi? ?Yumi save joen long wok blong haftaem paenia samtaem? Ating samfala oli save mekem wok blong fultaem paenia, afta we oli skelemgud evri samting. Taem yumi yusumgud ol nambawan jans ya, yumi save mekem taem we yumi spenem blong talemaot gud nyus blong Kingdom, i go antap. Maet bifo yu bin tingbaot blong joen long wok ya, be i gat sam samting we oli blokem yu. Ating ol samting long laef blong yu oli jenis nao. Sipos i olsem, ?yu yu bin tingtinggud blong joen long wok blong paenia no blong mekem wok olsem wan haftaem paenia?
4 Fasin tangkyu blong yumi i kam moa strong, taem yumi luk ol samting we oli stap kamaot raonabaot long yumi. I gat raf fasin we i stap go antap, fasin blong no laekem nating narafala, mo faet raonabaot long wol. Tok blong Pol i stret long saed blong taem blong yumi se, ‘i raf bitim mak’ mo ‘i strong tumas long ol man.’ (2 Tim. 3:1) Long medel blong ol samting ya we i mekem man i harem nogud, yumi gat plante gud nyus blong serem wetem ol narafala. Yumi gat tu nambawan magasin ya, Wajtaoa mo Wekap! Yumi gat ol buklet tu we oli tokbaot plante defren samting. Long manis ya, bambae yumi seremaot Laef Foreva mo Trutok buk. Ol buk ya oli rili save mekem ol man we i ridim olgeta, oli haremgud. Sipos yumi gat fasin tangkyu from ol samting we yumi gat, hem i mas pusum yumi blong glad blong serem ol samting ya wetem ol narafala.—Hib. 13:16.
5 Maet long ples we yu stap laef long hem, ol man oli soem smol intres nomo long ol samting long saed blong speret. Long sam narafala ples i defren, ale oli karem fulap frut. Plante taem ol man we oli kam long narafala kantri, oli soem intres. Sipos yu save toktok lanwis blong olgeta, ?ating yu save halpem olgeta? Maet seket elda blong yufala i save givhan long yu blong save moa long saed ya.
6 Yumi gat plante risen blong soem fasin tangkyu from ol samting we yumi gat, yes fulap gudfala samting we yumi gat. Nambawan rod blong soem fasin tangkyu long Jeova, hemia blong yumi talemaot nem mo ol tingting blong hem long ol narafala.—Aes. 12:4, 5.