?Hu Ya i Naf Blong Prij?
1 Long saed blong wok blong prij, ?yu bin gat sem filing olsem Moses? Hem i talem se: ‘Jeova, plis yu no sanem mi. Mi mi no man blong mekem gudfala toktok, mo yu yu kam toktok wetem mi be fasin blong mi long saed ya i no jenis yet. Taem mi traem talemaot tingting blong mi, mi no save toktokgud nating.’ (Eks. 4:10) Sipos yu yu gat sem filing ya, maet yu fraet blong prij. Be, Jisas ‘i talem long yumi, se yumi mas talemaot gud nyus long ol man.’ (Wok 10:42) Taswe, ?olsem wanem yumi kam naf blong talemaot gud nyus?
2 I no ol yia we yumi skul we i mekem se yumi naf blong prij. Pol i talem se “i no gat plante long yufala, we long fes blong ol man, yufala i waes man,” mo se “olgeta fasin we ol man blong wol oli stap talem se oli waes, be long fes blong God oli krangke nomo.” (1 Kor. 1:26; 3:19) Jisas i jusumaot ol aposol blong hem long ol man we oli no gat hae save—fo long olgeta oli man blong hukum fis. Ol lida blong skul we oli flas oli lukluk daon long ol man ya, olsem ol man we ‘oli no gat nem, mo oli no skulgud.’ Folem tingting blong ol man blong wol, ol aposol oli no naf blong prij. !Be, nambawan tok we Pita i givim long dei blong Pentekos i pusum 3,000 man blong tekem baptaes!—Wok 2:14, 37-41; 4:13.
3 Jeova i Mekem Yumi Naf Blong Prij: Pol i talem se: ‘Olgeta samting blong mekem mifala i naf blong wok, oli kamaot long God nomo.’ (2 Kor. 3:5) Jeova, Stampa blong fasin waes, i tijim plante milyan man blong talemaot trutok blong Kingdom long ol narafala. (Aes. 54:13) Samting we i pruvum se wok ya i gud mo i karem gudfala frut, hemia se i gat 338,491 we oli tekem baptaes las yia. Olgeta ya oli ‘olsem leta blong soemaot yumi, from we oli stap long tingting blong yumi, olsem wan leta we man i raetem finis.’ (2 Kor. 3:1-3) Yumi gat plante risen blong prij wetem strong tingting mo bilif long saed blong olgeta samting we Jeova i lanem yumi long hem.
4 Ogenaesesen blong Jeova i folem wan program long olgeta ples blong wol blong trenem ol man blong prij. Baebol mo plante buk we oli givhan long yumi blong stadi Baebol, oli tijim mo trenem yumi blong kam ‘waes long olgeta samting, mo blong gat evri samting blong mekem’ wok blong prij. (2 Tim. 3:16, 17) Plante man oli sapraes long ol gudfala save long ol buk blong Sosaeti. Eksampel, wan magasin long Swiden i talem se: “Biaen long bilif we ol Wetnes blong Jeova oli stap talemaot, yumi sapraes long nambawan hae save long saed blong Baebol, we hem i stret long olgeta ples blong wol.”
5 Yumi kasem advaes long faef miting evri wik, yumi gat program blong ridim mo stadi long Baebol, yumi kasem advaes long Tiokratik Skul, mo ol narafala we oli bin prij plante yia finis oli givhan long yumi. Antap long ol samting ya, yumi gat tabu speret blong Jeova. Taswe, yumi save sua se Jeova i tingbaot yumi olsem we yumi nafgud blong prij. Yes, ‘yumi stap tok olsem man blong trutok nomo, we God i putumap yumi mo yumi stap yet long fes blong hem. Yumi joen finis long Kraes, nao yumi stap talemaot tok blong God.’—2 Kor. 2:17.
6 Sipos yumi folemgud ol tiokratik rod we God i yusum long ogenaesesen blong hem blong trenem yumi, yumi no gat risen blong fraet no blong kam slak long wok blong prij. Yumi save prij wetem glad long ol narafala, mo yumi save sua se Jeova bambae i blesem hadwok blong yumi.—1 Kor. 3:6.