Statem Mo Finisim Ol Miting Long Stret Taem

¹ Olgeta miting blong kongregesen mo ol miting blong prij tu, oli mas stat mo finis long stret taem. ?From wanem? Fasin ya i soemaot se yumi no olbaot nomo, mo yumi tingbaot olgeta we oli stap kam mo joen long ol miting ya. (Ekles. 3:17b; 1 Korin 14:33) Sipos yumi folem ol rul we oli stap biaen blong mekem se ol miting oli stat mo finis long stret taem, yumi save soemaot se yumi kea.

² Oltaem yumi mas traehad blong kam eli long miting, blong yumi save storeyan wetem ol narafala, lukaot long ol wok blong yumi, mo joen long faswan singsing mo prea. Kolosap evritaem, i gat faef menet blong mekem singsing mo prea. Olgeta we oli prea long miting oli mas tingbaot risen blong miting ya, mo ol toktok blong olgeta long faswan mo laswan prea i mas soemaot samting ya. Oli no nidim blong mekem ol prea ya oli longfala tumas.

³ Pablik Tok: Pablik tok i no mas bitim 45 menet. Sipos wan brata i bitim taem ya, bambae hem i katem taem blong Wajtaoa Stadi biaen. Tufala miting ya wetem faswan mo laswan singsing mo prea, oli no mas bitim tu haoa. Olgeta we oli givim pablik tok oli mas folem ol menet we Sosaete i raetem long pepa blong pablik tok. Oli no save tokbaot ol narafala samting insaed long taem blong pablik tok, olsem blong talem halo we sam brata no sista oli sanem i kam long kongregesen. Sipos brata we i mekem tok i no save weples Haos-Kingdom i stap, hem i mas askem long kongregesen blong talem klia long hem, mo blong talem hamas taem we hem i nidim blong kasem Haos-Kingdom ya.

⁴ “Wajtaoa” Stadi: Wajtaoa Stadi i no mas bitim wan haoa. Insaed long taem ya, oli mas ridim olgeta haf blong Wajtaoa mo olgeta kwestin. Brata we i mekem stadi ya i save mekem sam sot tok fastaem, we i joen wetem stadi ya mo i pulum ol man blong intres long hem. Hem i no mas mekem plante tumas toktok insaed long stadi. Hem i save makemaot stret taem we hem i mas spenem long olgeta haf wanwan. Olsem ya nao, hem i no save spenem taem long fas haf blong stadi, mo hareap blong finisim las haf.

⁵ Tiokratik Skul: Miting ya i no mas bitim 45 menet. Nating we wan brata i no save stopem faswan tok mo ol poen blong Baebol riding, taem stret taem blong hem i finis, be ol brata we oli mekem ol haf ya oli mas lukaot gud we oli no bitim taem blong olgeta. Sipos no, brata we i lukaot long skul i save givim advaes long olgeta wanwan. Mo tu, advaes mo ol poen we brata we i lukaot long skul i talem oli no mas bitim stret taem blong olgeta. Sipos olgeta we oli gat haf long skul oli sidaon kolosap long fored, mo sipos oli finisim tok blong olgeta kwik taem oli bitim taem, samting ya i save sevem taem tu.​—⁠Lukluk Program Blong Tiokratik Skul Long Yia 1991.

⁶ Miting Blong Kingdom Wok: Miting ya tu i no mas bitim 45 menet. Miting ya wetem Tiokratik Skul wetem ol singsing mo prea, olgeta samting ya i no mas bitim wan haoa mo 45 menet. Ol brata we oli gat sam haf long miting ya oli mas no bitim stret taem blong olgeta. Ol haf we oli kwestin mo ansa oli nidim wan sot fastok nomo. I no gat nid blong talem plante samting long fastok. Olgeta we oli mekem pleplei oli mas mekem plante taem fastaem. Mo oli mas stap rere, long ples blong pleplei, blong oli no westem taem blong haf ya.

⁷ Buk Stadi: Miting ya i blong wan haoa. Faswan mo laswan prea i mas stap insaed long haoa ya. Wan brata bambae i ridim olgeta haf long stadi ya. Brata we i lukaot long stadi ya i save seraot stadi long sam haf mo makemaot taem blong ol haf ya, blong hem i no hareap long las haf blong stadi, mo blong i no finis eli tumas. Hem i mas luksave hamas taem blong spenem long evri haf wanwan. Ol bigfala poen blong stadi oli mas klia gud. Fasin blong hem blong tijimgud ol man bambae i givhan long hem blong mekem samting ya, nating we samtaem i no isi.​—⁠Taet. 1:⁠9.

⁸ Ol Miting Blong Prij: Olgeta ya oli no mas bitim 15 menet. Insaed long taem ya, brata i save talemaot teritori mo oli mekem prea tu. Olgeta we oli joen long wok blong prij oli wantem statem wok ya kwiktaem. Brata we i lukaot long miting ya i mas statem long stret taem blong hem, i no mas wet gogo sam moa man oli kam. Mo tu, taem hem i talemaot ol teritori long olgeta mo oli mekem prea finis, olgeta long grup oli save go kwik long teritori. Hemia i impoten moa long ol paenia we oli stap long grup ya.

⁹ Yumi evriwan i save harem gud long ol miting we oli stat mo finis long stret taem blong olgeta. Samting ya i tru moa long olgeta we hasban no waef blong olgeta i no stap long trutok. Mo oli wantem se oli kambak long haos long stret taem. Sipos wan long tufala nomo i stap long trutok, maet narawan i talemaot stret taem we bambae i kambak long haos. Blong mekem olsemia, hem i mas tingbaot taem we hem i ron long trak blong go mo kam long miting, mo taem we hem i nidim bifo mo afta long miting blong storeyan wetem sam man, mo pem sam buk, mo sam samting bakegen. I klia se sipos ol miting oli stat mo finis long stret taem blong olgeta samting ya i givhan blong “mekem olgeta samting long fasin we i stret gud.”​—⁠1 Korin 14:40.