Presem Jeova Oltaem
1 I gat sam wok nomo we yumi nidim blong mekem olgeta oltaem, from we oli impoten tumas. Sam long olgeta, hemia kakae, pulum win, mo slip. Yumi nidim olgeta ya blong mekem se yumi stap strong long bodi. Aposol Pol i talem se wok blong talemaot gud nyus i sem mak long olgeta ya. Hem i se: “Oltaem yumi mas mekem wan sakrifaes long God, we i blong presem hem.” (Hib. 13:15, NW) Taswe, fasin blong presem Jeova i wan moa samting we yumi mas mekem oltaem. Yumi mas traem mekem evri dei, oltaem yumi mas presem Papa blong yumi long heven.
2 Taem sam man oli traem pulum Jisas blong mekem narafala samting, hem i talem se: ‘Mi mas talemaot gud nyus ya blong kingdom blong God.’ (Luk 4:43) Long tri yia haf we hem i prij, evri samting we hem i mekem evri dei i joen stret wetem fasin blong presem God. Yumi save se Pol i gat sem filing ya, from tok blong hem long 1 Korin 9:16: “Sipos mi no moa talemaot gud nyus ya, hemia bigfala trabol blong mi ya.” Ol narafala Kristin we oli gat strong bilif, oli kasem tok blong pulum olgeta blong rere oltaem blong givim risen long ol narafala from wanem oli gat strong hop olsem. (1 Pita 3:15) Tede, plante handred taosen paenia we oli stap wok strong, mo plante milyan pablisa long ol kongregesen, oli stap traehad blong folem ol gudfala eksampel ya.
3 Taem yumi tingbaot Eksampel blong yumi, Jisas Kraes, we hem i wok strong wetem fulhat blong hem, samting ya i mas pulum yumi blong folemgud ol trak blong leg blong hem. (1 Pita 2:21) Samtaem, maet tingting blong yumi i foldaon taem yumi kasem ol trabol evri dei long laef. Taem yumi wok fultaem blong kasem mane, ?olsem wanem yumi save tekem jans evri dei blong presem Jeova? Mo tu, yumi no save sakem ol wok blong yumi insaed long famle, we i tekem plante taem blong yumi. Bighaf blong ol yangfala oli bisi long skul evri dei, hemia samting we oli mas mekem. Maet samfala oli ting se i no gat rod blong presem Jeova long fored blong ol man evri dei. Samtaem, samfala i save mestem wan ful manis we oli no talemaot gud nyus nating.
4 Jeremaea i wan we i no save stop blong talemaot gud nyus. Taem hem i stop blong smoltaem nomo blong tokbaot nem blong Jeova, hem i harem se wan bigfala faea i stap bon insaed long hem. (Jer. 20:9) Nating se Jeremaea i fesem ol trabol we oli bigwan bitim mak, be oltaem hem i faenem rod blong talemaot mesej blong Jeova long ol narafala. ?Yumi save folem eksampel blong strong tingting we hem i soemaot, mo gohed blong lukaotem ol jans evri dei blong presem Man we i Wokem Yumi?
5 Taem yumi mekem plan mo go prij long wan stret taem wetem ol narafala pablisa long kongregesen, yumi tokbaot Jeova. Be i no long taem ya nomo we yumi save mekem olsem. Yumi nidim nomo blong faenem ol man we oli rere blong lesin. Yumi mitim ol man evri dei—taem oli kam long haos blong yumi, yumi wok wetem olgeta, yumi stanap long laen wetem olgeta long stoa, mo yumi sidaon kolosap long olgeta long bas. Blong statem wan storeyan, yumi nidim nomo blong talem halo wetem smael mo askem wan kwestin no talem wan samting we i pulum tingting blong olgeta. Plante oli faenem se rod ya blong prij i karem moa frut bitim ol narafala rod we oli yusum. Taem yumi gat plante jans blong toktok wetem ol narafala long saed blong gud nyus, yumi no save tingbaot blong mestem wan ful manis we yumi no wetnes long saed blong Kingdom.
6 Jans we yumi gat blong presem Jeova bambae i no save finis samtaem. Olsem man blong raetem Sam i talem, evri samting we i stap pulum win i mas presem Jeova, mo tru ya, yumi wantem stap wetem olgeta ya. (Sam 150:6) Sipos hat blong yumi i pusum yumi blong mekem samting ya olwe, evri dei bambae yumi yusum olgeta jans we yumi kasem blong tokbaot Jeova mo Tok blong Hem.