Ansa Long Wan Kwestin

◼ ?Olsem wanem blong openem miting blong Tiokratik Skul, Miting blong Kingdom Wok, Pablik Tok, mo Wajtaoa Stadi wetem wan singsing, mo hu i mas mekem?

Ol faswan singsing blong Tiokratik Skul blong evri wik oli stap long Program blong Tiokratik Skul we oli putum long Kingdom Wok Blong Yumi blong Oktoba. Faswan singsing blong Miting blong Kingdom wok evri wik i stap long Kingdom Wok Blong Yumi long pej 2. Sem mak long Wajtaoa Stadi, namba blong ol singsing stap long pej 2 blong Wajtaoa we yumi stap stadi long hem. Ol singsing oli laenap wetem ol wanwan miting, mo brata we oli jusum blong openem wan miting i mas talemaot ol singsing blong miting ya long kongregesen, i no brata we i lukaot narafala miting we bambae i talemaot singsing ya.

Eksampol, brata we i lukaot long Tiokratik Skul hem nao bambae i talem welkam long ol man we oli lesin, hem i talemaot faswan singsing, lidim skul, nao hem i invaetem brata we bambae i mekem faswan tok long Miting blong Kingdom Wok i kam long platfom. Brata we i mekem tok long Miting blong Kingdom Wok, hem nao we bambae i mas talemaot faswan singsing blong miting ya.

Sem mak long Pablik Tok, wan jeaman bambae i openem miting ya. Hem bambae i welkamem ol man we oli stap long taem ya mo invaetem olgeta blong joen long faswan singsing. Hem (no maet wan narafala brata we oli jusum finis) bambae i openem miting wetem wan prea. Jeaman bambae i invaetem brata we bambae i mekem Pablik Tok ya mo hem i mas talem stamba blong tok blong hem. Afta we brata ya i finisim tok, jeaman bambae i mekem sotfala toktok nomo blong talem tangkiu from tijing we i bin kamaot long tok ya. Bambae hem i talemaot stamba tok blong Pablik Tok blong nekis wik, mo bambae hem i talem long ol man we oli lesin se oli save stap blong joen long Wajtaoa Stadi. I no nid blong jeaman i askem sipos kongregesen i wantem sanem lav mo halo i go long narafala kongregesen we brata ya i stap long hem. Afta long hemia, jeaman bambae i invaetem brata we i lidim Wajtaoa Stadi blong kam long platfom.

Brata we i lidim Wajtaoa Stadi bambae i talemaot namba blong faswan singsing we i stap finis long Wajtaoa we i laenap wetem stadi ya. Bambae hem i lidim stadi ya long wan fasin we i klia mo long en blong stadi ya hem i mas talemaot namba blong laswan singsing. Plante taem brata we i lidim Wajtaoa Stadi bambae i askem brata we i mekem Pablik Tok blong mekem laswan prea.

Sipos yumi folem ol rul olsem, samting ya i save halpem yumi blong meksua se ol haf blong miting blong yumi oli joengud.