Ol Yangfala Brata. ?Yufala i Wantem Mekem Wok Long Kongregesen?
1. ?Wetaem wan yangfala brata i save stat blong folem tok ya long 1 Timoti 3:1?
1 “Sipos wan man i wantem mekem wok . . . man ya i wantem wan gudfala wok.” (1 Tim. 3:1, NW) Ol gudfala tok ya oli givhan long ol brata blong oli kasem ol mak we Baebol i talem se wan brata i mas kasem, blong hem i save mekem wok long kongregesen. ?Olsem wanem? ?Yu yu mas wan bigman blong yu save mekem wok long kongregesen? Sipos yu yu wan yangfala mo ol elda oli givim sam wok long yu, i gud we yu gat fasin ya blong wantem mekem wok. Long rod ya, yu yu stap trenem yu wan mo yu stap soemaot se yu naf blong kasem mak ya blong kam man blong givhan taem yu kam bigman. (1 Tim. 3:10) Sipos yu yu wan yangfala brata we yu baptaes finis, ?yu save mekem wanem blong yu mekem moa wok long kongregesen?
2. ?Wanem i save givhan long yu blong gat fasin ya blong lego samting we yu nomo yu wantem? ?Mo yu save soemaot fasin ya olsem wanem?
2 Yu Mas Rere Blong Lego Samting We Yu Nomo Yu Wantem: Yu mas tingbaot se yu wantem mekem wan gudfala wok, be i no blong gat wan hae nem. From samting ya, yu mas wantem blong givhan long ol Kristin brata mo sista blong yu. Wan rod blong mekem olsem hemia blong folem gudfala eksampol blong Jisas. (Mat. 20:28; Jon 4:6, 7; 13:4, 5) Yu askem long Jehova blong i givhan long yu blong yu save soemaot se yu intres long ol narafala. (1 Kor. 10:24) ?Olsem wanem yu save soemaot se yu rere blong lego samting we yu nomo yu wantem? Yu save givhan long ol brata mo sista we oli olfala mo we oli no moa strong from we oli stap siksik. Yu save givhan blong katem gras, klinim ol windo, mo mekem ol narafala wok long Haos Kingdom. Yu save rere blong tekem ples blong narafala, blong givim tok long miting blong Tiokratik Skul. Yes, taem yu mekem olsem, bambae yu luk se yu glad bigwan from we yu stap givim taem mo paoa blong yu blong givhan long ol narafala.—Wok 20:35.
3. ?From wanem i impoten blong kam bigman long ol Kristin fasin? ?Ol brata oli save mekem wanem blong kam bigman long ol Kristin fasin?
3 Yu Mas Fren Gud Wetem Jehova: I impoten moa we olgeta we oli mekem ol wok insaed long kongregesen oli bigman long ol Kristin fasin, i bitim we oli gat gudhan blong mekem samting. Wan man we i bigman long ol Kristin fasin, hem i tingbaot ol samting olsem we Jehova mo Jisas tufala i tingbaot. (1 Kor. 2:15, 16) Hem i soemaot ol fasin we oli olsem frut blong spirit. (Gal. 5:22, 23) Hem i putum ol wok blong kingdom fas ples long laef blong hem mo hem i wok strong long wok blong talemaot gud nius. (Mat. 6:33) Yu save wokem ol Kristin fasin, taem yu gat wan gudfala program blong stadi yu wan. Hemia i min se yu mas ridim Baebol evridei, yu mas ridim ol haf blong Wajtaoa mo Wekap!, mo yu mas rerem ol miting blong yu mo go long ol miting ya. (Sam 1:1, 2; Hib. 10:24, 25) Pol i leftemap tingting blong Timoti blong gohed long trutok. Hem i talem se: “Yu mas lukaotgud long . . . ol tok we yu stap tijim man long hem.” (1 Tim. 4:15, 16) Yes, yu mas traehad blong mekem gud ol tok blong yu long Tiokratik Skul. Yu mas rere gud bifo yu go prij, mo yu mas joen oltaem long wok blong prij. Yu mas traehad blong kasem ol mak olsem, paenia, wok long Betel, mo blong joen long Baebol Skul Blong Ol Brata We Oli No Mared. Taem yu bigman long ol Kristin fasin, samting ya bambae i givhan long yu blong yu no “folem ol krangke fasin blong ol yangfala, we oli wantem tumas ol samting we i no stret.”—2 Tim. 2:22.
