Talemaot Gud Nyus Long Evri Ples
1 Ol faswan Kristin oli talemaot gud nyus long evri ples. Oli wok strong long samting ya, mekem se 30 yia biaen we Jisas Kraes i laef bakegen, oli talemaot finis mesej blong Kingdom “long olgeta man long wol.”—Kol. 1:23.
2 Ol man blong Jeova we oli wok strong tede oli gat sem tingting—oli wantem kasem olgeta man wetem gud nyus blong Kingdom. ?Wanem i save givhan long yumi blong mekem samting ya? Plante moa man oli stap wok fultaem naoia, mo maet oli no stap long haos taem yumi prij. Sipos oli no stap wok, oli stap wokbaot, go long stoa, no oli stap joen long wankaen spot no pleplei samples. ?Olsem wanem blong kasem olgeta we oli wantem trutok, wetem mesej blong Kingdom?—Mat. 10:11.
3 Samfala oli mitim ol man long ples blong wok blong olgeta. Nating sipos taon i smol nomo, i mas gat ol stoa mo ofis long hem, mo plante man oli stap kolosap ful dei long ples ya. Long ol bigfala taon, ol man we oli wok long ol faktri no ol bigfala ofis no store haos we oli lokemgud, oli stap harem trutok tu—plante oli harem blong fastaem. Long wiken, samfala oli harem trutok long ol open ples taem oli stap spel, mo long ol ples blong plei spot no mekem pleplei, ol ples blong kamping, long ol smol haos blong spel, taem oli stap wet insaed long trak, no insaed long ol bigfala stoa, mo oli soem se oli glad blong harem gud nyus.
4 Wan gudfala namba blong ol pablisa oli stap traehad blong wetnes long ol pablik ples, long eni ples we oli faenem man. Fastaem, ol Wetnes ya oli fraet mo oli seksek lelebet from we oli lan blong prij long ol narafala ples nomo, olsem long ol haos wanwan. ?Be wanem filing blong olgeta naoia?
5 Wan brata we i stap prij longtaem finis i talem se: “!Wok ya i putum laef long minista wok blong mi!” Wan narafala brata i talem se: “Wok ya i givhan long mi blong tingting long samting we i moa impoten oltaem.” Wan olfala paenia i talem se: “Wok ya i givim paoa long mi long saed blong tingting, bodi mo speret, . . . !mo mi stap gruap yet!” Wan pablisa i talem se hem i stap toktok wetem plante man we oli neva bin storeyan wetem ol Wetnes blong Jeova bifo. Ol yangfala tu oli glad blong joen long gudfala wok ya. Wan yangfala i talem se: “!Wok ya i gud tumas from we yu toktok wetem plante man!” Wan narafala i talem se: “!Mi mi stap seremaot moa buk naoia bitim olgeta taem bifo!” !Olgeta samting ya i stap hapen long ol ples we oli bin wokem bakegen mo bakegen!
6 Ol Elda We Oli Goraon Long Ol Kongregesen Oli Lidim Wok Ya: Sosaeti i luksave se ‘wol ya wetem ol fasin blong hem oli stap jenis.’ Taswe, i no longtaem i pas, oli bin talem long ol elda we oli goraon long ol kongregesen, blong jenisim program blong prij we oli folem evri wik, blong mekem se oli save kasem moa man wetem gud nyus. (1 Kor. 7:31) Blong plante yia, ol seket elda oli makemaot ol moning blong wik blong joen long wok blong prij long ol haos wanwan, mo long aftenun, oli mekem ol visit bakegen mo ol Baebol stadi. Long sam ples, maet program ya i save wokgud yet. Be long sam narafala ples, maet i no gat plante frut i kamaot long wok blong prij long evri haos wanwan, long sam moning blong wik. Long ol ples olsem, maet seket elda i mekem disisen blong go prij long ol stoa no long rod, fastaem long moning. No maet hem i mekem plan blong sam smol grup oli prij long ol store haos we oli fulap long ol ofis, no long taon, long ol ples blong putum trak, no long sam narafala pablik ples bakegen. Taem ol pablisa oli yusumgud taem we oli gat blong prij, oli save kasem plante moa man.
