Yumi Mas Gobak Bakegen Mo Bakegen
1 ?Fastaem we wan Witnes i toktok wetem yu, ?yu akseptem gud nius wantaem? Sipos yu no bin mekem olsem, i sua se yu gat tangkiu from we ol Witnes blong Jeova oli gohed blong kam bakegen mo bakegen, go kasem taem we yu agri blong stadi Baebol. I gud we yu tingbaot samting ya taem yu prij plante taem long teritori blong yu.
2 Laef blong ol man i stap jenis oltaem. Sam niufala samting oli kamaot long laef blong olgeta, mo oli fesem niufala problem. Oli harem sam nius blong wol we i mekem se oli wari, oli kasem sam trabol long saed blong mane, no i gat sam memba blong famle blong olgeta we oli sik no oli ded. Ol samting ya oli save pulum olgeta blong wantem save from wanem i gat plante trabol olsem. Yumi mas luksave ol samting we oli stap mekem tingting blong man i trabol, nao bambae yumi save givim wan mesej we i leftemap tingting blong olgeta.
3 Hemia Wan Wok We i Sevem Man: Tingbaot ol wokman we oli traehad blong sevem sam man long ples blong wan disasta. Nating se sam wokman oli no faenem plante man long ples ya we oli stap wok long hem, oli no kam slak mo oli no lego jes from we sam narafala wokman oli faenem moa man long wan narafala ples. Jeova i no stopem yet wok blong yumi blong sevem man. Evri yia, ol Witnes oli faenem plante handred taosen man we oli wantem stap sef tru long “bigfala trabol.”—Rev. 7:9, 14.
4 ‘Olgeta man we oli singaot long nem blong Jeova, hem bambae i sevem olgeta.’ (Rom 10:13-15) Ol tok ya oli mas pulum yumi evriwan blong gohed long wok blong prij. Stat long taem we ol Witnes oli prij long teritori blong yumi kam kasem naoia, ol pikinini oli kam bigman, mo oli kam naf blong tingting olgeta wan nomo long saed blong fiuja blong olgeta mo mining blong laef. Yumi neva save hu bambae i lesin. (Pri. 11:6) Plante man we bifo oli agensem ol Witnes, naoia oli akseptem trutok. Wok blong yumi i no blong jajem ol man. Yumi mas gohed blong givim jans long olgeta blong harem gud nius, mo blong stap sef taem olfala wol ya bambae i lus. Olsem ol faswan disaepol blong Jisas oli mekem, yumi mas ‘go oltaem’ blong toktok long ol man, mo traem blong pulum intres blong olgeta long mesej blong Kingdom.—Mat. 10:6, 7.
5 Yumi gat jans yet blong prij, mo samting ya i soem se Jeova i gat fasin sore. (2 Pita 3:9) Taem yumi talemaot gud nius long ol narafala bakegen mo bakegen, yumi soemaot klia se God i gat lav, mo long rod ya yumi presem hem.