Wan Kwestin

◼ ?I stret blong mekem wanem taem wan brata we i mas givim pablik tok i no kamtru long stret taem?

Samtaem, sam samting we brata i no save blokem i mekem se hem i kam let blong givim wan pablik tok. Sipos ol elda oli ting se bambae hem i kamtru i no longtaem, maet oli mekem disisen blong gohed wetem Wajtaoa stadi. Oli save mekem Pablik Tok biaen. ?Olsem wanem sipos i luk olsem se brata ya bambae i no kam? Maet wan narafala brata long lokol kongregesen i givim wan tok we hem i mekemrere finis.

Kolosap oltaem, wan gudfala plan i save blokem problem ya. Brata we i mekem program blong ol pablik tok i mas toktok wan wik bifo wetem brata we bambae i givim pablik tok, blong talem bakegen long hem se hem i mas mekem. Hem i mas talem long hem taem blong miting, adres mo namba blong telefon blong Haos Kingdom, mo talem klia olsem wanem blong faenem Haos Kingdom. Brata we bambae i givim tok i mas makemgud ol poen ya. Hem i mas tinghevi long tok we hem i givim, mo jenisim eni samting long program blong hem blong karem responsabiliti blong givim tok ya. Sipos wan samting i hapen we i blokem hem blong givim tok ya, hem i mas luk brata we i mekem program blong ol pablik tok kwiktaem nomo, blong mekem se wan narafala brata i save tekem ples blong hem. Brata i mas traehad blong mekem se long las menet, i no gat samting i blokem hem blong givim tok. Sipos wan samting i mekem se bambae hem i let smol, hem i save mekem sua se wan i telefon i go long Haos Kingdom, nao ol brata bambae oli save wanem blong mekem.

Fasin tangkyu from jans blong givim ol pablik tok, fasin blong mekem gudfala plan fastaem, mo talem bakegen long brata we bambae i givim tok, mo fasin blong lukaotgud long program blong ol pablik tok, i save mekem se kongregesen i haremgud long wan gudfala pablik tok evri wik.