Ansa Long Wan Kwestin
◼ ?Wanem ol buk we oli mas stap long Tiokratik Skul laebri?
I gat fulap buk long saed blong speret oli stap blong givhan long ol man blong God. Plante pablisa oli no gat olgeta evriwan, taswe Tiokratik Skul laebri long Haos Kingdom i givim jans long olgeta blong stadi long ol samting we maet oli no gat jans blong stadi long hem sipos i no gat laebri. From samting ya, laebri i mas gat plante defren Baebol i stap long hem, ol buk blong Sosaeti we yumi stap yusum naoia, ol Kingdom Wok Blong Yumi, ol baond volyum blong Wajtaoa mo Wekap!, mo ol indeks blong Watch Tower Publications. Mo tu, i mas gat wan gudfala diksonari we i gat ol tok blong naoia i stap long hem. Sipos i gat rod, i gud blong putum sam insaeklopedia, buk blong ol map, mo sam buk long saed blong ol wod mo histri, oli go long laebri tu. Be, faswan samting, hemia ol buk we ‘slef we i stret mo waes’ i givim long yumi.—Mat. 24:45.
I gat sam ripot i kamaot se, samtaem i gat sam buk we oli no stret, oli stap long Tiokratik Skul laebri. I no stret blong putum ol store buk blong wol, ol buk we ol man oli raetem blong daonem Baebol, mo ol buk we oli tokbaot ol waes blong wol mo wok blong ol rabis speret, oli go long laebri. Long Tiokratik Skul laebri, i mas gat ol save nomo we i givhan long yumi blong gohed moa long saed blong speret.—1 Tim. 4:15.
Elda we i lukaot long Tiokratik Skul, hem nao i gat responsabiliti blong laebri, nating se maet wan narafala brata i kasem wok blong givhan long hem blong lukaot long laebri ya. Elda ya i mas meksua se i gat ol nyufala buk blong yumi oli stap long hem, kwiktaem nomo afta we oli kamaot. Hem i mas meksua tu, se i gat nem blong kongregesen i stap klia long faswan pej blong ol buk ya. Wan taem evri yia, i mas gat wan i jekem ol buk blong luk sipos oli nidim blong fiksimap sam buk we oli brobrok, no sakem sam buk mo putum sam narawan long ples blong olgeta.
Evriwan oli save wok tugeta blong lukaot long laebri. Oli mas lukaotgud long ol buk taem oli yusum olgeta. Ol papa mama oli no mas letem ol pikinini blong olgeta oli pleplei wetem ol buk ya, mo oli no mas putum ol mak insaed long olgeta. Maet i gud blong putum wan naesfala saen i stap long laebri, blong talem se ol buk ya oli no mas go afsaed long Haos Kingdom.
From we ol nyufala kongregesen oli stap stanap oltaem nomo, ating sam laebri oli no gat plante buk long olgeta. Sam pablisa we oli gat plante olfala buk, maet oli tingbaot blong givim olgeta long kongregesen. Maet ol elda oli ting se i gud blong odarem ol baond volyum blong Wajtaoa we Sosaeti i stap prentem olgeta bakegen. Long ol rod ya nao, Tiokratik Skul bambae i givhan bigwan blong mekem ol sas samting long Tok blong God oli kam long klia ples. From samting ya, yumi save gat moa save, waes, mo kasem save gud long Tok blong God.—Prov. 2:4-6.