4. ?Fasin ya we man i trastem yumi mo yumi holemstrong long Jehova, i impoten olsem wanem?
4 Man i Mas Trastem Yu Mo Yu Holemstrong Long Jehova: Long taem blong ol aposol, i gat sam brata we wok blong olgeta i blong seremaot kakae long ol Kristin we oli nidim kakae. Ol brata ya oli “gat gud nem long fes blong ol man.” Oli ol man we narafala i save trastem olgeta mo oli holemstrong long Jehova. From samting ya, ol aposol oli no moa wari long wok blong seremaot kakae, be oli save putum tingting blong olgeta long wok we i impoten moa, hemia blong talemaot tok blong God. (Wok 6:1-4) Long sem fasin, taem ol elda oli givim wan wok blong yu mekem long kongregesen, yu mas traehad blong mekem gud wok ya. Yu mas folem fasin blong Noa, we hem i folemgud ol save we Jehova i givim long hem, blong hem i save olsem wanem blong wokem bigfala sip (Jen. 6:22) Yes, Jehova i tinghae long man we i holemstrong long hem, mo i soemaot long ol wok blong hem se hem i bigman long ol Kristin fasin.—1 Kor. 4:2; yu lukluk bokis ya, “Gudfala Samting We i Kamaot From Trening.”
5. ?From wanem ol yangfala brata oli mas wantem mekem wok?
5 Baebol i bin talemaot se Jehova bambae i spidimap wok ya blong hivimap ol man blong hem. Profet tok ya i stap kamtru tede. (Aes. 60:22) Evri yia, i gat 250,000 man oli baptaes. I gat plante niuwan oli stap kam long trutok. From samting ya, i nidim moa brata we oli bigman long ol Kristin fasin, blong oli mekem ol wok long kongregesen. Yes, i gat plante moa wok tede i bitim bifo, blong mekem long ogenaesesen blong Jehova. (1 Kor. 15:58) Ol yangfala brata, ?yufala i wantem mekem wok? Sipos yes, !yufala i wantem wan gudfala wok!
[Tok blong makem poen long pej 2]
I gat plante niuwan oli stap kam long trutok. From samting ya, i nidim moa brata we oli bigman long ol Kristin fasin, blong oli mekem ol wok long kongregesen
[Bokis blong pija long pej 3]
Gudfala Samting We i Kamaot From Trening
Taem ol elda oli givim wok long ol yangfala brata mo oli trenem olgeta, samting ya i givhan long ol yangfala ya. Afta long miting,wan eria elda wetem wan pablisa, tufala i stap sidaon long fored blong stej, mo elda ya i stap talem ol gudfala tok blong leftemap tingting blong pablisa ya. Be elda ya i luk wan yangfala boe i kam stanap klosap long tufala, ale, elda ya i askem long yangfala ya sipos hem i stap wet blong toktok wetem hem. Yangfala boe ya i talem se nogat, be hem i stap wet blong klinim stej. Hemia wok we ol elda oli givim long hem blong mekem evri taem, afta we miting i finis. Papa mo mama blong boe ya oli stap rere blong gobak long haos, be yangfala boe ya i no wantem gobak yet, from we hem i wantem finisim gud wok blong hem fastaem. Ale, eria elda ya i kamaot long stej mo i letem we yangfala ya i mekem wok blong hem. Eria elda ya i talem se: “Ol elda long kongregesen ya oli givhan mo oli trenem gud ol yangfala brata, taem oli givim ol wok blong oli mekem long kongregesen. Fom samting ya, taem mi kam visitim kongregesen ya, i isi nomo blong ol elda ya oli talem long mi, weswan yangfala brata we i naf blong mekem wok olsem man blong givhan long kongregesen.”