7 Ol ripot oli soemaot se ol elda we oli goraon long ol kongregesen mo ol pablisa tu oli glad blong mekem jenis ya. Ol elda long sam kongregesen oli bin askem long seket elda, blong trenem sam pablisa long ol fasin blong prij we lokol kongregesen i nidim blong kamgud moa long hem. I bin givhan long ol pablisa ya taem oli joen wetem seket elda long ol wok blong hem. Biaen, olgeta nao oli save trenem sam narafala bakegen. (2 Tim. 2:2) From samting ya, plante moa man oli stap harem gud nyus naoia.
8 I tru se, yu no nidim blong wet long visit blong seket elda blong traem ol narafala rod ya blong prij. Hemia nao sam rod we maet yu faenem se oli wokgud long ples blong yu:
9 Prij Long Rod: Taem yumi stap go long haos blong ol man long ol moning blong wik, maet yumi stap tingbaot se ‘?Wehem ol man?’ Samfala oli stap wokbaot blong mekem prapa wok blong olgeta no blong go long stoa. ?Yu bin traem blong prij long rod blong kasem olgeta? Taem yumi yusumgud fasin ya blong prij, yumi save karem gudfala frut. Maet yu jes talem halo long ol man mo stat storeyan wetem olgeta long kaen fasin. Yu no nidim blong prij long evri man we i pas. Toktok wetem olgeta we oli no hareap tumas, olsem olgeta we oli stap lukluk long windo blong ol stoa, olgeta we oli sidaon insaed long ol trak, no ol man we oli stap wet blong karem bas. Fastaem, maet yu jes talem halo mo wet blong oli ansa. Sipos wan man i soem se hem i glad blong storeyan, askem tingting blong hem long wan samting we yu ting se hem i save intres long hem.
10 Taem wan seket elda i visitim wan kongregesen, hem i askem sikis pablisa blong joen wetem hem mo woman blong hem, blong prij long rod. ?Wanem samting i kamaot from? Hem i talem se: “!Mifala i gat wan nambawan moning! I no gat problem ya we mifala i no faenem man long haos. Mifala i seremaot 80 magasin mo plante traket. Mifala i storeyan gud wetem plante man. Wan pablisa we hemia fastaem blong hem blong joen long wok blong prij long rod, i talem se: ‘!Mi mi stap long trutok plante yia finis, be mi no save se mi bin mestem wan gudfala samting!’ Long en blong wik, hif magasin we kongregesen i gat i finis.”
11 Taem seket elda ya i go long nekis kongregesen, hem i harem se sam pablisa oli bin prij long rod long eli moning be oli no kasem plante man. Wan sista i toktok wetem tu man nomo, from we ol narafala oli stap hareap tumas blong go long wok. Seket elda i talem se maet i gud sipos smoltaem biaen, smol grup ya i gobak long sem rod bakegen. Oli mekem olsem, mo oli stap kasem medel dei. Sista ya we i toktok wetem tu man nomo fastaem, hem i gat gudfala taem biaen. !Hem i seremaot 31 magasin mo 15 buklet, hem i karem nem mo adres blong 7 man, mo hem i statem tu nyufala Baebol stadi! Sam narafala long grup ya oli karem gudfala frut long wok ya tu.
12 Taem yu faenem wan man we i intres, traem askem nem, adres, mo namba blong telefon blong hem. Yu no nid blong askem stret long hem, be maet yu talem olsem: “Mi mi glad tumas blong storeyan wetem yu. ?Yu ting se i gat wan taem we yumitu save gohed long storeyan ya?” No maet yu askem se: “?Mi save kam storeyan bakegen wetem yu long haos blong yu?” Plante we oli harem trutok long fasin ya, oli agri blong yumi kam visitim olgeta bakegen. Yu mas sua blong karem plante pepa we oli talem taem blong ol miting, blong givim long eni man we i wantem kam long miting.
