Leftemap Tingting Blong Ol Narafala
1 From we yumi stap long wol ya we ‘laef i strong tumas,’ yumi evriwan i nidim ol tok blong leftemap tingting blong yumi. (2 Tim. 3:1) Pol i nidim samting ya long taem blong hem tu, taswe hem i wantem joen wetem ol brata blong hem, olsem wan jans, blong ‘bilif blong olgeta i givhan long hem, mo bilif blong hem i givhan long olgeta.’ Hem i talem long ol brata blong hem blong ‘strong blong folem ol fasin we i save givhan long olgeta, blong leftemap olgeta.’ (Rom 1:11, 12; 14:19) Ol fasin traehad ya, oli ‘mekem tingting blong ol disaepol i strong moa, i mekem olgeta oli stanap strong long fasin blong bilif.’ (Wok 14:22) Yumi nidim tumas ol tok olsem tede.
2 Yumi save leftemap tingting blong ol narafala wetem ol tok blong yumi. Taem yumi toktokgud, ol tok blong yumi oli save kam olsem “ol gol apol long wan plet selva.” (Prov. 25:11) Taem yumi givim ansa long ol miting, yumi ‘mekem tingting blong narafala i kam strong moa.’ (Hib. 10:25) Yumi save yusum tang blong yumi long gudfala fasin blong serem ol ekspiryens, leftemap narafala, mo blong tokbaot ol samting long saed blong speret. Gudfala fasin ya blong yusum tang, ‘i save mekem ol man we oli slak oli kam strong moa, mo i save givhan moa long ol man we oli harem.’—Efes. 4:29.
3 Tokbaot Ol Samting We Oli Leftemap Tingting: Long Filipae 4:8, Pol i givim ol gudfala advaes long saed blong toktok blong yumi. Hem i talem se yumi mas tokbaot ol samting we oli tru, oli hae, oli stret, oli klingud, oli mekem yumi haremgud, ol man oli stap ona long olgeta, oli stretgud, mo yumi presem olgeta. Sipos ol toktok blong yumi oli stanap long Tok blong God, yumi save sua oltaem se bambae i tru mo i givhan long ol narafala. (Jon 17:17) Kristin fasin ya we yumi givim laef blong yumi long Jeova, ol samting we yumi lanem long ol miting blong kongregesen, fasin blong yumi blong mekemgud ol minista wok blong yumi, mo ol narafala samting olsem, oli ol samting we oli hae. Ol gudfala storeyan long saed blong ol hae mak mo rul long Tok blong God, bambae oli mekem yumi ‘waes mo lidim yumi long rod ya we God i stap yusum blong sevem man.’ (2 Tim. 3:15) Yumi save talem ol gudfala toktok blong soem tangkyu from klin fasin we olgeta insaed long ogenaesesen blong Jeova oli folem. Yumi save leftemap ol fasin kaen we ol brata blong yumi oli mekem from lav. (Jon 13:34, 35) Ol fasin we ol man oli stap ona long olgeta i minim ol gudfala Kristin fasin, olsem bilif, glad, pis, mo longfala tingting, we yumi luk long ol brata blong yumi. Ol storeyan long ol samting olsem, we oli stretgud mo yumi save presem olgeta, oli ‘mekem i gud long ol narafala, oli mekem olgeta oli strong moa long fasin blong bilif.’—Rom 15:2.
4 Evri dei long wol ya, yumi stap fesem ol wari we oli mekem tingting blong yumi i foldaon. !Yumi haremgud tumas taem yumi save sakem ol wari ya mo joen wetem ol brata blong yumi we oli gat lav! Nambawan taem we yumi save spenem tugeta, i wan sas samting blong tinghae tumas long hem. Sipos oltaem yumi leftemap tingting blong narafala mo mekem hem i strong moa, hem i save talem tru long saed blong yumi se: ‘Hem i mekem tingting blong mi i stap kwaet.’—1 Kor. 16:18.