Holem Promes Blong Yumi Evri Dei
1 Hat blong Deved i pusum hem blong talem long Jeova long wan Sam, se: “Evri dei, bambae mi stap givim ol samting ya long yu we mi promes blong givim, mo oltaem, bambae mi sing blong presem yu.” (Sam 61:8) Deved i save se hem wan i jusum blong mekem promes ya, i no gat wan man i fosem hem. Be, hem i luksave tu se, sipos hem i mekem wan promes, hem i mas holem promes ya. Antap long samting ya, hem i presem Jeova from jans we hem i gat blong holem promes blong hem evri dei.
2 Taem yumi givim laef blong yumi long Jeova, yumi promes blong mekem ol samting we hem i wantem. Yumi lego ol samting we yumi wantem, mo yumi mekem wok blong Jeova i kam nambawan samting long laef blong yumi. (Luk 9:23) Taswe, yumi tu, yumi mas holem promes blong yumi evri dei. (Ekles. 5:4-6) Yumi mas soemaot klia long olgeta haf blong laef blong yumi, mining blong tok ya we yumi bin talem long fored blong plante man, taem yumi tekem baptaes, from we yumi save se ‘wetem maot, yumi stap talemaot tok we bambae i sevem yumi.’ (Rom 10:10) Hemia i minim tu, wok blong talemaot gud nyus. (Hib. 13:15) Laef blong yumi evriwan i no sem mak. Be evri dei, yumi wanwan i save soem se wok ya blong talemaot gud nyus i impoten tumas.
3 Faenem Ol Jans Blong Prij Evri Dei: Taem yumi serem gud nyus wetem wan man, yumi kasem glad. Blong mekem samting ya evri dei, yumi mas traem faenem ol jans blong prij taem yumi naf. Olgeta we oli tekem jans blong givim wetnes long ol man we oli wok wetem olgeta, ol pikinini long skul, ol man we oli stap raonabaot long olgeta, mo ol narafala we oli mitim olgeta evri dei, oli kasem plante gudfala frut. Yumi save raetem leta mo tok long telefon tu, blong givim wetnes long ol narafala. Sipos yumi yusum olgeta rod ya, wetem wok blong prij long evri haos wanwan, mo ol visit bakegen, yumi save kasem wan spesel glad taem yumi statem wan Baebol stadi. Yes, ating evri dei yumi save faenem sam jans blong prij.
4 Taem wan sista i spel blong kakae long ples blong wok, hem i stap ridim buk ya Ridimgud Ol Tok Blong Baebol Evri Dei. Hem i singaot wan narafala woman we i wok wetem hem blong ridim vas blong dei wetem hem. I no longtaem, hem i statem wan Baebol stadi wetem woman ya. Tufala i stadi blong haf haoa evri dei, faef dei long wan wik. Wan narafala man we i wok wetem sista ya i luk we tufala i stap stadi evri dei. Biaen, hem i talemaot se hem i wan brata we i no moa prij. Hem i sapraes long fasin blong sista ya blong wantem tumas blong serem trutok, mo samting ya i pusum hem blong go luk wan elda, mo askem help blong joen bakegen long wok blong prij. Sista ya i jenisim laef blong tufala ya long wan nambawan fasin, from we hem i holem promes blong hem evri dei.
5 Taem hat blong yumi i fulap long tangkyu long Jeova from ol gudfala samting we hem i mekem long yumi, nao i stap pusum yumi blong mekem wok blong hem, bambae yumi kasem glad mo yumi haremgud blong mekem bes blong yumi evri dei, blong holem promes we yumi bin mekem taem yumi givim laef blong yumi i go long Jeova. Olsem man blong raetem Ol Sam, bambae yumi save talem se: “God, yu yu Masta blong mi. Bambae mi stap presem yu long olgeta tingting blong mi, bambae mi stap leftemap hae nem blong yu oltaem, gogo i no save finis.”—Sam 86:12.