Halpem Ol Man We Oli No Waes Blong Kasem Save
1 Long wok blong mekem ol disaepol, yumi tijim ol narafala long ol samting we God i wantem olgeta blong mekem. (Mat. 28:19, 20) Bitim faef milyan Wetnes long olgeta ples blong wol, oli stap wok strong tumas blong mekem samting ya. Yumi no makem risal blong yumi from ol haoa we yumi spenem, no from hamas buk we yumi seremaot, no from hamas Baebol stadi we yumi statem. Yumi kasem mak blong yumi taem ol man oli kasem save mo mekem ol save ya i wok long laef blong olgeta.
2 Taem yumi givhan long narafala long saed blong speret, yumi stap ‘mekem man we i no gat save i kam waes.’ (Sam 119:130) Taem oli “haremsave,” long taem ya nomo, tok blong God i save kasem hat blong olgeta mo pusum olgeta blong tekem aksin. (Mat. 15:10) Taem wok blong yumi i stap kam bigwan moa mo i spid moa, yumi luksave moa se yumi nidim blong toktok mo tijim man long isi, klia fasin. Hemia nao from wanem Sosaeti i prentem buklet ya ?Wanem Samting We God i Wantem Yumi Blong Mekem? Insaed long hem, i gat wan ful kos blong stadi we i kavremap ol stampa tijing blong Baebol. Ol stadi long hem oli sot, ol tok blong hem oli isi nomo, mo i no hadwok blong kasem save long ol tijing we hem i givim. Taswe, buklet ya i gud long olgeta kaen man.
3 Long manis Epril mo Mei, bambae yumi seremaot buklet ya wetem ol Wajtaoa mo Wekap! Taem yu mekem plan blong prij, i gud we yu mekem plan blong seremaot ol Wajtaoa mo Wekap! long Sarede, be seremaot buklet ya long ol narafala dei blong wik. Karem buklet ya i go long ol man we oli bin karem ol buk blong yumi bifo. No fogetem tu se, buklet ya i gud tumas blong tijim ol pikinini, ol man we oli toktok narafala lanwis, mo olgeta we oli no save ridgud.
4 Yusum Rod We i Isi Blong Seremaot: Taem yu stap seremaot buklet ya, Samting We God i Wantem, soem pej 2, we i talem se buklet ya i “blong mekem wan kos blong stadi long Baebol.” Nao poen i go long haf 3 long pej 3, mo soem long man blong haos from wanem hem i nidim blong stadi long Baebol. Pulum intres blong hem wetem stampa tok blong sam haf blong buklet ya, we oli soemaot ol isi trutok blong Baebol. Soem olsem wanem buklet ya i save mekem man i haremgud blong stadi long Baebol, mo se yu yu glad blong givhan long hem.
5 Mekem Wan Stadi We i Gohed Gud: Mak we yumi wantem kasem i no blong mekem ol stadi nomo. Yumi wantem mekem ol disaepol we bambae oli sapotem gud trufala wosip. Bambae yumi tekem sam wik nomo blong stadi fulwan buklet ya wetem wan man, mo samting ya i save lidim hem i go long stadi blong Save buk. (Lukluk futnot long pej 31.) Long stat olgeta, givhan long studen blong luksave ogenaesesen blong Jeova. (Lukluk buk ya Reasoning, pej 283 mo 284, [273, 274].) Makemgud se ol miting blong kongregesen oli impoten tumas, mo eksplenem se taem yumi go long ol miting yumi kasem save fulwan olsem wanem blong mekem trufala wosip.—Hib. 10:24, 25.
6 Sipos yumi joen fulwan long spesel wok ya long Epril mo Mei, bambae yumi sua blong kasem glad ya we i kamaot taem yumi givhan long olgeta we hat blong olgeta i stret, blong oli “kasem waes” we i save lidim olgeta blong kasem laef.—Prov. 4:5.