13 Taem yu toktok wetem man we i intres we haos blong hem i stap long teritori blong narafala kongregesen, yu mas pasem nem mo adres blong hem i go long ol brata long kongregesen ya, blong oli save gobak long hem. ?Olsem wanem? ?Wok blong prij long rod i wan gudfala fasin blong talemaot gud nyus long ples blong yu? Sipos yes, luklukbak long haf ya “Prij Long Rod Blong Faenem Ol Man We Oli Intres,” we i stap long Kingdom Wok Blong Yumi blong Julae 1994. Nao mekem plan blong joen long wok blong prij long rod, long taem blong dei we i gud blong kasem plante man.
14 Wok Blong Prij Long Bas: Wan moning, sam paenia oli mekem disisen blong prij long ol man we oli stap wet blong karem bas kolosap long wan haeskul. Oli storeyan gud wetem samfala, be i gat wan problem. Afta we oli storeyan blong smoltaem nomo, bas i kam, ale oli no moa save gohed blong storeyan. Ol paenia ya oli winim problem ya. Oli jyam long bas mo oli gohed blong storeyan long ol man ya taem bas i stap ronron long taon. Taem bas i kasem en blong rod, ol paenia oli no godaon, be oli gohed blong prij long ol narafala man we oli kam insaed long bas. Ale, afta we oli go kam plante taem, oli luk risal blong ol wok blong olgeta: !Oli seremaot bitim 200 magasin mo oli statem 6 Baebol stadi! Samfala oli glad blong givim adres mo namba blong telefon blong olgeta, blong mekem se ol paenia oli save visitim olgeta long haos blong olgeta. Long nekis wik, ol paenia ya oli gobak bakegen long bas stop mo oli folem sem fasin olsem bifo. !Oli seremaot 164 magasin mo oli statem wan moa Baebol stadi! Long wan ples, wan man i kam insaed long bas mo i sidaon long laswan jea—kolosap long paenia. Hem i lukluk brata ya mo i talem wetem smael: “!Mi save, yu yu gat wan Wajtaoa blong givim long mi!”
15 Plante pablisa oli givim wan gudfala wetnes taem oli stap wokbaot long bas, bot no plen. ?Olsem wanem yu save stat blong storeyan wetem hemia we i stap sidaon kolosap long yu? Wan pablisa we i gat 12 yia nomo i ridim Wekap! long bas, ale hem i hop se yangfala gel we i sidaon kolosap long hem bambae i askem kwestin. !Plan ya i wok! Gel ya i askem long hem se hem i stap ridim wanem, nao yangfala ya i ansa se hem i stap ridim olsem wanem ol yangfala oli save winim ol problem we oli fesem. Hem i talem tu se magasin ya i bin givhan bigwan long hem, mo se bambae i givhan long gel ya tu. Ale gel ya i glad blong karem ol magasin. Taem tufala ya i stap storeyan, tu narafala yangfala oli stap lesin, ale oli askem tu sipos oli save karem sam magasin. Nao draeva blong bas i stopem bas, mo hem i askem from wanem evriwan oli intres long ol magasin ya. Taem hem i harem ansa, hem tu i karem sam magasin. !Be i tru se, samting ya i no save hapen sipos yangfala pablisa ya i no bin karem naf magasin blong seremaot long olgeta we oli intres!
