?Yu Yu Mekem Wanem Taem Ol Man Oli No Wantem Lesin?
1 Taem ol man oli no wantem lesin, hemia i min se oli no intres mo oli no kea long mesej blong yumi, oli no gat wan filing no glad we i pusum olgeta blong lesin. Ating fasin ya i kamaot moa i bitim ol narafala problem long wok blong prij, mo hem i hadwok moa blong winim tu. ?Yu yu mekem wanem taem ol man oli no wantem lesin? ?Fasin ya i mekem se yu yu no moa joen plante long wok blong prij? ?Yu save mekem wanem blong winim problem ya mo mekem mesej blong Kingdom i kasem ol man?
2 Fastaem, traem luksave from wanem ol man long ples blong yu oli no wantem lesin. ?Maet oli no glad long ol lida blong politik mo skul blong olgeta? ?Oli harem se i no gat wan rod blong winim ol problem blong olgeta? ?Oli faenem i hadwok blong bilif long promes se wol ya bambae i kam moagud long fyuja? ?Oli rere blong tingbaot ol samting long saed blong speret nomo sipos oli save luk wan gudfala risal kwiktaem long laef blong olgeta?
3 Tokbaot Hop Blong Kingdom: I no gat wan problem we Kingdom i no naf blong winim. Taswe, long olgeta jans we yumi gat, yumi mas tokbaot promes blong Kingdom. Yumi mas yusum sam stampa poen we oli kamaot long ol vas blong Baebol, nating se maet yumi no gat jans no yumi luk se i no wan gudfala taem blong soem wan vas long Baebol. (Hib. 4:12) Be, ?olsem wanem yumi save lidim storeyan i go kasem mak ya we yumi tokbaot Kingdom?
4 Ol man oli mas kasem save from wanem yumi kam luk olgeta. Oli mas luksave se yumi mekem samting ya from we yumi laekem ol man raonabaot long yumi mo yumi wari long laef blong olgeta. Yumi save askem wan kwestin long olgeta we yumi bin tingtinggud long hem fastaem, olsemia: “?Yu ting se wanem nao rod blong winim [wan problem long ples blong yumi]?” Sipos wan rod blong storeyan i no wokgud, traem wan narafala rod.
5 Long wan ples we ol man oli rij mo oli no wantem lesin long mesej blong Kingdom, ol pablisa oli bin traehad blong faenem wan fastok we i pulum intres blong olgeta. Wan hasban mo waef tufala i yusum fastok ya blong seremaot Save buk: “?Yu yu ting se yumi nidim gudfala edukesen blong gohed gud long wol ya? ?Yu yu agri se wan gudfala edukesen i minim se yumi gat save long saed blong Baebol tu?” Long wan aftenun nomo, tufala i seremaot tri buk. Wan woman we i karem buk ya Save i talem long nekis visit, se hem i ridim buk ya fulwan, mo se hem i glad sipos tufala i stadi Baebol wetem hem.
6 Taem yu fesem problem ya we ol man oli no wantem lesin, traem ol defren fastok, askem ol gudfala kwestin, mo yusum paoa blong Tok blong God. Olsemia nao, maet yu save halpem sam man, blong oli bilif long nambawan hop blong Kingdom.