Traehad Blong Mekem Moa Long Wok Blong God
1 Aposol Pol i givim advaes long ol Kristin blong oli wokbaot long fasin blong laef we God i wantem mo blong oli “gohed moa yet long ol fasin ya.” (1 Tes. 4:1) ?Olsem wanem yumi save mekem samting ya? Wan samting we yumi save mekem, hemia blong traem faenem rod oltaem blong mekem moa long wok blong God, oltaem yumi mas traehad blong ‘finisim olgeta wok ya we God i givim long yumi blong mekem.’—2 Tim. 4:5.
2 Samting We i Pusum Yumi: Samting we i pusum yumi blong mekem moa hemia se yumi wantem tumas blong mekem wok blong God fulwan. Yumi wantem gru moa long saed blong spirit mo yumi traem faenem rod blong kamgud moa long wok we God i givim long yumi blong mekem. Sipos wan tingting we i stret i pusum yumi mo yumi folem wan gudfala program, samting ya bambae i givhan long yumi blong kasem ol mak we yumi putum long saed blong wok blong God.—Sam 1:1, 2; Fil. 4:6; Hib. 10:24, 25.
3 Blong mekem moa long wok blong God yumi mas wokem tingting ya we yumi glad blong givim samting mo yumi rere blong lego samting we yumi nomo i wantem. Yumi save wokem tingting ya taem yumi prea mo tingting dip long gudfala eksampol blong Jisas. (Mat. 20:28) Jisas i kasem bigfala glad taem hem i mekem wok blong givhan long ol narafala. (Wok 20:35) Yumi save folem fasin blong Jisas taem yumi soem intres long ol man mo yumi traem luksave kwiktaem sipos yumi gat janis blong mekem moa long wok blong God.—Aes. 6:8.
4 Wok Blong Ol Papa Mama: Taem pikinini i smol yet papa mama i save tijim hem blong wantem givhan long ol narafala mo mekem moa long wok blong God. Taem ol memba blong famle oli wok strong mo traehad blong mekem moa long wok blong God, ol pikinini oli luksave samting ya. Wan brata i tingbaot we taem hem i pikinini nomo, hem i stap wok wetem bubu man blong hem long ol wok blong kongregesen, mo samting ya i pulum hem blong wantem mekem moa. Hem i luk we bubu blong hem i wok strong mo i glad, nao samting ya i pusum hem blong lukaot evri janis blong mekem wok blong givhan long ol brata sista. Naoia, brata ya i wan man blong givhan.
5 I Nidim Moa Brata: “Sipos wan man i wantem mekem wok blong elda long kongregesen, man ya i wantem wan gudfala wok ya.” (1 Tim. 3:1, NW) Vas ya i leftemap tingting blong ol brata blong oli traehad blong kasem ol mak we bambae oli mekem olgeta oli naf blong mekem moa wok long ogenaesesen blong Jeova. I no min se i gat sam spesel samting we wan brata i mas gat gudhan long hem bitim mak. Nogat. Wan brata i soemaot se hem i wantem mekem moa wok taem hem i putum Kingdom long fasples long laef blong hem mo i wok strong long wok blong prij. (Mat. 6:33; 2 Tim. 4:5) Bambae hem i traehad blong givim wan gudfala eksampol long ol narafala.
6 Long Fulwol: Jeova i stap mekem wok ya blong hivimap ol trufala man blong hem i spid moa. (Aes. 60:22) Yufala we i folem eksampol blong Jisas, i nidim tumas we yufala i mekem wok blong God fulwan. Ripot blong fulwol i soem se long 2006 i gat 248,327 man we oli baptaes. !Hemia i olsem se evri dei i gat bitim 680 man we oli tekem baptaes! Yes, oltaem yumi evriwan i mas traehad blong faenem ol rod blong mekem moa long wok blong God.