16 Prij Long Ol Ples Blong Spel Mo Ol Ples Blong Putum Trak: Taem i no gat ren, wok blong prij long ol ples blong spel mo ol ples blong putum trak i stap, hem i wan nambawan rod blong mitim plante man. ?Yu yu traem finis blong prij long wan ples we ol man oli putum trak blong olgeta long hem taem oli go wokbaot long taon? Taem yu go long wan ples olsem, fastaem, lukluk raon. Lukaot wan man we i no stap hareap tumas, no wan man we i stap sidaon insaed long trak blong hem. Nao traem stat storeyan wetem hem. Sipos hem i glad blong storeyan, jenisim storeyan i go long mesej blong Kingdom. Traem blong prij yu wan, we wan narafala brata no sista i stap wok kolosap long yu. I nogud blong karem wan bigfala basket no mekem sam narafala fasin we i pulum ae blong ol man. Yu mas waes. Maet i moa gud blong stap smoltaem nomo long wan ples blong putum trak long hem, nao biaen, wokbaot i go long wan narafala ples. Sipos wan man i no wantem storeyan wetem yu, talem tata long gudfala fasin mo traem faenem wan narafala man we yu save storeyan wetem hem. !Wan brata we i yusum rod ya, i seremaot 90 magasin long wan manis long wok blong prij long ol ples blong putum trak long hem!
17 Samfala oli go sidaon smoltaem long wan ples blong spel. Sam narafala oli go long ol ples olsem, blong pleplei no blong spenem taem wetem ol pikinini blong olgeta. Yu no nid blong blokem olgeta, be yu save lukaot wan jans blong givim wetnes. Wan brata i statem wan storeyan wetem man we i stap katem gras long wan ples blong spel, mo hem i faenemaot se man ya i stap wari long saed blong problem blong drag mo fyuja blong ol pikinini blong hem. !Brata i statem wan Baebol stadi wetem man ya, mo tufala i mekem stadi ya oltaem long ples ya blong spel!
18 Tekem Jans Blong Prij Long Taon: Maet long sam stoa, yumi no gat raet blong prij from oli blokem yumi. Long ol ples olsem, samfala pablisa oli tekem jans blong prij. Oli sidaon long wan jea, ale oli stat storeyan wetem ol narafala we oli sidaon blong spel smoltaem. Taem oli faenem wan man we i intres, oli givim wan magasin no traket long hem long kwaet fasin, mo oli mekem plan blong visitim hem bakegen. Afta we oli stap sam menet long wan ples, oli go long narafala ples mo storeyan wetem wan narafala man. I tru, yumi mas lukaot blong no pulum ae blong ol man tumas, taem yumi stap tekem jans blong prij olsem.
19 Taem yu talem halo long wan man, soem fasin fren. Sipos man ya i glad blong storeyan, askem wan kwestin, nao lesingud long ansa blong hem. Soem se yu rili intres long samting we hem i stap talem. Soem se yu respektem ol tingting blong hem. Agri wetem hem long ol poen we oli stret.
20 Wan sista i storeyan gud wetem wan olfala woman, taem hem i stat blong tokbaot praes blong ol samting long stoa we i stap go antap tumas. Woman i agri fulwan, mo wan gudfala storeyan i gohed. Sista i askem nem mo adres blong woman ya, mo hem i visitim woman ya bakegen long sem wik.
21 Prij Long Ol Stoa: Sam kongregesen oli gat plante stoa mo ofis long teritori blong olgeta. Maet brata we i lukaot long ol teritori i mekem ol spesel map blong ol eria olsem. Sipos i gat sam narafala haos long ol map we ol stoa oli stap long olgeta, hem i save raetem long map se oli mas prij long ol stoa mo ofis long wan taem mo ol haos long narafala taem. Long sam narafala ples, oli save prij long ol stoa mo ol haos long semtaem. Maet ol elda oli askem long sam pablisa we oli naf, blong oli prij long ol stoa oltaem, blong mekem se oli no stap mestem ol stoa.
