Yumi Mas Putum Ol Mak Long Saed Blong Spirit
1 !Tingbaot nambawan blesing we bambae yumi kasem, hemia blong presem Jehova olwe! Blong givhan long yumi blong kasem mak ya, i gud yumi putum sam narafala mak long saed blong spirit, mo yumi traehad blong kasem olgeta. Ol mak ya bambae oli halpem yumi blong yusum paoa blong yumi long waes fasin. (1 Kor. 9:26) ?Wanem sam mak we yu yu naf blong kasem?
2 Stadi Baebol: ?Yu yu stap rerem gud ol wanwan miting blong kongregesen? ?Sipos yes, yu yu tekem taem blong lukaot moa save mo tingting dip taem yu stadi? Traem tingbaot. ?Taem yu stap mekem rere Wajtaoa stadi blong yu, mo Baebol stadi blong kongregesen evri wik, yu yu putum laen nomo aninit long ol ansa? ?Yu yu jekem ol vas tu we oli stap, mo yu tingbaot from wanem haf ya we yumi stadi long hem i eksplenem olsem? ?Yu yu save putum mak ya, se evri wik bambae yu lukaot moa save long saed blong sam poen long Baebol riding we yumi stap folem long Tiokratik Skul? Yumi nidim taem mo fasin traehad blong stadi dip long ol samting long saed blong spirit, be i gat plante gudfala frut i kamaot from.—Prov. 2:4, 5.
3 Ol Miting Blong Kongregesen: Wan narafala mak we yumi save putum, hemia blong kam evri wik long ol faef miting blong kongregesen. I gud blong kam eli long miting, blong yumi save joen wetem ol narafala Kristin brata mo sista, mo tu blong yumi save joen long fas singsing mo prea. Fasin olsem i leftemap gudfala tingting mo fasin joengud insaed long Kristin kongregesen. Maet yumi save traehad blong givim ansa long ol wanwan miting, mo blong mekem se ol ansa blong yumi oli kam gud moa oltaem. Maet yu save talem se wan vas i joen olsem wanem wetem paragraf, no yu save tokbaot olsem wanem blong yusum poen ya long laef blong yumi evri dei.—Hib. 10:24, 25.
4 Wok Blong Prij: Wok blong prij we yumi mekem i save kam gud moa, taem yumi putum sam mak mo yumi traehad blong kasem olgeta. ?Yu yu putum wan mak finis blong makemaot hamas aoa we yu wantem kasem evri manis long wok blong prij? Samfala oli luk se taem oli putum ol mak olsem, hemia i givhan long olgeta. ?Sipos no, yu yu save kam gud moa long sam haf blong wok blong prij? Maet yu traem blong yusum Baebol moa, taem yu stap prij long ol haos wanwan, maet yu traem blong mekem se ol visit blong yu oli gohed gud, maet yu traehad blong statem wan Baebol stadi, no maet yu traem blong kam gud moa long fasin blong yu blong tijim ol man.
5 ?Ol papa mama, yufala i stap leftemap tingting blong ol pikinini blong yufala, blong oli putum sam mak we oli wantem kasem long wok blong Jehova? Yufala i mas halpem olgeta blong oli luksave se wok blong paenia, misinari, no wok long Betel i wan nambawan rod blong talem bigfala tangkiu long Jehova.—Pri. 12:1.
6 Taem yumi skelem gud ol wok we yumi mekem, i gud yumi putum sam mak long saed blong spirit, mo yumi traehad blong kasem olgeta. Sipos yumi mekem olsem, bambae yumi kasem bigfala glad long wok blong prij, mo bambae yumi leftemap tingting blong ol narafala brata mo sista tu.—Rom 1:12.