Prij Long Rod Blong Faenem Ol Man We Oli Intres
1 Jisas i givim oda long ol disaepol blong hem blong lukaotem ol man we oli wantem lesin long gud nyus blong Kingdom. (Mat. 10:11) Be, long plante ples tede, i stap kam had moa blong kasem ol man long haos blong olgeta. Ale, ?wanem nao yumi save mekem blong faenem ol man we oli wantem lesin we maet yumi no bin toktok wetem olgeta samtaem?
2 Wok blong prij long rod i nambawan wei blong faenem ol man we yumi no bin mitim olgeta taem yumi prij long ol haos wanwan. Yumi save mekem wok blong prij long rod, long ol bas stop, kolosap long ol bilding we i tabu blong go insaed long olgeta, long ol open ples we ol man oli stap spel long hem, mo long ol ples we ol man oli stap go long olgeta evri dei.
3 Samfala oli fraet taem yumi tokbaot wok blong prij long rod. Oli fraet blong joen long wok ya from we oli sem lelebet no oli fraet se ol man we oli no laekem mesej blong Kingdom bambae oli tok nogud long olgeta. Kolosap evritaem oli wari blong nating nomo. Olgeta we oli gat ekspiryens long wok ya, oli talem se i moa isi bitim wok blong prij long ol haos wanwan. I tru, oli faenem se ol man oli lan finis long fasin ya we samfala oli kam toktok long olgeta long rod from wan risen, mo samfala oli rere blong storeyan no lesin bitim we oli save mekem sipos yumi go long haos blong olgeta. Ale, sipos yumi mekem ‘tingting blong yumi i strong,’ bambae yumi sapraes long gudfala frut we i kamaot from.—1 Tes. 2:2.
4 ?Olsem wanem yumi save mekemgud wok blong prij long rod? Hem i impoten blong reregud. Ridim ol magasin samtaem bifo, mo jusum wan no tu poen we yu save yusum blong storeyan, we yu ting se ol man we bambae yu mitim olgeta oli save intres long hem. Sipos yu toktok blong 30 seken nomo long wan man, samting ya i stret. Mak we yumi wantem kasem i blong toktok wetem ol man wanwan, taswe i gud blong jusum wan ples we fulap man oli stap pas long hem oltaem. Nating se i gud blong gat wan pablisa we i stap wok i no longwe tumas long yu, i gud moa we yutufala i wok wanwan. Ol pablisa we oli stap stanap wanples, maet oli save stap storeyan tugeta mo oli no traem storeyangud long ol man we oli rere blong lesin long mesej blong Kingdom.
5 Sipos yu yu traem go kolosap long wan man mo toktok long hem, fasin ya i wokgud moa bitim fasin blong stanap long wan ples mo jes soem ol magasin. Traem blong lukluk i go stret long fes blong ol man. Yu mas kaen, soem fasin fren, mo tok klia taem yumi traem blong statem wan storeyan. Samtaem, yu mas wokbaot smol wetem man taem yu stap toktok wetem hem. Sipos hem i intres, askem hem blong karem magasin. Sipos hem i no wantem karem magasin, maet yu save askem hem blong karem wan traket.
6 Plante taem i gud blong rere long wan sot toktok we i stanemap wan kwestin no i talem wan poen we i pulum intres blong man. Sipos man i soem intres, traem blong askem nem blong man ya, adres blong hem, mo maet telefon namba blong hem blong yu save go visitim hem blong mekem intres ya i gru moa. Yu save talem se: “Sipos yu wantem save moa, bambae mi glad blong visitim yu long haos blong yu no mekem plan blong wan narafala Wetnes blong kam.”
7 Wan elda we i stap prij long rod i toktok long wan woman mo i faenemaot se woman ya i neva gat jans blong toktok wetem ol Wetnes long haos blong hem. Woman ya i karem wan buk mo i agri blong wan sista i visitim hem long haos blong hem long wan stret taem. Yumi save faenem plante moa man we oli wantem lesin mo givhan long olgeta, sipos yumi kamgud long wok blong prij long rod.—Wok 17:17.