Prij Long Evri Ples We i Gat Man
1 Aposol Pol i luksave se tabu speret blong God i givhan bigwan long hem long wok blong prij, taswe hem i talem se: ‘God nomo i stap mekem i gru.’ Hem i talem tu se: ‘Yumi stap joen wetem God blong mekem wok blong hem.’ (1 Kor. 3:5-9) Hemia wan nambawan blesing. ?Olsem wanem yumi save soemaot long ol man se yumi gat bigfala tangkyu from jans ya blong wok wetem God? Yumi mas talemaot gud nyus long ol haos wanwan mo long ol narafala ples tu.
2 Yumi kasem oda ya blong ‘pulum olgeta man oli kam man blong Kraes.’ (Mat. 28:19) Sipos yumi mitim smol man nomo taem yumi prij, maet yumi kam taed kwiktaem mo harem se yumi no mekem plante wok. Be, yumi haremgud tumas taem yumi faenem plante man mo yumi storeyan wetem olgeta. I hadwok lelebet blong mekem samting ya, from we yumi mas girap mo go faenem ol man long ol defren ples, mo toktok wetem olgeta.
3 Sam Ples We Yumi Save Prij: Yumi save prij long ol man long maket, long ol ples blong sidaon mo spel, long bas stop, mo long epot. ?Yu yu rere blong prij taem yu karem bas, plen, bot no taksi, blong go samples? Tufala Wetnes i stap long wan bas we i fulap long man, tufala i stap go long miting blong prij, ale tufala i storeyan tugeta long saed blong pija blong Paradaes we i stap long Save buk, mo tufala i tokbaot promes blong God long saed blong fyuja. Tufala i hop se wan man bambae i lesin. Mo i tru, samting ya i hapen. Wan yangfala man we i stanap kolosap long tufala i stap lesin, ale hem i laekem tumas samting we hem i harem. Bifo we hem i aot long bas, hem i karem wan buk, mo i askem sipos wan man i save kam luk hem long haos.
4 Plante pablisa oli kasem glad taem oli tekem evri jans blong prij. Wan aftenun, wan sista i go long stoa, mo hem i toktok wetem ol man we oli pem ol samting finis mo oli no stap hareap blong go samples. Hem i seremaot olgeta buk we hem i karem long basket blong hem. Wan man we i stap wet long trak blong hem i glad blong karem Wajtaoa mo Wekap! Man ya i bin go long sam miting bifo, nao storeyan blong tufala i wekemap intres blong hem bakegen.
5 I wan bigfala blesing blong presem nem blong Jeova. Taem yumi wok strong long wok blong prij, yumi soem se yumi no mestem risen blong kaengud fasin we God i soem long yumi. Naoia i ‘nambawan taem’ blong givhan long ol man, taswe yumi mas go long evri ples we i gat man mo givim wetnes long olgeta long saed blong ‘dei blong Jeova blong sevem man.’—2 Kor. 6:1, 2.