Fasin Blong Holemstrong Long Wok Blong God i Karem Pei
1 Hibrus 11:6 i talem se God “i stap mekem i gud long olgeta we oli stap traem faenem hem.” Hem i givim pei long ol man blong wok blong hem we oli ‘mekem i stretgud long wan smol bisnes we hem i putum long han blong olgeta.’ Wan rod we hem i yusum blong givim pei long olgeta, i blong ‘putumap olgeta blong lukaot long plante bisnes.’ (Mat. 25:23) Olsem nao, blong mekem i gud long ol wetnes blong hem we oli holemstrong long wok blong hem, plante taem Jeova i givim long olgeta ol narafala wok we oli bigwan moa.
2 Pei we aposol Pol i kasem from fasin blong hem blong holemstrong long wok blong God, se hem i mas go prij long ol taon mo velej long Yurop mo Esia Maena. (1 Tim. 1:12) Nating se i no isi long Pol blong mekem wok ya, hem i tinghae tumas long blesing ya we hem i kasem. (Rom 11:13; Kol. 1:25) Hem i soem se hem i gat bigfala tangkyu long hat blong hem taem, hem i traehad blong faenem ol jans blong prij. Fasin blong hem blong wok olsem we faea i laet long hem, i soem klia se hem i mekem bilif blong hem i wok long laef blong hem. Fasin blong hem i pusum yumi blong tinghae long ol wok we yumi kasem we oli olsem ol blesing.
3 Jeova i Givim Wan Wok Long Yumi: ?Olsem wanem yumi save soem sem tingting olsem Pol long saed blong ol blesing blong wok we yumi kasem olsem pei? Yumi lukaot ol rod blong joen moa long wok blong prij. Yumi tekem evri jans blong prij mo mekem wok ya long olgeta haos wanwan. Yumi gobak long ol haos we oli no gat man, mo olgeta we oli soem intres fastaem. Mo yumi gobak blong mekem ol Baebol stadi long stret taem we yumi bin putum.
4 Long saed blong wok blong prij, Pol i givim advaes ya se: ‘Mekem wok ya long fasin we i soem se i impoten.’ (2 Tim. 4:2) Samting we i impoten, yumi mekem kwiktaem, yumi no wet. ?Yumi mekem wok blong prij long fasin ya, olsem we i moa impoten bitim ol narafala samting long laef blong yumi? Eksampel, yumi no mas letem ol pleplei mo ol narafala samting we yumi wanwan i mekem long wiken i fulumap taem we yumi mas yusum blong prij. Sipos yumi bilif fulwan se en blong rabis fasin blong wol ya i kolosap tumas, ale bambae yumi bilif tu se wok blong talemaot gud nyus blong Kingdom i moa impoten bitim olgeta narafala wok we yumi save mekem.
5 Yumi soem se yumi stap holemstrong long wok blong God taem yumi fasgud mo stap tru long hem, mo taem yumi gohed strong long wok we hem i givim long yumi blong mekem. I gud we yumi mekem fulwan wok blong prij, olsem nao, Jeova bambae i givim bigfala pei long yumi from fasin blong holemstrong long wok ya.