Ol Samting Blong Tingbaot Long Saed Blong Memoriol

Bambae yumi mekem Memoriol long Sande, Maj 23. Ol elda oli mas jekemap ol samting ya:

◼ Taem yufala i putum stret taem blong Memoriol, mekem sua se bambae yufala i no pasem bred mo waen bifo we san i godaon.

◼ Evriwan, wetem brata we i givim tok tu, oli mas savegud stret taem mo ples blong Memoriol.

◼ Kasem bred mo waen we i stret, mo mekemrere ol samting ya.​—Lukluk Wajtaoa (Engglis) blong Febuwari 15, 1985, pej 19.

◼ Karem ol plet, glas, mo wan gudfala tebel mo kaliko blong hem, oli kam long Haos Kingdom, mo putum olgeta oli stap long stret ples blong olgeta, bifo long taem blong miting.

◼ Klinimgud Haos Kingdom no narafala ples blong mekem miting, bifo long taem blong Memoriol.

◼ Jusum ol man blong mekem welkam mo ol man blong karem bred mo waen i goraon, mo toktok wetem olgeta samtaem bifo long miting ya, long saed blong stret rod blong mekem wok blong olgeta.

◼ Mekem plan blong karem bred mo waen i go long ol brata mo sista we tabu speret i makemaot olgeta, we oli sik mo oli no save kam long Memoriol.

◼ Sipos i gat bitim wan Memoriol long Haos Kingdom, i mas gat gudfala plan bitwin ol kongregesen, blong mekem se ol man oli no fasfas long doa, rod blong kam insaed, afsaed long Haos Kingdom, mo long ples blong putum ol trak.