Olgeta We Oli Lidim Kongregesen—Elda We i Lukaot Long Buk Stadi
1 Ol elda mo ol man blong givhan oli tinghae long wok ya blong lukaot long wan Buk Stadi. Ol brata we oli naf blong mekem samting ya oli save se wok blong lukaot long ol nid long saed blong spirit blong wan grup blong Kristin brata mo sista, hemia wan bigfala responsabiliti. Ol brata ya oli mas kasem tri bigfala mak.
2 Wan Gudfala Tija: Elda we i lukaot long Buk Stadi i mas reregud evri wik blong mekem se olgeta memba blong grup oli kasem gud ol poen blong stadi. Hem i traehad blong pulum olgeta blong haremgud long stadi. Bambae hem i no mekem tumas komen, be hem i askem sam kwestin we oli leftemap ol stamba poen blong stadi. Hem i wantem se evriwan oli intres long stadi, mo oli kasem wan gudfala tijing. Hem i pulum evriwan blong joen long toktok. Hem i gat mak blong bildim olgeta long saed blong spirit, blong soemaot ol poen blong stadi we oli givhan long laef evridei, mo blong mekem se stadi i save tajem tingting mo hat tu blong evriwan.—1 Tes. 2:13.
3 Wan Man Blong Lukaot Sipsip We i Givhan Long Ol Narafala: Elda we i lidim Buk stadi i olsem “strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren.” (Aes. 32:2) Hem i rili kea long evriwan long grup blong hem, mo taem wan pablisa i gat tingting we i foldaon, hem i halpem pablisa ya long saed blong spirit.—Esik. 34:15, 16; 1 Tes. 2:7, 8.
4 Wan Brata We i Gat Strong Tingting Blong Joen Long Wok Blong Prij: Brata we i lidim Buk Stadi i traehad blong pulum evriwan blong joengud oltaem long wok blong prij. Hem i soem eksampel long wok ya, from we hem i save se fasin blong prij oltaem, blong gat strong tingting mo blong stap glad oltaem bambae i pulum ol narafala blong mekem i sem mak. (Kol. 4:17; 2 Tes. 3:9) Hem i mekem plan tu blong prij wetem ol wanwan pablisa blong grup blong hem. Sipos hem i gat strong tingting blong mekem se yumi kam moa gud long wok blong prij mo long fasin blong tij, elda we i lidim Buk Stadi i save givhan long yumi blong kasem ol mak ya.—1 Tim. 4:16; 2 Tim. 4:5.
5 Jeova i rili blesem yumi taem hem i givim sam man olsem, we oli laekem yumi mo oli rere blong givhan long yumi long saed blong spirit. (1 Tes. 5:14) I stret we yumi joen oltaem long buk stadi mo yumi stap tru long fasin blong sapotem wok blong prij. Olsem ya bambae yumi soem se yumi haremgud from ol nambawan presen ya we Jeova i mekem long yumi.—Hib. 10:25.