Olgeta We Oli Lidim Kongregesen—Elda We i Lukaot Long Wok Blong Prij
1 Elda we i lukaot long wok blong prij i rili intres long evri samting we i blong mekem wok blong prij i go moa long teritori we kongregesen blong yumi i stap wok long hem. Taswe, wok blong hem i impoten tumas blong halpem yumi blong mekemgud wok ya blong talemaot gud nyus. From we hem i gat strong tingting blong prij, hem i lidim evri plan we oli joen wetem wok ya. From we hem i gat gudhan blong tij, hem i halpem ol wanwan pablisa blong kamgud moa long minista wok blong olgeta.—Efe. 4:11, 12.
2 Elda ya i jekem wok blong ol man blong givhan we oli lukaot long ol buk, magasin, mo teritori. I wok blong hem blong meksua se i gat inaf buk, magasin, mo pepa blong prij, evri manis blong ol brata oli yusum. Wan taem wan yia, hem i lukluk bakegen long olgeta teritori blong faenem ol haos we i tabu blong prij, ale hem i jusum sam brata we oli nafgud blong oli visitim ol haos ya.
3 Elda we i lukaot long wok blong prij, hem i lukaot tu long ol defren fasin blong prij, olsem prij long taon, long ol rod, mo long telefon. Hem i rere oltaem blong mekem ol plan blong holem ol miting blong prij long ol dei blong wik, mo long ol holide tu. Hem i rili gat intres long wok blong mekem ol Baebol stadi. Hem i traem faenem sam rod blong givhan long olgeta we oli no prij plante no we oli no moa prij, blong oli kam strong bakegen long saed blong speret. Hem i tinghevi long wok blong ol paenia, mo i folem program ya “Ol Paenia Oli Givhan Long Ol Narafala”.
4 Elda we i lukaot long wok blong prij i memba blong Kongregesen Sevis Komiti. Hem i mas talem sipos i gat nid blong jenisim wan samting long ol defren grup blong Buk Stadi. Taem hem i visitim grup blong yu, i gud blong no mestem visit blong hem mo i gud blong joen wetem hem long wok blong prij.
5 Evriwan insaed long kongregesen oli mas glad blong wok wanples wetem elda we i lukaot long wok blong prij. Samting ya bambae i halpem yumi blong kam moa gud long wok blong mekem disaepol, mo bambae yumi faenem moa glad long minista wok blong yumi.