?Mi Mi Naf Blong Prij?
1. ?From wanem yumi no mas harem se yumi no naf blong prij?
1 !Sipos wan dei yu stap askem kwestin ya long yu wan, yu no mas letem tingting blong yu i foldaon from! I no edukesen we yu gat, mo i no gudhan we yu gat blong mekem samting, we i save mekem se yu yu naf blong kam wan man blong talemaot gud nius. Ol man oli tokbaot sam long ol faswan disaepol olsem ol man we oli ‘no gat nem, mo oli no skul gud tu.’ Be nating, oli kam ol man blong talemaot gud nius we oli mekem gudfala wok, from we oli gat strong tingting blong folem eksampol we Jisas i stanemap.—Wok 4:13; 1 Pita 2:21.
2. ?Wanem sam fasin blong Jisas blong tijim ol man?
2 Jisas i Tij Olsem Wanem: Tijing blong Jisas i isi, hem i tokbaot ol samting we ol man oli save gud long hem, mo we i isi blong kasem save. Ol kwestin blong hem, ol pija tok, mo fasin blong hem blong statem wan storian we i no fasfas, i pulum ol man blong lesin. (Mat. 6:26) Hem i rili soemaot se hem i intres long ol man. (Mat. 14:14) Antap moa, Jisas i save se Jeova i sanem hem mo i givim paoa long hem blong mekem wok ya blong talemaot gud nius. Taswe, ol toktok blong hem i gat paoa mo hem i no fraet blong toktok.—Luk 4:18.
3. ?Olsem wanem Jeova i givhan long yumi blong mekem wok blong prij?
3 Jeova i Givhan long Yumi: Bigfala Tija blong yumi i yusum Tok blong hem mo ogenaesesen blong hem, blong givim trening we yumi nidim blong yumi naf blong talemaot gud nius. (Aes. 54:13) From we Jeova i lukaot gud long buk blong hem we i gat ol fasin blong Jisas blong tij, ale yumi save stadi gud long hem mo folem ol fasin ya blong Jisas blong tij. Jeova i givim tabu spirit blong hem mo i trenem yumi long taem blong ol miting blong kongregesen. (Jon 14:26) Mo tu, hem i yusum ol pablisa we oli gat gudhan, blong oli save givhan long yumi blong kam gud moa.
4. ?From wanem yumi gat risen blong harem se yumi naf blong go talemaot gud nius long ol narafala man?
4 I gat plante risen we oli mekem yumi harem se yumi naf blong prij, from ‘olgeta samting ya blong mekem yumi naf blong wok, oli kamaot long God nomo.’ (2 Kor. 3:5) Taem yumi dipen long Jeova mo yusum gud ol samting we hem i givim we oli soem lav blong hem, bambae yumi “save kam waes long olgeta samting, nao bambae yumi savegud ol rod blong mekem ol gudfala wok.”—2 Tim. 3:17.