Yangfala​—⁠?Wanem Ol Mak Long Saed Blong Speret We Yu Stap Traehad Blong Kasem?

¹ Jeova i save se blong glad, yumi nidim blong mekem wok we yumi haremgud long hem, mo yumi nidim blong traehad blong kasem ol mak we oli no strong tumas. (Lukluk Jenesis 1:​28; 2:15, 19.) Tede, Jeova i givim wok long ol man blong hem blong prij mo blong tijim ol man. Mo tu, yumi stap traehad blong kasem bigfala mak ya, laef blong olwe long Paradaes. Be, go kasem taem ya, yumi nidim blong putum ol smosmol mak long saed blong speret we yumi traehad blong kasem. Olsem nao, bambae yumi no yusum paoa, taem, mo olting blong yumi long rod we i no waes.​—1 Kor. 9:​26.

² Ol Mak We Oli No Strong Tumas Blong Ol Yangfala: Ol yangfala oli mas putum ol tiokratik mak we oli naf blong kasem, folem prapa save mo fasin blong olgeta wanwan. (1 Tim. 4:​15) Sam pikinini we oli smol nomo, oli kasem mak we oli save talem nem blong olgeta buk blong Baebol, bifo we oli lanem blong rid. Long famle stadi, ol pikinini oli lanem olsem wanem blong mekemrere ol miting. From samting ya, oli save kasem mak ya we oli givim ol gudfala ansa long miting, mo putum nem blong olgeta long Tiokratik Skul. Taem ol pikinini oli folem papa mama blong olgeta long wok blong prij, oli lanem blong joen long wok blong givim wetnes, mo sloslou oli kasem mak ya blong pablisa we i no baptaes yet. Ol papa mama oli mas toktok oltaem wetem ol pikinini blong olgeta long saed blong mak ya blong givim laef blong olgeta long Jeova mo tekem baptaes.

³ Sipos yu yu yangfala we yu bigwan finis, ?wanem ol mak we yu traehad blong kasem long saed blong speret? Blong “tingbaot Bigfala Man we i wokem yu,” yu mas traehad blong kasem ol mak we oli rili impoten. (Ekles. 12:⁠1; Sam 71:17) Maet yu save haftaem paenia long ol manis we yu gat spel long skul. ?Yu bin tingbaot blong kam wan fultaem paenia? Ating yu save lanem wan narafala lanwis, nao long fyuja, yu save joen wetem wan grup no kongregesen long ples blong yu no long wan narafala ples, we oli toktok lanwis ya. Plante we naoia oli stap wok long Betel, mekem wok blong seket elda, no misinari, oli bin putum mak blong mekem wan spesel wok long saed blong speret olsem paenia, taem oli stap yet long skul. ?From wanem yu no mekem olsemia?

⁴ Taem yu yu yang yet, traehad blong folem eksampel blong Jisas. Taem hem i gat 12 yia nomo, hem i eksplenem gud ol samting long saed blong speret. (Luk 2:​42-​49, 52) Sipos yu putum ol gudfala mak olsem stadi wanwan, ridim Baebol evri dei, mo joen oltaem long ol miting wetem ol Kristin we oli bigman long saed blong speret, samting ya bambae i givhan long yu blong gat gudhan blong tijim ol narafala long saed blong Kingdom blong God, olsem Jisas i bin mekem.