Niufala Plan Blong Ol Laebri Long Haos Kingdom
Blong plante yia nao, ol kongregesen raon long wol oli bin yusum laebri we i stap long Haos Kingdom we fastaem oli talem se hemia Laebri blong Tiokratik Skul. Long ol yia we oli pas, oli bin ting se i gud sipos wanwan kongregesen i gat prapa laebri blong hem. Be naoia long sam ples, i gat bitim wan kongregesen we i stap yusum Haos Kingdom. Mo sam long ol kongregesen ya oli toktok lanwis we i defren long narafala kongregesen. Taswe i luk olsem se i moa gud blong gat wan laebri nomo blong olgeta lanwis grup we oli yusum Haos Kingdom. Laebri ya i save holem evri buk, wetem ol niufala buk tu. Long sam Haos Kingdom, i gat bitim wan rum blong mekem miting long hem. I gud we ol wanwan rum ya oli gat prapa laebri blong olgeta we i stret long olgeta lanwis grup we oli mekem miting long ol rum ya.
Yumi hop se plan ya bambae i givhan blong sevem spes mo mane. Mo tu, taem yumi joenem laebri blong tu no moa kongregesen, ol laebri blong yumi oli save kam moagud. Be, i tru se taem yumi joenem tu no moa laebri wanples, bambae yumi gat plante kopi blong semfala buk. I gud blong holem ol buk ya i stapgud samples. Bambae yumi save yusum ol buk ya biaen, sipos i gat sam niufala Haos Kingdom i stanap. Sam Haos Kingdom oli gat wan kompiuta wetem CD-ROM blong Watchtower Library we maet samfala oli laekem blong yusum.
I gud sipos wanwan Haos Kingdom i jusum wan brata blong lukaot long laebri blong olgeta. Maet i gud sipos hem i wan long ol brata we oli lukaot long Tiokratik Skul. Hem i mas meksua se i gat evri buk wetem ol niufala buk tu, i stap long laebri ya, mo i mas raetem klia insaed long kava blong ol buk ya, se oli blong laebri blong Haos Kingdom. Ating wan taem wan yia hem i mas jekemap laebri ya fulwan blong luk se olgeta buk oli stap mo blong luk sipos i gat sam buk we maet oli brobrok. Man i no mas karem ol buk we oli stap long ol laebri ya oli go afsaed long Haos Kingdom.
Plante brata sista oli laekem tumas blong yusum laebri blong Haos Kingdom. I gud sipos yumi evriwan i tinghae long hem mo yumi keagud long hem mo yusum hem blong “faenem save blong God.”—Prov. 2:5, NW.