“!Mifala i Wok Long Teritori Ya Plante Taem Finis!”

¹ ?Samtaem yu gat tingting ya se maet i no moa gat man olsem sipsip long teritori blong yufala from we yufala i wok long hem plante taem finis? Maet yu bin ting se: ‘Mi save se bambae ol man ya oli no lesin. ?From wanem yumi stap gobak blong luk olgeta ya we oli no intres?’ I tru se plante taem yumi wok long sem teritori bakegen. Be, yumi mas luk long gudfala saed blong hem, i no long nogud saed. ?From wanem? Tingbaot fofala risen ya.

² Yumi Kasem Ansa Long Ol Prea Blong Yumi: Jisas i talem se: “Tru, i gat plante kakae plante tumas i stap long garen we i rere finis, be smol man nomo oli stap blong karem i kam. Yufala i mas askem strong long masta blong garen ya, blong hem i sanem sam moa man oli go karem kakae blong hem i kam.” (Luk 10:⁠2) Blong plante yia yumi bin askem Jeova blong givim moa help long yumi. Naoia long plante ples, yumi gat fulap man blong mekem wok, mo plante taem yumi stap wok long sem teritori bakegen. Yumi mas glad from we samting ya i soem se Jeova i stap ansarem ol prea blong yumi.

³ Gudfala Frut i Kamaot Taem Yumi Gohed Oltaem Blong Wok: Long ol teritori we yumi wok long hem plante taem finis, i gat sam man yet we oli stap lesin long mesej blong Kingdom mo sloslou oli kasem save long trutok. From samting ya, yumi mas go prij bakegen mo bakegen wetem tingting ya se bambae yumi save faenem moa man we oli gat gud hat. (Aes. 6:​8-​11) Yumi “mas go” oltaem long ol man we oli stap long teritori blong yumi, olsem we ol disaepol blong Jisas oli bin mekem. Yumi mas traehad moa blong pulum olgeta blong oli intres long Kingdom blong God.​—⁠Mat. 10:​6, 7.

⁴ Long Potugal plante kongregesen oli prij long semfala teritori bakegen evri wik, be oli stap faenem yet ol man we oli olsem sipsip. Wan sista long ples ya i gat wan gudfala tingting. Hem i talem se: “Evri moning bifo we mi go prij, mi prea long Jeova blong i halpem mi blong faenem wan man we i intres blong stadi long Baebol.” Wan dei, hem i wokem rod blong stadi wetem ol man we oli wok long ples blong katem hea. Be, biaen i gat wan woman nomo we i kam blong stadi. Woman ya i talem se: “Ol narafala oli no intres, be mi mi intres blong stadi.” Bifo we wan manis i pas, woman ya i stap mekem Baebol stadi wetem tu narafala man finis. Smoltaem biaen hem i baptaes, mo i joen long wok blong paenia.

⁵ Wok Ya i Stap Go Kasem Mak Blong Hem: Gud nius ya i stap go kasem olgeta ples long wol, olsem we Jisas i bin talem finis. (Mat. 24⁠:14) Long sam ples ol man bambae oli “no wantem lesin long [yumi],” nating se i olsem, wok blong prij i givim woning long olgeta. Yumi save se sam man bambae oli no wantem lesin long yumi no bambae oli agensem trutok. Be, olgeta ya oli mas harem klia woning long saed blong jajmen blong Jeova we i klosap.​—⁠Esik. 2:​4, 5; 3:​7, 8, 19.

⁶ Yumi No Finisim Wok Ya Yet: I no yumi blong jusum se wetaem nao bambae wok blong prij i stop. Jeova nomo i save wetaem bambae wok ya i finis. Hem i save sipos i gat sam man long teritori blong yumi we bambae oli lesin long gud nius. Tede, sam man oli talem se oli no intres. Be ol bigfala jenis we i save hapen long laef blong olgeta olsem maet oli lusum wok, kasem wan bigfala sik, lusum wan memba blong famle no fren we i ded, i save mekem se maet long nekis taem bambae oli rere blong lesin long yumi. From we ol man oli harem plante nogud toktok long saed blong yumi no oli bisi tumas long wok blong olgeta, maet oli neva, harem gud nius we yumi stap talemaot. Fasin blong go luk olgeta bakegen mo bakegen maet bambae i mekem se oli luksave mo oli wantem lesin.

⁷ Long ol yia we oli jes pas, i gat plante yangfala we oli mared mo naoia oli gat prapa famle blong olgeta, ale maet oli stat blong tinghevi moa long laef. Maet oli stap askem ol kwestin we Tok blong God nomo i save ansarem. Wan yangfala mama i singaot tu Witnes i go long haos blong hem, mo i talem long tufala se: “Taem mi mi wan smol gel, mi no kasem save from wanem mama i no wantem lesin long ol Witnes mo i talem long olgeta se hem i no intres. Be ol Witnes oli wantem tokbaot Baebol nomo. Mi tekem wan disisen se taem mi kam bigman, mi mared, mo mi gat prapa haos blong mi, bambae mi askem ol Witnes blong Jeova blong kam mo tokbaot Baebol long mi.” Hemia nao samting we hem i mekem, mo ol Witnes we oli storian wetem hem oli glad from.

⁸ ?Yu Yu Save Kam Moa Gud Long Wok Ya? Maet i no ol man long teritori blong yumi we oli mekem i had long yumi blong gohed blong prij long sem ples oltaem. Samtaem yumi wanwan nomo, yumi i mekem i had long yumi bakegen. ?Taem yumi stat blong prij long wan teritori, yumi gat nogud tingting finis long saed blong teritori ya? Samting ya i save gat paoa long fasin blong yumi, wetem voes mo fes blong yumi taem yumi stap toktok wetem wan man. I gud blong wokem wan gudfala tingting mo smael long man. Traem wan niufala rod blong storian. Jenisim ol fastok blong yu, mo traehad blong kam moa gud long saed ya. Maet yu save jenisim kwestin we yu stap askem long stat blong storian no maet yu save ridim wan defren vas blong Baebol taem yu storian. Askem wanem rod blong storian we ol narafala brata mo sista oli faenem se i wokgud long teritori ya. Prij wetem ol defren pablisa mo ol paenia, mo makemgud wanem i mekem se wok blong olgeta i karem gudfala frut.

⁹ Jeova i glad mo i blesem wok blong talemaot Kingdom. Taem yumi joen long wok ya, hemia i soem se yumi lavem hem mo ol man we oli stap raonabaot long yumi. (Mat. 22:​37-​39) Taswe i gud we yumi mekem wok blong yumi go kasem en blong hem, we yumi no taed blong prij long sem teritori bakegen mo bakegen.