Ol Miting Oli Pusum Yumi Blong Mekem Ol Gudfala Wok
1 Tu impoten haf blong wosip blong yumi, hemia blong go long ol miting mo joen long wok blong prij. Tufala samting ya oli joen. Wan i gat paoa long narawan. Ol Kristin miting oli pusum yumi blong mekem ol gudfala wok. Wok we i nambawan moa, hemia blong talemaot Kingdom mo mekem ol disaepol. (Hib. 10:24) Sipos yumi no moa go long ol miting, i no longtaem maet bambae yumi no moa prij from we i no moa gat ol miting blong pusum yumi blong prij.
2 Long ol miting evri wik, yumi kasem ol tijing long saed blong speret we i blong pusum yumi blong prij. Oltaem yumi harem tok se taem i sot, mo samting ya i pulum yumi blong karem mesej blong Baebol i go long ol narafala blong oli save kasem laef from. Yumi kasem tok blong leftemap tingting blong yumi mo givim paoa long yumi blong stanap strong long wok blong prij. (Mat. 24:13, 14) Sipos yumi tekem evri jans blong givim ansa long ol miting, yumi lan blong talemaot bilif blong yumi long fored blong ol narafala. (Hib. 10:23) Taem yumi joen long Tiokratik Skul, yumi kasem trening blong kam moagud long wok blong prij mo blong gat gudhan blong tijim narafala.—2 Tim. 4:2.
3 ?Olsem Wanem Miting Blong Kingdom Wok i Pusum Yumi Blong Prij?: I gud sipos yumi evriwan i ridim ol haf long Kingdom Wok Blong Yumi bifo long miting. Olsem nao, save ya i stap klia long tingting blong yumi taem yumi go long Miting Blong Kingdom Wok, mo taem yumi lukluk ol pleplei we oli kamaot long miting ya. Ale, taem yumi go prij, yumi save tingtingbak long Kingdom Wok Blong Yumi, tingbaot ol rod blong storeyan we ol pleplei oli bin soemaot, mo givim wan wetnes we i moagud. Hemia nao samting we i bin hapen long plante pablisa.
4 Biaen long ol Miting blong Kingdom Wok, samfala oli mekem plan wetem narafala blong prij tugeta. Ol poen blong miting oli stap klia long tingting blong ol pablisa mo oli wantem traem yusum olgeta, from we miting ya i bin pulum olgeta blong joen long wok blong prij evri wik.
5 I no gat wan narafala samting we i save tekem ples blong ol Kristin miting blong yumi. Long ol miting ya, yumi kam wanples wetem ol narafala man blong wosip long God, mo yumi kasem tok we i pusum yumi blong mekem ol gudfala wok. Sipos yumi wantem karem plante frut long wok blong prij, yumi mas kam long ol miting blong kongregesen oltaem. Blong soem tangkyu from nambawan presen ya we Jeova i givim, yumi ‘no mas lego ol miting blong kongregesen.’—Hib. 10:25.