Sipos Yu Gat Wan Prapa Teritori Blong Yu, ?Samting Ya i Save Givhan Long Yu?
1. Prapa teritori blong yu, ?hem i wanem?
1 Prapa teritori blong yu, ?hem i wanem? Sipos kongregesen blong yu i gat plante teritori, maet yu wantem kasem wan prapa teritori blong yu, ating wan we i stap klosap long haos blong yu. Long Kingdom Wok Blong Yumi blong Jenuware 2007, long pej 6 (Organized, pej 103), i talem se sipos yu gat prapa teritori blong yu, “bambae yu no lusum plante taem blong wokbaot i go longwe long teritori, mo yu save gat moa taem blong prij. Sipos yu wantem, yu save singaot wan narafala pablisa blong i wok wetem yu long teritori ya.”
2. ?Sipos yu gat wan prapa teritori blong yu, hemia i save givhan olsem wanem long wok blong prij?
2 Bambae Yu Givhan Long Wok Blong Prij: Sipos yu tekem wan teritori we i stap klosap long ples blong wok blong yu, yu save prij long hem afta long wok long medel dei, no long aftenun. Maet yu prij wetem wan narafala pablisa we i wok klosap long ples blong wok blong yu. Sipos yu tekem wan teritori we i stap klosap long haos blong yu, yu mo famle blong yu i save prij long hem long sapa. Sipos yu no joen long miting blong prij, i gud yu mekem wan prea bifo we yu go prij. (Fil. 4:6) Mo tu, i gud yu skelem taem we yu spenem blong prij long prapa teritori blong yu, mo taem we yu spenem blong prij wetem grup blong prij long kongregesen. Hemia i tru moa long ol wiken, taem plante pablisa oli joen wanples blong go prij. Long taem olsem, i moa gud blong sapotem grup blong prij.
3. ?Wanem gudfala samting i save kamaot taem yu gat wan prapa teritori blong yu?
3 Ol Gudfala Samting We Oli Save Kamaot From: Sipos yu gat wan prapa teritori blong yu, yu save prij long hem long eni taem we yu yu fri. Yu save spenem moa taem blong prij, from we yu no nid blong wokbaot i go longwe. Samting ya i givim janis long samfala blong oli kam haftaem mo fultaem paenia. From we yu prij long wan teritori we i klosap long ples blong yu, i isi blong yu gobak visitim ol man we oli wantem save moa long trutok, mo mekem Baebol stadi blong olgeta. Plante pablisa oli luk se taem oli gat wan teritori, hemia i givhan long olgeta blong oli save ol man long teritori ya, mo ol man ya oli trastem olgeta, antap moa taem ol pablisa ya oli mas gobak long teritori ya plante taem blong finisim. ?Olsem wanem long yu? Sipos yu wok long wan prapa teritori blong yu, ?samting ya i save givhan long yu mo famle blong yu, blong yufala i finisim gud wok ya blong talemaot gud nius?—2 Tim. 4:5.