?Olsem Wanem Blong Prij Long Ol Stoa?
1. ?Wanem sam gudfala samting long saed blong wok blong prij long ol stoa?
1 ?Olsem wanem? ?Bambae yu glad blong prij long wan teritori we klosap olgeta man oli welkamem ol strenja mo we yu faenem man long evri haos? Maet i gat teritori olsem, stret long ples we kongregesen blong yu i stap prij long hem. ?Weples? Long ol stoa. Ol pablisa we oli prij long ol stoa oli karem gudfala frut.
2. ?Wanem plan we yumi save folem blong prij long ol stoa?
2 Long teritori blong sam kongregesen, i gat wan eria we i fulap long ol stoa. Brata we i lukaot long teritori, maet i mekem ol spesel map blong eria ya. Sipos ol stoa ya oli stap long sam narafala map wetem ol haos tu, brata ya i save raetem klia long ol map ya se ol pablisa oli no mas wokem ol stoa ya. Long sam narafala map we i gat wanwan stoa nomo long olgeta, maet oli wokem ol stoa tugeta wetem ol haos. Sipos yu no bin prij long ol stoa yet, i gud yu stat long sam smol stoa fastaem.
3. ?Wanem i save mekem se yu karem moa frut long wok blong prij long ol stoa?
3 Yusum Ol Isi Tok Nomo: Taem yu prij long ol stoa, i impoten blong putum klos olsem we yu putum blong go long miting long Haos Kingdom. Mo tu, i gud blong jusum wan taem we stoa i no bisi. Traem wet gogo i no gat tumas kastoma, nao go insaed long stoa. Askem long man we i wok long stoa sipos yu save toktok wetem maneja. Yu no mas talem plante toktok tumas mo tok blong yu i mas klia. ?Yu save talem wanem?
4-6. ?Yumi save talem wanem taem yumi prij long wan maneja no ona blong stoa?
4 Taem yu toktok long man blong stoa no maneja, maet yu talem olsem: “Ol bisnesman oli bisi oltaem, taswe i hadwok blong faenem olgeta long haos blong olgeta. From samting ya, mifala i kam luk yu long stoa blong yu. Ol magasin blong mifala oli tokbaot ol samting we oli stap hapen long olgeta ples blong wol.” Nao tokbaot wan smol poen long magasin.
5 Hemia sam isi tok bakegen we yu save talem: “Plante man oli wantem save moa long saed blong Baebol be oli bisi tumas. Smol pepa ya i eksplenem wan fri kos blong Baebol stadi we i save givhan long yu blong faenem ansa blong ol kwestin we yu yu gat.” Nao soem pej 4 mo 5 blong traket ya ?Yu Yu Wantem Lanem Moa Long Saed Blong Baebol?
6 Sipos yu luk se maneja i bisi tumas, maet yu givim wan traket long hem nomo mo talem se: “Bambae mi pas bakegen long taem we yu yu no bisi. Mi glad blong save tingting blong yu long traket ya.”
7. ?Olsem wanem blong mekem se intres we yumi faenem long ol stoa i gru?
7 Mekem Intres i Gru: Yu save mekem Baebol stadi tu long stoa. Wan spesel paenia i stap karem ol niufala magasin i go oltaem long wan bisnesman. Wan dei, bisnesman ya i talem se hem i laekem tumas ol magasin. Ale paenia i soem long hem olsem wanem yumi mekem Baebol stadi long ol man wetem buklet ya Wanem. Wantaem nomo, paenia i statem stadi wetem man ya stret long stoa blong hem. From we tufala i stap stadi long stoa, tufala i no mekem longfala stadi, maet 10 no 15 menet nomo. Taem we yumi stap gohed long wok ya blong lukaot ol man we hat blong olgeta i stret, i gud yumi prij long ol stoa tu.