Talemaot Gud Nyus—Yumi Yusum Olkaen Rod Blong Prij
1 Proveb 1:20 i talem se: “Waes fasin we i tru i gohed blong singaot strong long rod. Long ol open ples, oltaem hem i stap mekem ol man oli harem voes blong hem.” Vas ya i tru tumas tede, from we ol Wetnes blong Jeova oli gohed strong blong talemaot gud nyus blong Kingdom, nomata wanem samting i hapen. Sem mak long Jisas mo ol profet bifo, yumi stap prij long ol man from we yumi rili intres long olgeta. Ale samting ya i pusum yumi blong talemaot trutok long ol man blong olgeta ples.—Jer. 11:6; Mak 6:56; Luk 13:22, 26.
2 Long tingting blong plante long yumi, yumi glad moa blong givim wetnes long man taem hem i stap long haos blong hem. Be tede, yumi agri se plante moa man oli no stap long haos blong ol taem yumi kilkilim doa blong olgeta. Mo tu, plante taem yumi toktok long sem man nomo, be yumi no gat jans blong toktok wetem ol famle blong hem. Taswe, yumi mas mekem plan blong yusum olkaen rod blong prij. Fasin blong prij olsem i mas gat ples blong hem long minista wok blong yumi.
WAN POSITIV TINGTING
3 Yumi save yusum olkaen rod blong prij long ol man nomata wanem samting i hapen mo wanem ples yumi stap long hem. Impoten samting, se yumi lukaot sam rod we yumi save yusum blong prij. Plante pablisa, taem oli go long wok no oli kambak, oli givim wetnes long ol man. Oli prij long bas, no taem oli go spel samples. Samfala oli prij long ol man taem oli spel long wok. Sam narafala oli wajemgud ol rod blong prij taem oli go pem samting long stoa. . . . Sam moa bakegen oli gat gudfala toktok wetem ol man we oli stap wokbaot nomo. I luk olsem we ol pablik ples, ol epot, ol ples blong tekem bas mo samfala ples bakegen, oli ples we yumi save yusum olkaen rod blong prij long hem.
4 Sipos yu wantem kasem gud frut taem yu yusum olkaen rod blong prij, fastaem yu mas mekem gud fren wetem man we yu toktok wetem. Yu mas kaengud long hem mo yu mas soemaot long man ya se yu yu rili intres long hem. !Yu mas smael! Mo yu mas lukluk hem taem yu toktok long hem. Fastaem, yu save storebaot ol narafala samting. Taem olsem i neva lus from we yu yu stap mekem rod blong statem wan toktok wetem man ya. Tingtinggud long ol samting we yu luk raon long yu. Wan eksampel: Wantaem, wan sista i mitim wan man we i wari long wan samting. Ale sista ya i statem toktok blong hem olsem: “Mi luk we yu yu stap tingting long wan samting. Ol samting we i stap hapen long yumi tede i mekem yumi wanwan i gat ol wari blong yumi. ?Be yu yu bilif se wan dei bambae . . . ? ” Be blong kasem tingting blong man olsem, yumi mas reregud fastaem.
YUMI REREGUD FASTAEM
5 Fastaem olgeta, yumi mas tekem taem blong tingting long ol samting we ol man oli save intres long hem, olsem praes blong ol samting, ol fasin blong stil no blong spolem man, . . . Mo tu, yumi save tingbaot ol gudfala kwestin we yumi save askem blong statem wan toktok. Blong mekem olsem, yumi save yusum ol poen we i stap long stampa haf “Ol Fas Tok Long Wok Blong Prij” (Introductions for Use in the Field Ministry) long Reasoning buk. Antap bakegen, sipos yumi talemaot wan samting we i nyuwan, bambae man i intres moa long toktok blong yumi. Long buk Qualified to be Ministers (pej 188, haf 7) [pej 193, haf 7], yumi ridim ol tok ya: “Sipos ol Wetnes oli tekem taem blong ridimgud ol gudfala poen we i stap long Wekap!, samting ya bambae i halpem olgeta blong tokbaot ol samting we ol man oli intres long hem. Mo tu, bambae oli toktok long wan fasin we i pulum tingting blong man. ‘Sam Nyus Long Wol’ i givhan bigwan long saed ya. I gud we yumi ridim Wekap! blong kasem save long ol samting we i hapen long wol. Sipos yumi mekem olsem, bambae yumi save storeyan long kolosap evri samting, mo afta, yumi save pulum tingting blong ol man long ol tiokratik rod.”
6 Antap bakegen, yumi mas gat evri buk we yumi nidim blong prij olsem. Wan Baebol we saes blong hem i smol i save givhan bigwan long yumi. Ol traket oli stretgud long wok ya. Blong ol traket oli stap gud nomo, samfala oli putum olgeta long poket plastik, no oli haedem olgeta long sam pepa we skin blong olgeta i strong, mekem se ol traket oli no benben. Laswan olgeta, sipos yu wari lelebet, yu no mas foget blong prea long Jeova blong hem i givhan long yu, ale bambae yu no fraet mo yu gat gudhan blong givim wetnes long man.—Efes. 6:18, 19.
7 Plante pablisa we bifo oli fraet lelebet blong yusum olkaen rod blong prij oli talem se naoia oli laekem moa fasin blong prij olsem, i bitim ol narafala haf blong minista wok. Taswe, yumi mas yusum olkaen rod blong prij wetem “waes we i tru,” blong “mekem ol man oli harem” gud nyus blong Kingdom. !Bambae yumi mekem ol man oli harem gud mo yumi leftemap nem blong Jeova!—Prov. 1:20.