Yusumgud Ol Buk Blong Yumi
1 Ol man oli holem plante milyan buk long plante laebri long evri ples long wol. ?Be, ol buk ya oli karem wanem blesing long ol man? (Pri. 12:12) I gat sam buk we oli rili moa sas, i bitim ol milyan buk ya, hemia ol buk we oli tokbaot Kingdom blong God mo ol samting we hem bambae i mekem blong givhan long ol man. Long manis Janewari bambae yumi seremaot eniwan long ol buk ya blong 192 pej. Yumi save seremaot ol buk ya, Save mo Family Happiness blong 130 VT.
2 Oli Rili Gat Bigfala Paoa: Yumi mas rimemba se ol buk ya oli eksplenem Trutok. Sipos yumi kasem save samting ya, mesej blong Kingdom we i stap long olgeta i save sevem laef blong man. (Jon 17:3) Taswe, bambae yumi traehad blong yusum gud olgeta buk blong yumi. I klia se Save buk mo buklet Wanem, oli nambawan blong statem sam Baebol stadi. From samting ya, bambae yumi yusum olgeta fastaem.
3 Stori blong wan woman i soem klia from wanem ol buk blong yumi oli impoten tumas. Woman ya i kasem sam olfala buk blong Sosaeti we bubu woman blong hem i livim taem hem i ded. Wan Kristin sista i askem long hem sipos hem i save bigfala praes blong ol buk ya. Woman ya i ansa se: “Mi no save, ?be olsem wanem mi save faenem trufala praes blong olgeta?” Woman ya i agri blong stadi Baebol, mo hem i akseptem trutok. Ale, hem i luksave se ol buk blong bubu blong hem oli sas tumas. !Yes, ol olfala buk ya we hem i kasem from bubu blong hem, oli rili gat wan bigfala praes!
4 Traehad Blong Seremaot Olgeta: I gud blong seremaot oltaem ol buk blong yumi long haos wanwan. Be taem yumi gobak blong visitim wan man, yumi no mas fogetem blong soemaot ol buk blong yumi long hem tu, antap moa sipos yumi save se hem i laekem ridim. Yumi no mas fogetem tu olgeta we oli gat wan sabskripsen long Wajtaoa no Wekap, mo olgeta we yumi visitim long ol rod magasin blong yumi. ?Oli gat finis Save buk, Family Happiness buk, Man We i Hae Moa, no ol niufala buk we oli kamaot long laswan distrik asembli? Yumi no mas fogetem se olgeta buk ya oli rere long Engglis mo long Franis, mo plante oli kamaot long Bislama tu. Yu save givhan long ol studen blong yu sipos yu givim long olgeta sam buk, olsem Reasoning buk, we oli save halpem olgeta blong kasem moa save long saed blong trutok. No fogetem blong askem ol buk we yu no gat yet long laebri blong yu. Olsemia, bambae yu gat wan nambawan tiokratik laebri we i save halpem yu bigwan taem yu stadi Baebol yu wan. Yu save odarem ol buk ya long Haos Kingdom blong yu.
5 I nogud yumi letem ol buk blong yumi oli slip long kabod. I moagud yumi letem olgeta oli tajem ol man we yumi faenem long wok blong prij blong oli save “tinghevi long God, oli ona long hem, mo oli obei long ol tok blong hem.”—Pri. 12:13.