Yu Save Karem Gudfala Frut Taem Yu Prij Long Rod
1. ?Wanem samting we yumi save mekem blong folem fasin blong Jisas?
1 Taem Jisas i stap prij long wol, hem i no letem wan samting i blokem hem blong toktok wetem ol man long rod mo long eni narafala ples bakegen. (Luk 9:57-61; Jon 4:7) Hem i gat wan impoten nius blong talem long ol man, taswe hem i traehad blong toktok wetem plante man. Tede, wok blong prij long rod i wan nambawan fasin blong prij we i save givhan long ol man blong oli kasem waes we i kamaot long God. (Prov. 1:20) Taem yu mekem wok ya, yu no mas wet se man i kam toktok long yu, mo yu mas gat fasin luksave. Sipos yu mekem olsem bambae yu karem gudfala frut long wok ya.
2. ?Taem yu prij long rod, i moagud yu mekem wanem i bitim we yu wet long man blong i kam toktok long yu ?
2 Yu No Wet: I gud sipos yu nao yu go toktok long man, i bitim we yu sidaon no yu stanap samples, nao yu wet we wan man i kam toktok wetem yu. I gud yu lukluk man, yu smael long hem, mo yu kaen, taem yu toktok long hem. Sipos yu stap wok wetem sam narafala pablisa, i gud yufala i wok wanwan bitim we yufala i hivap wanples blong toktok long wan man. Afta we yu mitim wan man we i gat intres, yu no wet long man se hem i askem yu blong visitim hem. Sipos yu luk se i stret, i gud yu askem long man, wetaem yu save storian wetem hem bakegen no olsem wanem blong mitim hem bakegen. Sam pablisa oli prij long rod long sem ples oltaem. Samting ya i mekem we taem oli mitim wan man, oli save mitim man ya bakegen long sem ples ya nomo.
3. ?Taem yu prij long rod, fasin luksave i save givhan long yu olsem wanem?
3 Yu Mas Gat Fasin Luksave: Yu mas tingting gud taem yu jusum ples we bambae yu stanap long hem mo hu man we bambae yu toktok wetem hem. Yu no mas ting se yu mas prij long evri man we i wokbaot long rod. Yu mas gat fasin luksave. Sipos yu luk we wan man i stap wokbaot hareap, maet i moagud yu letem hem i pas. Taem yu prij long fored blong ol stoa no ofis, yu mas lukaot gud se fasin blong yu i no mekem bos i wari long wanem we yu stap talem long ol man we oli wantem kam long stoa no ofis blong hem. I moagud yu prij long ol man taem oli finis wok mo oli stap kamaot long ofis blong olgeta, i bitim we yu prij long olgeta taem oli stap go long wok. Taem yu kam long wan man blong toktok wetem hem, yu mas lukaot se yu no mekem hem i fraet no i sek. Yu mas gat fasin luksave tu, taem yu givim ol buk mo magasin. Sipos man i lesin be i no rili gat intres, i moagud yu givim traket i bitim we yu givim magasin long hem.
4. ?From wanem wok blong prij long rod i karem frut mo i mekem yumi glad?
4 Fasin ya blong prij long rod i givim janis long yumi blong saksakem plante sid blong trutok long wan sotfala taem nomo. (Prija 11:6) Taem yumi prij long rod, maet yumi storian wetem samfala we oli no stap long haos blong olgeta taem yumi prij long ol haos wanwan. I gud blong mekem plan blong joen long wok blong prij long rod. Hemia wan nambawan fasin blong prij we i karem frut mo we i save mekem yumi glad bigwan.