22 Sipos wan elda i askem long yu blong joen long wok ya blong prij long ol bigfala stoa, mo yu neva bin mekem wok ya bifo, wan gudfala rod blong ‘mekem tingting i strong,’ i blong prij long sam smol stoa fastaem. Afta, taem yu harem se yu no moa fraet, yu save go long ol bigfala stoa. (1 Tes. 2:2) Taem yu stap prij long ol stoa, putum klos olsem yu werem taem yu go long wan miting long Haos Kingdom. Sipos yu save mekem, go insaed long stoa taem i no gat man i stap pem samting. Askem man long stoa sipos yu save toktok wetem maneja no man we i lukaot long stoa. Toktok long kaen fasin, mo samting we i impoten tumas, tok blong smoltaem nomo. I no nid blong mekem olsem we yu wan trabol long olgeta. Plante bisnes oli gat ol man blong pem samting oli stap kam insaed oltaem, taswe oli lan long fasin we man i blokem olgeta long samting we oli stap mekem.
23 Afta we yu talem halo long man blong stoa, maet yu talem olsem: “Ol man long stoa oli bisi oltaem, taswe plante taem mifala i no save faenem olgeta long haos blong olgeta. From samting ya, mifala i kam long ples blong wok blong yu, blong givim wan magasin we bambae i pulum tingting blong yu.” Nao yu save talem wan no tu smol poen long saed blong nyufala magasin ya.
24 Maet yu traem talem olsem taem yu mitim wan maneja: “Mifala i luk se ol man blong stoa oli traehad blong savegud long ol samting we i stap hapen. Nyufala Wajtaoa ya (no Wekap!) i tokbaot wan samting we yumi evriwan i intres long hem.” Tokbaot poen ya, nao finisim storeyan olsem: “Mifala i sua se bambae yu glad taem yu ridim magasin ya.”
25 Sipos i gat sam man blong wok long stoa, maet yu luk se i stret blong askem long maneja se: “?I oraet sipos mi talem sem smol toktok long ol man blong wok blong yu?” Sipos man blong stoa i talem yes, yu no mas fogetem se yu bin promes blong tekem smoltaem nomo, mo maneja bambae i wantem we yu folem promes blong yu. Sipos wan man blong wok i wantem storeyan blong longtaem, i moagud blong visitim hem long haos blong hem.
26 I no longtaem, sam pablisa long wan smol taon oli bin joen wetem seket elda blong prij long ol stoa. Sam long olgeta oli fraet fastaem, from we oli neva joen long wok ya bifo. Be kwiktaem nomo, oli lanem fasin blong mekem wok ya mo oli haremgud long hem. Taem wan haoa i no pas yet, oli toktok wetem 37 man finis, mo oli seremaot 24 magasin mo 4 buklet. Wan brata i talem se long wan ful manis long wok blong prij long evri haos wanwan, oli no save mitim plante man olsem we oli bin mitim long wok blong prij long ol stoa long sot taem ya.
27 Faenem Ol Jans Blong Prij: Jisas i no prij long ol man long haos blong olgeta nomo. Hem i tokbaot gud nyus long evri jans we hem i kasem. (Mat. 9:9; Luk 19:1-10; Jon 4:6-15) Tingbaot olsem wanem sam pablisa oli faenem ol jans blong prij.
28 Samfala oli folem fasin blong prij long ol papa mama we oli stap wet afsaed long skul, blong karem pikinini blong olgeta i gobak long haos. Sam papa mama oli kam 20 menet bifo we skul i aot, taswe i gat taem blong storeyan gud long wan poen blong Baebol.
29 Plante paenia oli traehad blong kasem ol man we oli intres long wan spesel poen we magasin i tokbaot. Eksampel, wan sista i kasem gudfala frut taem hem i go long sikis skul blong pikinini long teritori blong kongregesen blong hem, nao hem i givimaot Wekap! (Engglis mo Franis) blong Desemba 22, 1995, we i tokbaot “Ol Skul Oli Fesem Bigfala Trabol” (“Schools in Crisis”). Mo tu, hem i go long ol ofis blong gavman we oli givhan long ol man mo famle we oli gat problem, blong givim magasin long famle laef mo magasin long fasin blong mekem nogud long pikinini. Nao ol ofis ya oli talem long hem blong kambak evritaem wetem ol nyufala magasin we oli tokbaot ol poen olsem. Hem i karem Wekap! (Engglis mo Franis) blong Maj 8, 1996, we i tokbaot ol man we oli no gat wok, i go long ofis blong gavman we i givhan long ol man blong faenem wok, ale hem i talem se oli “glad bitim mak” long magasin ya.
