Talem Tangkiu Long Jeova
1 Nating se yumi stap long wan taem we ‘laef i strong tumas,’ i gat plante samting yet we yumi save talem tangkiu long Jeova from. (2 Tim. 3:1) Samting we i bigwan olgeta, hemia sas presen we hem i givim taem i letem Pikinini blong hem i ded blong pemaot yumi. (Jon 3:16) Wan narafala samting, hemia se yumi gat fulap kakae long saed blong spirit, be ol man long ol giaman skul oli stap hanggri gud long saed blong spirit. (Aes. 65:13) Mo tu, yumi stap insaed long wan bigfala kampani blong ol brata sista long fulwol, mo yumi gat janis blong joen long wok we i mekem trufala wosip i gru. (Aes. 2:3, 4; 60:4-10, 22) ?Olsem wanem yumi save talem tangkiu long Jeova from ol blesing we hem i givim long yumi?—Kol. 3:15, 17.
2 Glad Blong Wok Wetem Fulhat: Aposol Pol i tokbaot fasin blong givim samting long narafala, i se: “God i lavem man we i save givim samting long gladhat blong hem.” (2 Kor. 9:7) Tok ya i stret long wok we yumi mekem i go long God tu. Yumi talem tangkiu taem yumi soem se yumi hapi blong holem trutok, taem yumi glad long ol Kristin miting, taem yumi smat long wok blong prij, mo taem yumi wok wetem glad blong mekem samting we God i wantem.—Sam 107:21, 22; 119:14; 122:1; Rom 12:8, 11.
3 Long saed blong sam presen we ol man Isrel oli mas givim long God, Loa i no makemaot stret hamas samting oli mas givim. Taem wanwan man blong wosip oli soem tangkiu long God, fasin blong olgeta blong givim presen bambae i ‘folem fasin we Hae God i stap blesem olgeta.’ (Dut. 16:16, 17) Sem mak tede, sipos yumi gat tangkiu long hat blong yumi, samting ya bambae i pusum yumi blong mekem bes blong yumi long wok blong talemaot Kingdom mo wok blong mekem ol man oli kam disaepol. Samfala oli tekem janis blong prij moa taem oli spel long skul no wok, mo long ol manis we ples i kolkol lelebet. Maet oli joen long wok blong haftaem paenia. ?Olsem wanem long yu? ?Yu tu yu save mekem moa wok?
4 Talem Tangkiu Oltaem: Wan bigfala rod blong talem tangkiu long Jeova, hemia tru long prea. (1 Tes. 5:17, 18) Baebol i talem se “oltaem, yufala i mas talem tangkiu long hem.” (Kol. 2:7) Nating se yumi bisi no yumi stap wari from wan samting, be yumi mas tektaem evri dei blong prea long Jeova mo talem tangkiu long hem. (Fil. 4:6) Yes, long wok blong prij mo long ol prea blong yumi, ‘haremgud mo talem tangkiu long God.’—2 Kor. 9:12.