Kristin Fasin Long Skul
1 Sipos yu yu wan yangfala Kristin we yu stap skul yet, yu nidim strong bilif blong stap tru long Jeova oltaem. Yu yu stap long medel blong ol rabis kampani, mo oltaem yu fesem ol samting we oli traem bilif blong yu. I impoten we yu folem advaes blong Pita blong ‘mekem fasin blong yu i stretgud long fes blong olgeta, blong bambae oli save leftemap nem blong God from ol gudfala wok blong yu.’ (1 Pita 2:12) Blong winim traem ya, yu nidim fasin blong no fraet mo strong tingting.
2 Long skul mo afsaed long skul, yu luk ol rabis fasin we oli save spolem ol gudfala fasin blong yu, olsem, boe mo gel i slip tugeta bifo mared, ol tok swea, smok tabak, mo tekem drag. Evri dei, yu kasem ol traem we oli save spolem gudnem we yu gat from gudfala fasin blong yu. Olsem ol bigman, yu tu yu mas ‘faet strong blong holem trutok ya we yu bilif long hem finis,’ sipos yu wantem winim ol traem ya.—Jud 3; lukluk Wajtaoa, (Engglis), Julae 15, 1991, pej 23-26.
3 Long skul, i gat ol seremoni blong leftemap kantri mo ol holide blong wol. ?Yu yu save ol holide blong kantri mo jyos we skul blong yu i stap kipim? Sipos wan traem i kamaot, ?yu yu naf blong ‘mekem ol stret fasin we tingting blong yu i no save jajem yu from, blong olgeta we oli tok nogud long yu se ol fasin blong yu oli no stret, bambae oli sem’?—1 Pita 3:16.
4 Maet ol spot no ol lafet we ol fren blong yu long skul oli mekem, oli stap pulum yu. Yu mas wekapgud blong luksave olsem wanem ol pleplei ya we i luk olsem se oli gud nomo, oli save pulum yu blong lego bilif blong yu. Yu mas jusum ol fren we ‘bilif blong olgeta i save givhan long yu, olsem we bilif blong yu i save givhan long olgeta,’ nao fasin ya bambae i leftemap tingting blong yufala evriwan.—Rom 1:12.
5 Yu Save Stanap Strong Wetem Help Blong Jeova: Oltaem Setan i stap traem bilif blong yu. Ol traem we yu mas winim olgeta, maet oli strong. Be oli nating nomo taem yu tingbaot pei we yu save kasem. (1 Pita 1:6, 7) Yu no save stanap strong longtaem long prapa paoa blong yu. Yu mas lukluk i go long Jeova blong halpem yu. Jisas i talem long ol disaepol blong hem se: “Yufala i mas lukaot gud, yufala i mas prea, blong bambae ol samting blong traem yufala oli no mekem yufala i foldaon.” (Mat. 26:41) Fasin blong stretem yu wan mo bos long tingting blong yu, oli impoten tumas.—1 Kor. 9:27.
6 Oltaem yu mas tingbaot se yu mas talemaot long fes blong Jeova olgeta fasin we yu mekem. (Ekles. 11:9) Nating se ol narafala oli no luk ol samting we yu mekem, be Jeova i save, mo bambae hem i jajem yu from. (Hib. 4:13) Tingting blong rili wantem mekem God i glad i mas pusum yu blong ‘stap hadwok mo fraet long God, blong yu save finisim wok we hem i stap mekem blong sevem yu.’ (Fil. 2:12) Sipos yu ridim Tok blong God evri dei, bambae samting ya i givhan bigwan long yu. Insaed long hem, i gat nambawan advaes mo ol gudfala eksampel we yu save folem.—Hib. 12:1-3.
7 Ol papa mama, yufala i gat wan impoten wok. Yufala i mas stap jekemap ol pikinini blong yufala, savegud ol problem we oli stap fesem, mo givhan long olgeta taem oli nidim. ?Yu yu gat wan gudfala fasin fren wetem ol pikinini blong yu? ?Yu tijimgud olgeta blong oli kasem save long ol loa mo rul blong God mo oli gat tangkyu from? Taem ol pikinini blong yu oli fesem ol traem mo ol samting oli pulum olgeta, ?oli save stanap strong, no oli foldaon kwiktaem? ?Tingting blong olgeta i foldaon from we oli mas stap defren long ol narafala pikinini? From we yufala i papa mama blong olgeta, hem i wok blong yufala blong halpem olgeta. (Dut. 6:6, 7) Sipos yufala i mekemgud wok blong yufala, yufala i save givhan long olgeta blong winim faet blong stanap strong long bilif.—Prov. 22:6.