Jeova i Stap Givim Paoa
1 Jeova i givim wok long yumi, ol man blong hem, blong talemaot gud nyus. Long semtaem, yumi mas ‘mekem fasin blong yumi i stretgud long fes blong ol hiten man.’ (1 Pita 2:12; Mat. 24:14) From we laef i had mo yumi gat plante slak fasin, yumi no save mekem wok ya long paoa blong yumi nomo. (2 Tim. 3:1-5) !Yumi glad tumas we yumi save lukluk i go long Jeova blong kasem help!
2 Aposol Pol i stanap strong tru long plante traem. (2 Kor. 11:23-27) ?Olsem wanem hem i naf blong stanap strong mo finisim wok we God i givim long hem? Jeova i givim ‘paoa ya we i bigfala tumas i blong God, i no blong hem.’ (2 Kor. 4:7) Pol i save se God i stap halpem hem, from we hem i raetem se: ‘Mi save mekem evri samting, long paoa blong hemia we i stap mekem mi mi strong.’ (Fil. 4:13) Jeova bambae i halpem yumi long sem fasin. ?Olsem wanem yumi save kasem help ya?
3 Prea Oltaem Nomo: Jisas i talem long yumi blong ‘gohed blong askem, blong lukaot, mo blong kilkilim doa.’ Yumi no mas stop. (Luk 11:5-10) Taem yumi gohed blong prea oltaem, samting ya i soem long Jeova se ol filing blong wari blong yumi oli dip, yumi wantem tumas wan samting, mo se yumi rili tru long tingting blong yumi, yumi no stap gyaman. (Sam 55:17; 88:1, 13; Rom 1:9-11) Pol i luksave se i impoten blong gohed oltaem blong prea, taem hem i talem long yumi se: “Oltaem yufala i mas stap prea.” (1 Tes. 5:17) Prea i wan bigfala rod blong kasem help blong Jeova.
4 Folem Rod We Tiokratik Oda i Soemaot: “Tiokratik” i minim “God i rul.” Mo God, hem i lav. Rul blong hem i stap givhan long yumi, taem yumi agri se hem i gat raet blong rul long yumi, mo taem yumi folem ol advaes blong hem long ol bigfala disisen mo ol smol disisen blong yumi. God i yusum ‘slef we i stret mo waes’ blong rul long tiokratik fasin long wol ya. (Mat. 24:45-47) I impoten we yumi wokgud wetem ogenaesesen we ‘slef ya’ i stap yusum, sipos yumi wantem kasem blesing blong Jeova. (Ridim Hibrus 13:17.) Bambae Jeova i givim presen long yumi from fasin blong yumi blong stap tru long hem, mo fasin blong glad blong obei long ol loa blong hem. Presen ya, hemia paoa we hem i givim long stret taem we yumi nidim.—Hib. 4:16.
5 Stap Joengud Wetem Ol Brata Sista: Lav nao i makemaot ol disaepol blong Jisas. (Jon 13:34, 35) Prapa fasin blong yumi evriwan i no sem mak. Taswe, trabol i save kamaot bitwin samfala from we prapa tingting blong olgeta long wan bisnes i no sem mak. Yumi mas gat kaen fasin wetem fasin sore, mo glad blong fogivim narafala. (Efes. 4:32) Samting ya bambae i mekem se oltaem yumi save joengud wetem ol brata sista long saed blong bilif, mo kasem paoa from fasin blong olgeta blong stanap strong longtaem tru long ol traem we oli kasem. Yumi save se ‘long evri ples long wol, ol brata blong yumi oli stap kasem trabol, stret olsem we yumi stap kasem.’ Samting ya i givim paoa long yumi we i kamaot long God, blong winim ol semkaen trabol ya.—1 Pita 5:9.
6 Holem Wan Gudfala Program Blong Stadi Yu Wan: Taem yumi kasem paoa long saed blong speret long tingting mo hat blong yumi, yumi naf blong faetem mo winim Setan. (1 Pita 5:8) Wan gudfala program blong stadi yu wan bambae i mekem saplae blong save blong God we yu yu gat, i kam antap. Yumi save yusum save ya evri dei, taem yumi kasem ol traem. Pol i talem klia se ‘stret save’ i impoten blong halpem yumi blong kasem laef. (1 Tim. 2:3, 4) I impoten blong tekem kakae long saed blong speret oltaem.
7 Olgeta samting we yumi nidim blong stap strong, oli stap rere blong yumi kasem, tru long Kristin kongregesen. Sipos yumi sapotem ol wok blong hem wetem fulhat blong yumi, bambae yumi sua blong ‘wokbaot we yumi no kam taed.’—Aes. 40:29-31.