30 Wan distrik elda i talem se hem wetem woman blong hem, oltaem tufala i stap tekem jans blong prij taem tufala i stap pem kakae long stoa. Oli go long stoa long taem we i no gat plante man oli stap pem ol samting, mo ol man oli stap wokbaot sloslou nomo. Oli talem se oli stap storeyan gud wetem plante man.
31 Plante pablisa oli talem se oli gat gudfala frut long wok blong prij, long ol ples we ol man oli go blong wasem klos blong olgeta. Oli no jes livim ol magasin taem i no gat man i stap. Oli wantem kasem ol man wetem gud nyus, taswe oli traehad blong toktok wetem ol wanwan man we oli kam long ples ya.
32 Long sam ples, sam pablisa oli kasem raet blong prij long epot. Samtaem oli kasem bigfala glad taem oli prij long ol man blong ol narafala kantri, we i no gat plante Wetnes long kantri blong olgeta. Taem oli faenem wan man we i intres, oli givim wan traket no magasin long hem.
33 Long sam ples we ol Wetnes oli no gat raet blong prij insaed long ol store haos we oli lokemgud, oli prij long kaen fasin long ol man we oli mekem gad long ol haos ya, no long ol maneja. Mo oli yusum sem fasin ya, taem i gat wan bigfala eria wetem plante haos insaed long hem, we oli pulum fenis raon long hem mo lokem get. Wan seket elda mo sam pablisa oli yusum fasin ya long seven store haos. Long ol wanwan haos, oli talem long maneja se, nating we oli no gat raet blong go long ol store haos olsem, oli no wantem se hem i mestem ol save we i kamaot long ol nyufala magasin. Ol seven maneja oli glad blong karem ol magasin, mo oli askem long ol Wetnes ya blong karem ol nyufala magasin i kam tu. Afta, ol pablisa oli traem toktok wetem ol wanwan man long ol store haos ya long telefon.
34 Traehad Blong Prij Long Evri Ples: Blong folem promes we yumi mekem taem yumi givim laef blong yumi long Jeova, wan samting se, yumi mas harem we i impoten tumas blong talemaot mesej blong Kingdom kwiktaem long olgeta man. Blong kasem ol man long taem we i stret long olgeta, yumi mas lego samting we yumi wanwan i wantem mekem, nao maet bambae yumi “sevem sam” man. Olgeta man we oli givim laef blong olgeta i go long Jeova finis, oli mas wantem blong talem olsem aposol Pol i talem se: “Mi mekem olgeta samting ya from gud nyus, blong bambae mi save kasem haf blong ol gudgudfala samting blong gud nyus ya.”—1 Kor. 9:22, 23.
35 Mo bakegen, Pol i raetem se: “Mi mi glad moa blong tok flas from ol samting we i soemaot we mi mi no gat paoa. Long fasin ya, mi save harem we Kraes i stap lukaot long mi long paoa blong hem. . . . From we taem mi mi no gat paoa blong mi, long taem ya nao, mi mi gat paoa.” (2 Kor. 12:9, 10) Hemia i minim se, i no gat wan long yumi we i naf blong mekem wok ya long prapa paoa blong hem. Yumi mas prea long Jeova blong askem bigfala paoa blong tabu speret blong hem. Sipos yumi askem God blong givim paoa long yumi, yumi save sua se bambae hem i ansarem prea ya blong yumi. Ale, lav we yumi gat long olgeta man, bambae i pusum yumi blong lukaot ol jans blong talemaot gud nyus long olgeta, long ol defren ples we yumi faenem olgeta. Long wik we i kam, i gud we yu traem folem wan rod we haf ya i bin tokbaot.