Putum Kingdom Blong God Long Fasples—Givim Sakrifaes Oltaem Blong Presem God
1 Olgeta we oli putum Kingdom long fasples long laef blong olgeta, oli rere oltaem blong tokbaot Jeova mo Kingdom blong Hem. (Sam 145:11-13) Evri dei i gat ol jans blong presem nem blong Hem mo talemaot gud nyus. (Sam 96:2) Man blong raetem Ol Sam i haremgud tumas blong presem Jeova, mo hem i talem se: “Bambae mifala i stap presem yu olwe nomo. Bambae mifala i stap talem tangkyu long yu oltaem, gogo i no save finis.” (Sam 44:8) Sipos yumi gat sem filing ya, bambae yumi strong blong joen oltaem long wok blong talemaot Kingdom.
2 Jeova i no stanemap sam stret rul long saed blong hamas taem yumi mas spenem long wok blong prij, be hem i leftemap tingting blong yumi blong presem hem “oltaem.” (Hib. 13:15) Sipos ol samting long laef blong yumi wanwan i letem yumi, yumi mas putum olsem wan mak blong yumi blong spenem sam taem blong presem Jeova evri wik. Olgeta we oli stap mekem olsem finis, maet oli save jenisim program blong olgeta blong joen long wok blong haftaem paenia samtaem no oltaem. Samfala we oli stap haremgud long wok blong haftaem paenia, maet oli save joen long wok blong fultaem paenia.
3 Nating se laef blong yumi i olsem wanem, ?yumi wanwan i save faenem wan rod blong mekem moa blong presem Jeova? Fasin tangkyu i pusum man blong wok strong. Stadi wanwan long Tok blong God i wokem fasin tangkyu. Ol miting blong kongregesen oli pusum yumi blong soemaot fasin tangkyu ya long ol samting we yumi mekem. Fasin joen oltaem wetem ol narafala we oli wok strong blong presem Jeova i save ‘pusum yumi blong mekem ol gudfala fasin.’ (Hib. 10:24) Sipos yumi joen fulwan long ol samting we kongregesen i mekem blong givhan long yumi, maet yumi save givim moa long sakrifaes blong yumi blong presem God.
4 Woman profet ya Ana i bin soem gudfala eksampel long wok blong Jeova. Nating se hem i gat 84 yia, “oltaem nomo, hem i stap long haos blong God, nao long moning mo long sapa, hem i stap joen long olgeta blong mekem wosip.” (Luk 2:37) Fasin blong givim hem fulwan long wok blong kongregesen i givim bigfala glad long hem. Store blong wok we hem i mekem wetem strong bilif long Baebol i leftemap tingting blong yumi tede.
5 Pol i talem se, ‘olgeta we oli strong long fasin ya blong bilif, oli mas givhangud long olgeta we bilif blong olgeta i no strong.’ (Rom 15:1) Ating i gat samfala long kongregesen blong yu we oli save haremgud long help mo fasin blong leftemap tingting we yu yu save givim. Maet oli nidim nomo blong yu invaetem olgeta blong joen wetem yu long wok blong prij. Maet wan pablisa i nidim transpot no wan blong wok wetem hem. Maet tingting blong narafala i foldaon, mo yu nao yu save leftemap tingting blong hem mo sapotem hem olsem we hem i nidim blong wok strong bakegen long wok blong Kingdom. (1 Tes. 5:14) Fasin blong yu blong ‘serem ol samting blong yu wetem ol narafala Kristin we oli gat nid’ i soem se wetem hat blong yu, yu wantem mekem moa blong presem nem blong Jeova.—Rom 12:13.
6 Yumi no save kaontem olgeta samting we Jeova i mekem finis mo bambae i mekem yet blong yumi. I no gat rod blong yumi save pembak Hem from ol blesing ya. !Yes, i gat plante bigfala risen blong ‘olgeta samting we oli laef oli presem Jeova’!—Sam 150:6.