Folem Man We i Soemaot Rod Long Yumi Olsem Ol Man Blong Karem Laet
1 Jisas i talem long saed blong hem wan se: “Mi ya mi laet blong ol man long wol.” Taem ol disaepol blong Jisas oli folem eksampel blong hem, olgeta tu oli olsem “laet long ol man long wol.” (Mat. 5:14) From we Jisas i olsem “laet long ol man long wol,” hem i save talem se ol man we oli folem hem oli holem “laet blong laef.” (Jon 8:12) Hemia i min se yumi ya, yumi olsem ol man blong karem laet long saed blong speret. Mo neva yumi mas letem wan samting i haedem no blokem laet ya.
2 Ogenaesesen blong Jeova i trenem yumi olsem wanem blong mekemgud wok ya blong karem laet. Sipos yumi folemgud ol advaes mo toktok we yumi kasem, bambae yumi save givim laet long saed blong trutok blong Kingdom, long olkaen man. (1 Tim. 4:6) Blong stap olsem ol man blong karem laet, yumi mas yusum evri jans we yumi gat blong tokbaot trutok. Be tu, yumi mas mekem ol gudfala fasin olsem ol Kristin. Man we i olsem eksampel blong yumi, i soemaot ol fasin we oli rili givim ona long God. Yumi we yumi folem hem, yumi mas soemaot sem Kristin fasin ya long evridei laef blong yumi. (Efes. 5:9; Taet. 2:7, 8, 10) Yumi mas mekem ol gudfala wok we ol narafala oli save luk, mo samting ya i save pusum olgeta blong presem God.—Mat. 5:16.
3 Wan man blong haos i askem wan narakaen kwestin long wan Wetnes we i stap prij long ol haos wanwan. Man ya wetem waef blong hem tufala i sik, be tufala i mas putum sam mane long bang. Tufala i askem long Wetnes sipos hem i save mekem samting ya blong tufala. !Hem i agri, ale tufala i givim 200,000 vatu long hem blong tekem i go long bang! Taem hem i kambak, hem i askem long man ya se: “?Olsem wanem yu save trastem mi, taem yu no save mi nating?” Man ya i ansa se: “Mitufala i save, mo evriwan i save, se ol Wetnes blong Jeova nomo yu save trastem.” !Yumi glad tumas we fasin blong yumi blong folemgud ol stret fasin blong Baebol, i givim wan gudnem long yumi we i givim ona long God!
4 Wan tija blong klas wan, i eksplenem long klas blong hem from wanem wan studen we i gat 6 yia mo i wan Wetnes, i no stap kalarem ol pija blong Halowin olsem ol narafala studen. Tija i talem se hem i glad tumas long smol gel ya, from we hem i no fraet blong mekem samting we i defren long ol narafala, from bilif blong hem. Tija i talem se, sipos yumi rili bilif long wan samting, yumi no mas fraet blong stanap strong long bilif ya. Long sem naet, tija ya i skelemgud bilif blong hem, mo hem i luksave se hem i no gat fasin blong no fraet mo stanap strong long bilif blong hem, olsem smol gel ya. !Ale, long nekis dei, hem i talemaot long klas blong hem se, long fyuja, bambae oli no moa mekem ol holide lafet, from we hem tu i no bilif long sam long olgeta!
5 Ol man blong Jeova oli wantem tumas blong mekem laet blong olgeta i saenaot, nating se oli stap long weples. Nambawan fasin blong plante yangfala long skul, i bin mekem plante tija mo studen oli sapraes. Ol Wetnes we oli bigman tu, we oli soemaot ol gudfala fasin long ol man raonabaot, oli mekem se ol narafala oli toktokgud long saed blong mesej blong Kingdom. Fasin blong tekem evri jans blong prij long eni ples, i pulum plante man we hat blong olgeta i stret, blong wantem lanem moa. Mo tu, fasin blong yumi blong wok had mo mekem ol stret fasin long ples blong wok blong yumi, i save givim wan gudfala wetnes. Yes, nating se yumi stap weples mo yumi stap mekem wanem, yumi save wekemap intres blong man long trutok.
6 Taem yumi gohed blong luklukgud ol stret fasin long laef blong Man ya we i Bigfala Eksampel blong yumi, yumi save gohed blong kamgud moa olsem ol disaepol blong hem. Fasin blong folemgud eksampel blong hem, bambae i mekem se laet blong yumi “i saenaot i kasem ol man.”—Mat. 5:15; 1 Pita 2:21.